(亂寫的) 短篇小故事: 短篇 107 《撞到一隻嘢》4-6 / 10

短篇 107 《撞到一隻嘢》4-6 / 10

////// 7 Jun 2026

04

怪物撞向的士，成架的士好似足球咁撞走，碌咗幾圈。乘客猶如置身喺攪拌機當中咁，不過佢冇驚過，敏捷咁捉住前座嘅頭枕，因應旋轉嘅方向同速度調整重心。

最後成架的士反轉咗，玻璃爆曬。





吼吼——怪物再次對住的士大叫，好似要向乘客宣戰咁，然後行兩步，再提起腳，瞄準住架的士踩落去。喺嗰兩下地震時，乘客已經知道一定要離開呢架車，否則必死無疑。

說時遲，那時快，佢喺車窗碌咗出嚟嗰一刻，怪物隻腳重重咁踩落地，成架的士喺面前粉碎咗。

「哇⋯⋯好彩反應快⋯⋯」

真係膽戰心驚，乘客快手快腳咁碌咗去路邊，距離暫時安全。但係佢氣都未抖順，安全時間都未夠一秒，怪物已經開始提起另一隻腳，向住佢踩過去。

——





05

乘客眼見隻巨型腳板底，伴隨住陣陣腳臭，向住自己衝過嚟，佢乾嘔咗一下，忍住呼吸，撐一撐右腳，成個人彈開，離開危險範圍。

怪物一腳踏地，的士碎片同零星雜物，齊齊彈高咗，再跌返落地。喺嗰啲雜物裡面，其中包括一個乘客嘅裝修工具箱。

「好彩仲喺度！」乘客衝過去，打開工具箱，向下倒晒啲嘢出嚟。嘭唥嘭唥，螺絲批、鎚仔、尖嘴鉗、電線膠紙等，冚唪唥都跌晒出嚟。

喺一堆工具入面，竟然有一樣嘢發出耀眼嘅金光！閃閃發亮！





乘客充滿信心咁奸笑，拎起呢支發出金光嘅士巴拿，對住隻怪物，擺好戰鬥pose：「哼，你今次仲唔死？」

——

06

怪物見到發光嘅士巴拿，唔知刺激到佢邊條筋，佢即刻發咗癲咁邊大叫邊衝上前。

「呀——去死啦——！」乘客都一邊大叫一邊衝上前，右手慢慢加力揸實士巴拿，士巴拿嘅光，跟住佢逐漸加強嘅力度，由金色，迅速經過黃色、橙色，最後變成血紅色。

到大家之間接近1.5米距離嘅時候，乘客突然縮低，忍住呼吸，瞄住怪物嘅腳趾尾打落去，仲打咗好幾下。

腳趾尾受撞擊，呢種錐心之痛，真係唔係個個都承受到。

咁大隻嘅怪物都一樣，極酸極痛嘅感覺，由腳趾尾嘅神經線，一秒都唔使就散發全身。怪物全身都用唔到力，失去平衡，跌咗落地，兩隻肥大肉厚嘅手撫慰住隻腳趾尾，全身縮埋一舊，喺地面上掙扎。





吼——嗚嗚——

——