［搞笑］［打機］收錢幫人戒除網癮，幫到困咗喺遊戲世界: 二十五、玉碎

「唔好去！佢哋兩個一人分咗一半龍嘅力量，好撚危險！」莿姐嘅突擊唔止嚇親我，八寶粥直頭嚇到哭腔都出埋嚟，但仍然阻唔到莿姐嘅決心。

其實佢大可以淨係負責保護八寶粥，但佢選擇咗衝上前纏住遠攻巫女，因為佢知道，佢哋兩個合作嘅話，形勢會對我哋更不利。

八寶粥發現紅玉龍已經開始進入休眠狀態，頭上嘅紅玉都一分為二，鑲咗喺兩位巫女嘅背脊。紅玉係力量嘅象徵，睇嚟佢嘅力量已經完全分晒俾兩位巫女。

咁強嘅力量封喺人形軀殼，令佢哋更加敏捷，亦可以慳返啲移動所需嘅能量。不過，咁樣亦都意味住，我哋成功擊殺兩位巫女就可以通關。

我哋特登唔攻擊紅玉龍，淨係攻擊巫女，發現紅玉龍嘅血量都下跌緊。兩位紅玉巫女非等閒之輩，本身俾紅玉龍削弱過嘅戰力，陷入一場苦戰。





眼見勝利在望，但我哋好似點打都衝唔過35%血量嘅關口咁。

近戰巫女把大鐮刀砍出嚟嘅傷口會持續俾火燒咁，而且防禦力好高，佢一路向前行進，傷者同法師俾佢打到落水狗咁後退。近戰巫女選擇單獨作戰，並冇打算等埋遠攻巫女。

睇嚟，佢兩位唔止吸收咗龍嘅力量，連龍嘅傲慢都吸收埋。

「你算發現得早。」遠攻巫女望向八寶粥淺笑，絲毫唔怕衝去佢身前嘅莿姐，喺莿姐手上大錘落下嘅同時，佢拎出一張符紙，輕唸咒語。

「護！」片刻過後，護罩輕輕鬆鬆咁擋住莿姐嘅錘擊，其後又輕輕閃身到莿姐身側。





佢冇直接攻擊莿姐，而係又開始唸咒。

「消。」遠攻巫女輕輕貼咗張符落莿姐盾度，盾消失得無影無蹤。「而家咁，似乎公平啲。」遠攻巫女出言嘲諷嘅同時，八寶粥趁佢隻手未回得切拎新符，用軟鞭纏住佢隻手，防止佢攻擊充滿破綻嘅莿姐。

咁撚屈機嘅魔法，同紅玉龍比嘅話，係另一種難搞。

我以為遠攻巫女會優先拉開距離，點知佢用力捉實軟鞭，將八寶粥拉到佢身前。