［搞笑］［打機］收錢幫人戒除網癮，幫到困咗喺遊戲世界: 三十七、真實結晶

隨住無字木牌吸引咗米餅注意，我趁佢一時分神行開咗兩個身位。剎那間，全場人都屏息以待，因為呢次係遊戲異變之後嘅第一個活動，大家自然覺得，獎勵會係大家脫離遊戲嘅一大關鍵。



我都係咁諗，甚至猜測會唔會就咁放我哋走。



仔細一睇，木牌呈箭咀形狀，而呢個箭咀正正指住我，我本來都唔確認，之後試探性咁向左走向右走，先確認木牌係指住我。我強忍心中嘅興奮，因為我確信，就憑自己喺紅玉圍獵嘅表現，木牌指中我唔會係壞事。







木牌前面突然出現一個呈淡紅色嘅魔法陣，散發淡淡紅光。



魔法陣似係同緊我講「係你喇，醒水行過嚟啦。」帶住一面狐疑，我最後都係乖乖地行咗去魔法陣入面。隨之而來嘅係漫天飛舞嘅彩帶，同埋一把機械聲，宣佈我係紅玉圍獵嘅最高得獎者，而我獲得嘅獎勵係二十個「真實結晶」。







系統解釋左「真實結晶」嘅作用，佢基本上就係用嚟購買呢個遊戲回程門票嘅貨幣，除此之外並無任何用處。



只要有玩家集齊五百個「真實結晶」，佢就可以選擇脫離遊戲。另外，系統亦都呼籲我地唔好作無謂嘅掙扎，試圖用其他方式脫離遊戲，否則後果自負。



一旦有第一位玩家開始脫離遊戲，下一位玩家就需要多一百個「真實結晶」先可以脫離遊戲。







不幸中之大幸係，活動入面可以有多於一位玩家獲得獎勵，例如今次紅玉圍獵咁，生還者都被系統判定為有參與，鼓勵性咗獎勵咗五粒「真實結晶」，而其他落力啲嘅人就收到十粒，好似朗仔、蛇仔明、烏鴉呢種再落力啲嘅就可以得到十五粒。



總之，主要都係睇系統判定，一諗到我地每個人都365度俾人觀察住就覺得有些少不安。



見到我呢個平時表現唔算突出嘅人都拎到二十粒真實結晶，好多人都後悔自己係圍獵嗰陣冇出盡全力，我諗下次有呢類活動嘅時候，競爭會大好多。



另外，「真實結晶」係可以進行交易，知道當下我就將自己嗰二十粒俾晒朗仔，佢呆左一吓。







「受人錢財，替人消災，你一定要平安出去。」我唔求佢會感激我，簡單同佢交低一聲就行開咗。



娟姐一收到呢個消息即刻打俾我，佢問我咁樣會唔會唔係幾好，畢竟收集得越慢越難走到。我同佢講冇所謂，叫佢專心搞好間麻雀館，確保吊得住我條命就得，佢有啲哽咽咁叫我一定要有命返去。



就係明白越遲走越難走，早啲送走朗仔先可以保佢平安。







就係咁，朗仔暫時係有最多「真實結晶」嘅人。



我行出交誼廳，發現呢度係一間酒店，係我喺遊戲入面好熟悉嘅場景之一。



呢度係位於主城既伯樂城酒店，其中一棟俾玩家交流嘅建築，好似普通酒店咁樣有前台，可以訂房住又有幾間餐廳咁。呢度係佢二樓嘅交誼廳。曾經，我同蛇仔明仲有烏鴉三個人間中都會嚟，我地喺現實生活入面好少去staycation，但我哋三個喺遊戲入面間中會咁做。



我地會分享心事、講對未來既期許、講自己嘅童年。







連樂樂嘅事，我都淨係同過佢地講。



我哋三個嘅生活都有不堪嘅一面，而我地都將自己最脆弱嘅一面展示俾大家睇。我算係對好多事都睇得好化，但佢哋兩個係我心頭其中兩塊最柔軟嘅肉。



同烏鴉講完再見，我自己落咗樓下cafe，想飲杯咖啡放鬆吓，突然有人喺後面拉住我。