［搞笑］［打機］收錢幫人戒除網癮，幫到困咗喺遊戲世界: 三十三、分家

火氣一攻上個腦，我甚至唔記得咗自己一開始已經懷疑Angel係有心分化我哋。

我淨係知道自己好嬲，淨係知道自己同隊友間充斥不信任。

我㩒唔低自己嘅怒火，講咗好多好難聽嘅說話，大意係話蛇仔明冇腦，人講咩佢做咩。蛇仔明個笑容已經掛唔住，只係用一個尷尬又難堪嘅眼神望住我。

烏鴉喺隔離示意我收聲，我都冇停。

最後仲講咗致命嘅一句。





「早知係咁就唔同你呢啲柒頭組隊，呢個game大把勁過你嘅法師，你唔好撚自以為是，我哋唔好再一隊喇，你躝去同啲柒頭組隊啦，你條賤命都淨係配俾人利用，如果唔係，邊個得閒理你呢啲傻鳩。」

呢句一出，我就知返唔到轉頭了，我咁樣正中Angel下懷。

成個場都彌漫住尷尬嘅氣氛，附近嘅人都懷疑自己聽錯。

Snake嘅會長俾人當面屌到一棟都冇，仲要俾人逐出隊伍。

「得，我離隊。」





蛇仔明都冇晒笑容，好認真咁樣應咗我。

「魚仔唔係咁嘅意思，你哋冷靜啲先。」呢吓輪到烏鴉嘗試打圓場，但都於事無補。

最後，蛇仔明真係離咗隊，而朗仔聽咗娟姐講，跟住我同烏鴉。