［搞笑］［打機］收錢幫人戒除網癮，幫到困咗喺遊戲世界: 三十二、矛盾

呢場苦戰結束咗，無疑係一件好事，全部人都好開心。

但坦白講，我對蛇仔明呢個作戰相當不滿。

我甚至send message問佢到底做緊乜撚嘢，我肯定如果呢刻自己喺現場，塊面一定已經黑到爆。

可以講，我同佢並肩作戰多年，最不滿係今次。

我不滿唔單止係因為佢攞我個客條命嚟博。





更加係因為佢事前完全冇同我商量過。

毫無疑問，Angel係知道晒全盤計劃，即係佢哋三個係私下傾好晒，由得我同烏鴉嚇餐飽。蛇仔明似乎已經逐漸向Angel靠攏，我相信蛇仔明冇陰謀亦冇惡意，佢只係好講義氣、好易受人影響。

但我個心都係好唔舒服。

佢做呢個決定之前，有冇諗過我盤生意？

就算唔講生意，佢有冇諗過現實世界嘅我係俾娟姐嘅人照顧緊，如果朗仔有咩三長兩短我可能要同佢陪葬？





「紅玉圍獵結束，大家即將被傳送到交誼廳。」

我帶住愁緒俾系統傳送離開，一陣白光過後，眼前已經係一個極之豪華嘅大廳，中間擺滿各式美食。

蛇仔明手拎住大大碟嘢食滿面笑容咁行過嚟。

「魚哥，唔好嬲唔好嬲，食吓嘢開心吓，慶祝我哋最後冇事，最後冇事！」佢一面討好，但我都開心唔嚟。

「乜撚嘢最後冇事，呢個咁戇鳩嘅計劃係邊個諗出嚟？」我未開口，烏鴉已經代我出聲。





蛇仔明仲想開口講嘢，Angel已經行去佢身前。

「係我，我同朗仔識咗咁耐，有一定默契先敢博，朗仔自己都樂意，你哋唔好怪晒蛇仔明。」

「唔好嘈交啦，我都有同媽咪講，佢都支持我。」朗仔想出嚟打圓場，俾我冷冷打斷佢。

「你哋而家做晒英雄啦，威啦，所以而家係我以小人之心度你哋君子之腹？」

我口快快講晒心入面諗嘅嘢出嚟。

一時間，全場沉默。