［搞笑］［打機］收錢幫人戒除網癮，幫到困咗喺遊戲世界: 三十六、精靈

面對米餅嘅挑釁，我除左是但應佢兩句外，都冇咩實際嘢做到。



聽講精靈法師召喚出嚟嘅精靈，會喺外型上反映法師嘅內心世界，有少少類似我哋平時「相由心生」嘅概念。雖然咁講，但如果召喚完出嚟唔滿意精靈外表嘅話，隨時可以用魔法執執佢哋個樣，但同樣地，後續需要持續用大量魔力維持佢地嘅外型。



我都敢肯定米餅一定有用魔法幫自己啲精靈整過容，如果唔係嘅話，佢地一定會係幾隻芝娃娃咁款。







米餅身邊三隻精靈分別係紫色、粉紅色同粉藍色，個樣同打扮望落十足十迷你版米餅，平常人見到或者會覺得好可愛，但我見到覺得好可憎。而佢地三個嘅共通點就係對住我個樣睇落好串串貢，即係啲新年會入你房踩爆你模型嘅𡃁仔咁嘅樣。



召喚精靈同埋維持佢哋嘅活動能力都會消耗魔力，所以精靈魔法對法師本人嘅魔力要求好高。







有關精靈法師，我覺得大約可以按實力分成四種：



第一種係初階精靈法師。



精靈魔法算係一種較複雜且花時間研究嘅魔法，對魔力要求都相當高，可以話係其中一種門檻最高嘅魔法。







可見，初階精靈法師喺普通嘅魔法方面都略有小成，而且佢哋嘅魔力比較充足，對運用魔力有一定理解。



佢地作為一個法師已經算係相當上手，不過精靈魔法要一定時間先用得熟，所以初階精靈法師一般只會喺真係有需要戰鬥嘅時候先召喚精靈出嚟。



甚至，到真係要戰鬥嘅時候，或者都唔會冒險選擇精靈魔法做主要嘅攻擊手段，可能最多只係召喚精靈幫自己治癒。



初階精靈法師嘅極限係召喚一隻精靈。







第二種係中階精靈法師。



中階精靈法師同初階精靈法師嘅分別在於，佢地更擅長分心出嚟控制精靈，同埋將精靈加入自己嘅作戰計劃入面，活用精靈帶嚟嘅優勢。



用精靈法師嘅行話黎講，比起初階精靈法師，佢哋同精靈更有「默契」。另外，佢地都開始會喺非戰鬥嘅時候召喚精靈出嚟作防禦用途，等精靈幫佢哋留意自己嘅視覺盲點。







可以見到，就算到中階精靈法師呢個級數，精靈魔法睇落都係相當被動。



中階精靈法師嘅極限係召喚兩隻精靈。



第三種係高階精靈法師。



我個人認為，到高階精靈法師呢個級數先可以真真正正咁了解到精靈魔法嘅奧妙之處。







佢地比中階精靈法師更具同精靈間嘅「默契」，同時間有能力召喚出智慧較高嘅精靈，所以，佢哋甚至唔使咁費神，好似控偶咁控制精靈做每一個動作，佢哋需要嘅係設定一個框架，約束精靈喺呢個框架入面活動。



平時幫佢哋防禦嘅精靈唔再單單負責睇水，更加有能力進行反擊，召喚多於一個精靈嘅話，佢哋甚至識用唔同陣容去攻擊。



高階精靈法師嘅極限係四隻精靈。



比高階精靈法師更強嘅一級係「米餅」。







我冇講錯，呢個女人雖然好討厭，但佢喺精靈魔法上嘅造詣比高階精靈法師高出幾個層次。



佢長期都召喚緊幾隻精靈出嚟行行企企，跟佢飲飲食食，就好似佢嘅幾隻跟班咁。



呢啲喺其他精靈法師眼中係無謂嘅魔力消耗，但都證明咗佢嘅魔力仲有同精靈嘅「默契」係極之高。



佢嘅精靈看似幾個乞人憎嘅死𡃁仔，但你細睇嘅話，會發現米餅賦予佢哋極高嘅生命力，令佢哋睇落真係十足十人類小朋友咁。



要做到呢個程度，佢嘅魔力需要好穩定，心入面永遠有精靈嘅「形」，精靈先唔會消失。





「係啊，餅姐，做咩啊？想應徵做我哋隊嘅法師？」



由於我同蛇仔明炒咗大鑊，我決定開始俾自己習慣咁樣對上位者點頭哈腰，以獲得佢哋嘅一絲憐憫，當然我知佢唔會憐憫我。



「而家宣佈，本次紅玉圍獵嘅獎勵獲得者。」



好彩系統嘅聲音突然打斷我哋，我先唔使再夾硬同佢傾落去。



通常，呢啲獎勵會判俾傷害最高嘅人，不過我唔知異變後嘅評核標準會係點。



好快，交誼廳中間出現咗一塊木牌。