［搞笑］［打機］收錢幫人戒除網癮，幫到困咗喺遊戲世界: 三十四、覆水難收

過咗一陣，我先發覺自己啱啱講嘅嘢有幾離譜，對蛇仔明嚟講，我係佢識咗好多年嘅好兄弟，但遇事竟然係選擇惡言相向。

蛇仔明最後嘅眼神唔止係嬲，仲夾雜住失望。而烏鴉望我嘅眼神都係一言難盡，我知佢雖然成日同蛇仔明鬥嘴，但佢心目中都當佢係好重要嘅戰友。

講出去嘅野覆水難收，我又冇辦法放低面子求和。講到底，都係無謂嘅自尊心作祟。

蛇仔明走嗰陣腳步好快，Angel同佢轉眼間已經走得好遠，最後佢仲轉過黎陰陰嘴笑左一下，我既推測果然冇錯，佢係有心分化。

轉眼間，交誼廳又恢復平靜，大家都係照樣食嘢飲嘢，似乎已經唔記得之前嘅苦戰，又或者係呢晚過得太苦，只可以扮唔記得。





朗仔恢復當初同我哋唔太熟嘅模樣，睇嚟佢都唔想同我多講半句，呢樣我又冇咩所謂，反正我都係受人所託去照顧佢，佢嘅感受唔係真係太重要。

「Hello魚魚，聽講你地而家少咁個法師喎。」

迎面而來嘅係一個穿著浮誇嘅雙馬尾女人，一眼就認得出佢係Dust公會嘅副會長，兼首席精靈法師米餅。

一個同我極度唔啱嘅女人。