(亂寫的) 短篇小故事: 短篇 81 《凍檸茶》

短篇 81 《凍檸茶》

題目：凍檸茶

////// 14 Nov 2025

————（1）

凍檸茶靚靚仔仔咁企咗係度，冰同茶嘅比例啱啱好，頭頂上面嘅檸蜜，一片、兩片、三片，厚度剛剛好。但當我想去飲佢嗰陣，佢竟然同我講：「喂，飲還飲，唔好篤我呀！」





「篤你咪篤你，唔篤點飲呀？」

「唔飲咪唔駛篤囉！」

但係我冇理過佢，照篤落去。

「呀——我啲檸檬呀——！(>﹏<;)」

突然有杯凍奶茶出現喺我面前：「且慢！要篤就篤我啦！」





「凍奶茶⋯⋯ (つД`)ノ」凍檸茶淒美地

「凍檸茶！我係唔會畀佢傷害你㗎！ ٩(˃̶͈̀௰˂̶͈́)و」凍奶茶來勢洶洶咁講。


————（2）

上回講到：
「凍檸茶！我係唔會畀佢傷害你㗎！ ٩(˃̶͈̀௰˂̶͈́)و」凍奶茶來勢洶洶咁講。





「凍奶茶，我唔值得你對我咁好㗎。你唔好理我啦⋯⋯(T ^ T)」凍檸檬茶喊住咁講。已經分唔到佢個杯周圍滴緊嗰啲，係淚水定係倒汗水。

「我點可以唔理你？點可以放低你？(>_<;)」凍奶茶忍住泡眼淚。

「唔得呀⋯⋯我哋溝埋一齊，會肚痛㗎！。・゜・(ノД`)・゜・。」凍檸檬茶轉身，避開凍奶茶嘅眼神。

「我唔理！(;´༎ຶД༎ຶ`)」凍奶茶追上前，貼住凍檸茶個杯：「我唔理呀！」

喺佢哋喊苦喊忽嘅時候，有一杯同凍奶茶差唔多色水嘅嘢出現咗：「凍奶茶！你竟然返嚟搵佢？ ヽ(`Д´)ﾉ 」

————（3）

上回講到：
喺佢哋喊苦喊忽嘅時候，有一杯同凍奶茶差唔多色水嘅嘢出現咗：「凍奶茶！你竟然返嚟搵佢？ ヽ(`Д´)ﾉ 」





「你⋯⋯點解會喺度？(╯°□°）╯」凍奶茶見到佢，目瞪口呆。

「你梗係唔想我喺度啦！(♯｀∧´)」呢杯嘢有啲口氣，一路講，一路散發住濃郁嘅咖啡味。唔，陣味有啲酸。

凍奶茶不知所措咁望住凍檸茶，想解釋。但係凍檸茶同佢講：「你都係走啦，佢先係你杯茶⋯⋯(T^T)」

「唔係呀！」凍奶茶不知所惜，再貼住凍檸茶，拉實佢隻手：「佢唔係茶⋯⋯你信我⋯⋯(>﹏<;)」

「你醒吓啦！佢係檸檬你係奶，唔會有結果㗎！╰(‵□′)╯」凍咖啡上前拉開凍奶茶。

凍檸茶順勢揈開佢隻手，轉身含淚同我講：「你篤我啦，我準備好喇⋯⋯(ಥ_ಥ)」

就係咁，為咗唔想再睇到呢啲奇怪劇情，我拎起飲筒同匙羹，擺好檸檬嘅位置，係咁篤係咁篤。

佢哋好似唔記得，呢杯凍檸茶其實係我㗎，仲加咗兩蚊。





凍檸茶同凍奶茶嘅淒美（愛情？）故事，完。


—-