佢用3粒Bitcoin買起一間7仔: 第九章 時光這個壞人偏卻決絕如許 三之三

「哈。」也然爸爸乾笑，高齡新牌仔出師不利，乜心情都冇晒，「不如call兩架拖車先，我架車郁唔到」。

「等我嚟啦，我有相熟車房。」王太隨即打畀車房。

阿仔同學仔個媽咪幫手善後，也然爸爸唔好意思程度，衝上新高，尷尬到唔敢直視以琳媽咪。左望右望之際，見到架落晒客嘅中型16座白色小巴，準備離開，也然爸爸衝去架車度。

「阿叔，接唔接生意？」

「咩話？」阿叔用極高聲浪答也然爸爸。





「我話，你都係吉車走啦，兜我哋出彩虹地鐵啦，錢會照畀你。」

「我趕住接其他人喎。」

「14個人出彩虹，1,000蚊，載唔載？」也然爸爸一邊講一邊攞銀包，有其父，必有其子。阿叔反正空車出市區做接第二班客，有人上來更係應承啦，正話吊高嚟賣啫。

也然爸爸同以琳媽媽安排好拖車後，14個人再次離開呢個難忘嘅生日會。小也然喺家長安排下，有秩序咁轉車，小朋友，最鍾意坐車車，由私家車轉坐白色小巴，又係一個歷險。

阿叔手車好狂野，成車小朋友都好似舞龍咁，收音機仲開到鬼殺咁嘈。也然爸爸好想出聲叫阿叔開慢啲，諗諗下怕刺激阿叔會再開仲衰，所以忍咗呢十幾分鐘去算。





5歲生日會，就係嘈到拆天嘅16座小巴，畫上深刻嘅句號。

300呎單住入面，以琳同也然，一邊整理舊唱片，一邊回憶十幾年幾嘅往事。

「嗰年生日會好好玩，其實我都唔記得玩咗乜，但好似玩極都唔完咁。」以琳覺得5歲嘅生日會，特別懷念。

點解無喇喇講起咁多年前嘅生日會？只係因為摷到啲舊兒歌碟。

「幼稚園咁耐嘅嘢，邊會記得。」年代久遠，也然真係冇乜印象，直至佢喺唱片堆入面，搵到一盒已經甩皮甩骨嘅施德樓木顏色筆。





「淨係記得，你老竇撞到我阿媽架車，哈，係我第一次遇到車禍咯。」好多唔開心嘅事，當佢變成往事，就往往可以用嚟笑。

「我哋唔係坐小巴走㗎咩？」

「唔係，兩架車分開走丫嘛。」以琳好肯定。

「小巴喎，個司機好聾，開到個收音機勁大聲。」

「定係我哋走咗兩次？諗諗下好似兩個方法都有？」以琳開始懷疑自己記錯。

也然感覺到，自己同以琳記憶有差異，但兩個人都冇記錯，只係生日會唔止發生過一次，坐車人七係有，但離開不斷重覆嘅生日會，係阿叔好嘈嗰一架小巴。

十幾年前，以琳、也然、Francis同埋一班家長因為生日會，不自覺墜入咗時空洗牌；也然幾日前再次墜入時空洗牌，之後喺扭曲嘅空間，遇到因為執完屋而入到嚟嘅Francis。

也然可以肯定，係海棉寶寶USB、即係現場嘅音樂係關鍵，至於「出口」，好大可能係架小巴。





「都夜咯，不如聽日再嚟執過啦，啲碟實在太多啦。我送你落去丫。」也然唔等Francis傳奇怪短訊畀以琳，速速送以琳離開，爭取時間解開咗呢個謎。