(亂寫的) 短篇小故事: 短篇 107 《撞到一隻嘢》 7-10 / 10

短篇 107 《撞到一隻嘢》7-10 / 10

////// 7 Jun 2026

07

原本暈低咗嘅的士司機，喺怪物跌落地嗰刻，被強烈嘅地震震醒咗。佢一擘大眼，就見到隻大型怪物個地下痛到縮縮吓，再望向旁邊拎住慢慢變返金色士巴拿嘅乘客嘅背影。

哇，呢個場景，簡直就係超級英雄電影裡面打敗壞人嘅經典一幕咁。





佢真係睇到好感動，忍唔住係起勢咁拍手：「精采～好精采～」

乘客轉頭望住司機，心裡面驚咗一驚，即刻制止佢：「殊！唔好拍手呀！」

但係司機好似聽唔到咁，仲好熱情咁行埋去乘客度，搭一搭佢膊頭：「使乜怕醜喎，咁大隻嘢都搞得掂，一定要畀啲掌聲你嘅。」講完，佢又再次拍手。

乘客即刻撳停咗佢雙手，再次喝止佢：「我叫你停呀！懵炳！」

吼吼——





怪物聽到掌聲，好似叉足電咁，迅速翻身企返起身。居高臨下咁面對住前方兩件獵物，哄上前用力聞。杰撻撻嘅口水再次流出，今次流得比頭先仲要多。佢嘴巴微微張開，竟然發出低沉嘅人聲：「兩隻，吼！」

乘客同司機同一時間伸手揞鼻，異口同聲咁話：「哇⋯⋯原來識講嘢㗎⋯⋯？」


——

08

「撞撞完我我我仲仲想想走走走走走？唔唔使使使旨意意意意意。吼吼——」怪物把聲好似裝咗喇叭咁，又大聲又多回音，仲要勁低沉。





乘客用士巴拿指住怪物隻眼，握緊手柄，士巴拿又開始變色。不過今次唔只成支發光，士巴拿個頭頂仲發出光束，好似強力電筒咁，瞬間照亮黑漆漆嘅夜空。怪物被強光照射到合埋咗眼，然後定咗格。

司機大驚小怪咁喺度大呼小叫：「你支嘢識變色㗎？咁勁嘅？照到隻怪物唔識郁。」

正當佢想拍手祝賀嘅時候，乘客用極度凌厲嘅眼神啤咗佢一嘢，司機即刻醒水，舉高雙手：「嗱，我都醒㗎，唔拍得手吖嘛。」

乘客離遠觀察住怪物個頭，搵緊佢有咩弱點。唔使三分鐘，佢搵到喇。佢望住天真嘅司機，搖咗搖頭，不過都抱住少少希望去問司機：「你夠唔夠膽爬上去怪物個頭頂？」

司機即刻望上去怪物個頭頂，拍一拍乘客膊頭：「搞笑咩兩層樓高喎，咪玩啦。」

「你一係爬上去，一係死，你揀咩？」

「吓⋯⋯」司機feel到乘客個樣絕對唔係講笑，有啲驚：「咁嚴重咩？」





喺佢哋講緊數嘅同時，冇為意士巴拿已經移開咗。怪物開返眼，嘴角上揚，無聲地冷笑。


——

09

吼！！！！

怪物大叫一聲，一頭撞走兩個人類。

兩個人彈飛九丈遠，乘客冷靜咁順勢轉咗兩個圈，雙腳落地，勁有型。但係司機就一邊碌一邊大叫：「呀！呀呀！呀——」

不過乘客手中嘅士巴拿，喺撞擊之下飛脫咗，跌咗喺怪物面前，金光消失，手柄變成危險嘅紅色閃光，閃出SOS嘅訊號。





怪物向住士巴拿踩過去，要毀滅武器。乘客梗係要護住個士巴拿，隨手抬起側邊個垃圾桶，一嘢飛去怪物身上。可惜呢個雞毛蒜皮嘅攻擊，怪物唔會將佢放喺眼內。

乘客趁怪物仲未踩到底，即刻攝入怪物嘅腳板底同地下嗰條罅度，拎返支士巴拿。千鈞一髮之際，乘客兩手揸住士巴拿，極速撳咗個掣，士巴拿個U型開口，不停噴出成個人咁高嘅螺絲帽。佢利用噴射螺絲帽嘅衝力，順利滑出怪物嘅腳底。

怪物踩咗落去嗰堆大型螺絲帽，痛感直插後腦，就好似踩中LEGO咁，痛到腰心腰肺。

吼——

隻怪物，又重重地撻咗落地。


——

10 大結局





趁怪物撻低咗，呢個絕對係接近頭頂嘅好時機！

乘客一個箭步衝過去，用士巴拿U型開口對準怪物頭頂個螺絲帽，較好開口大細、鉗住，然後用力順時針扭幾下，成粒螺絲帽擰出咗嚟。輕輕一推，原本突出嚟嘅螺絲腳隨即凹咗入去，怪物頭頂露出一個窿，一陣強烈嘅狂風由入面吹出嚟。

嗞——

隨住洩氣聲，怪物嘅身型逐漸變細，最後縮到變成一隻成年嘅英國老虎狗。佢蜷縮成一舊，一臉委屈咁用條脷舔緊隻腳板底。

「唉，邊個走失咗隻變異寵物呀？通街走好危險㗎嘛。」乘客行埋去，見到狗帶咩聯絡資料都冇寫，唯有打咗畀研究所：「喂？變異寵物研究所？有人走失咗隻英國老虎狗，我哋而家喺⋯⋯」

司機而家先行到返嚟，左腳趷吓趷吓，明顯扭親：「隻怪物呢？哇，你打走咗佢喇？好叻呀！」講完佢又開始拍手。

狗仔聽到掌聲，興奮即刻雙腳企起身，笑口噬噬咁向住司機搖住尾，點知⋯⋯

「隻狗仔邊度嚟㗎？咁得意嘅？」司機以為危機已解除，完全唔知死咁撩隻狗仔玩：「Come Come！」





但當司機越行越近，佢身上嘅味道越嚟越濃烈。狗仔嘅大腦叮一聲，突然認得呢個人就係頭先開車撞佢嗰個！狗仔即刻目露凶光咁望住司機，大吼一聲，然後瘋狂追住司機嚟咬。

司機嚇到連扭親嘅腳都奇蹟好返，起勢咁逃跑：「呀——唔好追過嚟呀——」

乘客冷眼望住司機畀狗追，完全冇諗過去幫佢手，只係繼續同電話裡面嘅人講：「有一個地球人見過我哋，要派埋特警過嚟⋯⋯唔，需要洗腦⋯⋯係嘅，唔該晒。」

——

完。

——