(亂寫的) 短篇小故事: 短篇 100 《日記裡的另一個人》5-8 / 8

短篇 100 《日記裡的另一個人》5-8 / 8

05

原來，咖啡嘅帳單，係因為佢。
原來，開OT，係同佢食生日飯。
原來，嗰晚佢冇返嚟，係同佢去醫院等睇急症。
原來，嗰日放喺枱面，唔係夾份送畀經理嘅禮物。
原來，喺日本嗰陣，你幫同事買嘅嘢，全部都係送畀佢。





原來，愛情真係可以完完全全咁改變到一個人。

喺男朋友嘅「愛情巨著」入面，「小敏」完全都唔值得佢提起，甚至連一個標點符號都唔係。

小敏熄咗電話螢幕，雙手將電話捧住喺胸前。深呼吸一口氣，閉上眼睛，眼淚再次無聲地流落嚟。

——

06





接住幾個星期，小敏冇大哭大鬧，亦冇同男朋友攤牌。佢認真思考，重新審視兩人之間嘅關係。

故事中嘅女主角比自己更成熟、更做得嘢、更識打扮。

小敏知道自己徹底咁輸咗，佢對自己講嘅每一句話，都喺度否定緊自己。覺得自己毫無用處、覺得自己好蠢、覺得自己唔入得廚房、唔出得廳堂。

自己被拋棄，係理所當然嘅事；男女主角相愛，亦都係理所當然嘅事。

小敏睇住呢本「愛情巨著」，不斷重溫「以前佢都係咁對我」嘅情節。唔敢相信，男朋友已經完完全全咁，忘記咗小敏係佢一齊咗好多年嘅現任女朋友。





——

07

某一日。

「聽日係周年紀念日，你要唔要⋯⋯返工？」小敏喺男朋友臨出門口、返工前問佢。

男朋友冇回應，坐低綁鞋帶。

「你係唔係⋯⋯以後都唔會再同我講嘢？」小敏仲帶住少少期望，去問呢一條問題。希望男朋友會發現自己嘅存在。

不過，男朋友望都冇望過佢一眼，當佢透明。仲撳一撳電話，微微一笑，然後開門離開家。

小敏望住緊閉嘅大門，聽住鎖門嘅聲音，同個心一齊碎咗。





轉身，喺間屋度行咗一圈，每個角落，都係回憶，真係好唔捨得。索一索鼻，深呼吸咗一下，對自己點點頭，畀自己一啲勇氣。

開始收拾，將破碎嘅心都收入行李。

離開嘅時候，手上緊緊抓住嘅情侶鎖匙扣，經過每一個垃圾桶，小敏都同自己講：「下一個先掉，可以嗎⋯⋯？」

——

08

小敏行到自己屋企樓下，熟悉嘅環境、熟悉嘅空氣，無論幾耐冇返嚟，個感覺都係唔會變。突然間，好似返到細個讀書嗰時、無憂無慮嗰時、仲未同男朋友拍拖嗰時。

經過大廈附近嗰個有小小臭味嘅垃圾房，小敏望咗一望手上嘅鎖匙，清空自己嘅雜念，狠狠地掉入去大大個嘅綠色垃圾桶入面。





「再見，以後都唔再見。」

鎖匙無聲無息、無影無蹤咁消失喺一堆垃圾裡面。

小敏抬頭望住天空，手握住空空嘅拳頭，將眼淚吞返落肚。

「冇咗佢，我係咪可以⋯⋯搵返自己？」

——完