(亂寫的) 短篇小故事: 短篇 100 《日記裡的另一個人》1-4 / 8

短篇 100 《日記裡的另一個人》1-4 / 8

////// 31 Mar 2026

《日記裡的另一個人》

01

小敏忍咗好耐，終於鼓起勇氣，偷偷翻查男朋友嘅電話。





喺日記入面，發現男朋友寫咗一大段嘢。

其中有一段，小敏嘅視線停留咗好耐：

「上年10月開始，我好似鐘意咗你，你喺我腦海入面不斷盤旋，揮之不去。我哋嘅思想真係好接近，從來都冇一個人諗嘢係同我一樣。」

小敏冷靜咁翻睇呢幾行字，同自己點點頭，終於明白點解男朋友最近對自己咁冷淡。

佢冷靜咁關上電話，以為自己唔會喊。
但係，眼淚一落，就喊到收唔到聲。





——

02

睇完電話之後，小敏開始留意男朋友嘅一舉一動。

佢好多時都會對住個電話咪咪笑。
　　——一定係同緊嗰個人傾偈⋯⋯





佢換咗眼鏡，着咗有牌子嘅恤衫，仲開始噴香水。
　　——平時佢唔會捨得用咁多錢⋯⋯

小敏見住佢嘅變化，忽然清醒過來，原來男朋友喺好早之前，就已經對自己冇咗愛，只係自己冇承認過。

佢冇咗剛剛拍拖時嘅細心，冇咗嗰種關懷備至嘅呵護，冇咗好多會主動同自己分享嘅小事。佢將所有溫柔，都留畀另一個人；將自己嘅關心，當成應份。

其實，自己一直都只係一個附屬品，一個褓姆，一個自動櫃員機。

——

03

之後，小敏一直都忍住冇再去翻查男朋友嘅電話，因為佢知道，入面嘅嘢，只會令自己更加傷心。





呢幾個月，男朋友對小敏越嚟越忽略，開始連嘢都唔同佢講，而且晚晚都好夜先返屋企。

有一晚，男朋友飲醉咗，瞓咗覺。小敏知道佢啱啱同嗰個人飲完酒，終於控制唔住好奇心，偷偷打開男朋友嘅日記app，傳送咗一個副本畀自己。

其實男朋友從來都唔會畀佢查電話，佢只係無意中見到男朋友入密碼，心血來潮記住咗，一直到而家都冇轉過。男朋友一直都唔知道，小敏知道密碼。小敏好小心咁傳送副本，唔想留低任何蛛絲馬跡，好驚畀男朋友知道。

嗰一刻，小敏嘅心跳快到心臟就快跳出嚟。

小敏好驚畀佢發現，亦都知道自己唔應該睇、唔應該侵犯私隱，但佢真係好想知道嗰個係一個點嘅人，可以令男朋友神魂顛倒。

由第一頁開始睇，發現男朋友寫嘢都幾叻，好有文采。白紙黑字嘅字裡行間，不禁散發住粉紅泡泡，令人動容。

但全部，都係因為愛上另一個女人，而傾瀉而出。

——





04

小敏眼前呢個愛情故事，好淒美，好感人。

男主角追求女主角嘅心路歷程，寫得非常精采，感受到佢哋之間嘅愛好深，入心入肺。

「10月O日　知道你通咗兩晚頂，攰到就嚟暈低咁，真係擔心死我。即刻買咗杯咖啡畀你飲，借個肩頭畀你挨咗陣，你終於都精神返啲，咁就好喇。應承你，日日都買畀你飲。」
　　——我攰嗰陣，你冇理過我，淨係叫我瞓多啲覺。

「12月O日　聽日大老闆巡查，我特登落去買咗甜品，我哋一齊食完之後，一齊準備打大佬，好鍾意呢種同你一齊並肩作戰感覺。有我喺度，唔駛驚，一定幫你攪掂佢。」
　　——我工作上有難題，你從來都冇幫過我，淨係叫我自己嘅時自己解決。

「1月O日　我寫咗封信，放咗入去買畀你嘅手信裡面。我見到你睇到我封信嘅時候，一路睇一路笑，你個笑容真係甜到溶咗我。」
　　——嗰日你買嘢畀佢，我就喺你隔籬， 點解你可以買得咁理直氣壯？





「2月O日　情人節前一日，我送咗隻錶畀你，恭喜你個proposal過咗大老闆，仲交晒畀你負責。你話唔收得咁名貴嘅禮物，但係我話錢唔係問題，最緊要係你鍾意隻錶。當我幫你戴上手嗰一刻，我直頭覺得我已經擁有咗你！」
　　——貴重嘅禮物，我從來都冇收過，你話好嘥啲無謂錢買無謂嘢。擁有？咁⋯⋯我呢？

「3月O日　每日喺office見到你，我個心就填得滿滿，好有能量！尤其攬住你嘅時候，我哋眼神對望嗰陣，我知道你都係同我一樣。」
　　——你已經，好耐都冇攬過我⋯⋯呢半年⋯⋯突然間，連講嘢都唔同我講⋯⋯

日記入面，每一句都好似有把刀，一刀一刀咁直插入小敏嘅心口。

——