［搞笑］［打機］收錢幫人戒除網癮，幫到困咗喺遊戲世界: 二十四、龍死落地行

龍係空中霸主，佢天生就比其他生物更具喺空中嘅優勢，喺設計上已經完美體現呢一點。

同其他識飛嘅怪唔同，龍翼嘅連接處係異常地堅硬。紅玉龍理所當然地認為我哋唔會對呢個位落手咁反智。

佢啱，我哋的確唔打算向連接處落手，如果我哋真係咁笨柒嘅話，鋸到猴年馬月都未鋸完。

我哋嘅目標係割佢塊翼膜落嚟，令佢飛得唔穩，寧願落地面同我哋苦戰。

朗仔負責左右、我負責右邊，薄薄嘅翼膜好易切開。





龍似乎唔知道我哋有用到依附魔法，以為我哋只係以純粹嘅力量留喺佢背脊，佢發現我哋嘅小動作之後，胸有成竹咁拍翼阻止我哋。

我哋俾Angel施咗依附魔法，去到龍翼下面都一樣可以完成我哋嘅任務。因為知道自己唔會跌落去，我哋緊張感明顯減低咗，動作都更加俐落。

好快，翼膜已經俾我哋乾手淨腳咁切咗落嚟。

失去翼膜嘅紅玉龍冇辦法正常飛行，只好急急腳衝返落地面。

我哋平安落地之後，真正嘅總攻先開始。





龍喺呢刻比較似一隻野獸，佢就好似一隻地面嘅野獸咁，同我哋戰鬥。呢刻佢再唔係高高在上嘅空中霸主，係同我哋一樣為生命而戰嘅亡命之徒。

話雖如此，喺地面嘅佢都係好強，前排已經有部分人受到重創，俾人送返後排治療，同時都有幾個人不幸戰死。

喺大家嘅努力之下，佢嘅血量俾我哋夾硬磨到得返60%，呢個狀態之下，佢會進入龍怒狀態，提高自身攻擊力同防禦。

據我所知，呢個係紅玉龍唯一一個特殊狀態，我諗只要我哋捱得過就冇事。

全部人齊心將紅玉龍血量壓到落40%嘅時候，突然聽到紅玉巫女嘅歌聲。紅玉龍附近有兩個紅玉巫女憑空出現，一個負責近戰，另一個負責遠攻。





佢哋出嚟之後，後面嘅紅玉龍動作開始慢落嚟，彷彿佢將自己嘅力量分咗俾兩位巫女咁。

呢種情況，從來未出現過。

近戰巫女手執一把大鐮刀。

遠攻巫女拎住一疊符紙。

紅玉巫女嘅戰鬥思路比紅玉龍又清晰，殺我哋一個措手不及，前排嘅人俾佢哋打到節節敗退。

「兩個八婆就想打贏我哋？未免太睇少我哋喇掛？」
莿姐衝上前諗住打破僵局，我想叫停佢都叫唔切。