[GL] 重遇之後: 28
「估唔到有個咁得意嘅打卡位！」我和Tracy站在商場一角，看回剛剛拍的照片。
從餐廳離開，我們到了附近商場閒逛，剛好遇上人氣吉祥物的主題推廣活動。除了供拍照留念的立體佈景外，還有售賣精品的期間限定商店。Tracy看了看四周，指著附近一個佈景，提議道：
「我哋影埋另一邊個公仔，跟住入去間舖度行下好唔好？」
「好呀。」
此時，一陣吵鬧聲從不遠處傳來，幾個男女正往這邊迎面而來。他們有的忙著低頭滑手機、有的只顧跟同伴大聲談笑，聊得手舞足蹈，絲毫沒有留意四周環境。走在附近的人，都與他們保持一段小距離。在他們經過身邊前，我輕輕抱住Tracy的肩膀，不讓那群人撞到她。突然被抱的女生怔了一怔，我向她說明道：「小心撞到。」
「哦、哦……」她瞄了一眼與自己擦身而過的人，點了點頭表示明白，然後又神情尷尬地說：「你突然咁樣，我心臟負荷唔到……」
「咩負荷？我係咪嚇親你？」我不解地歪頭問道。
聽到我的疑問，Tracy露出一個微笑，說：「唔係，你無嚇親我。」
「咁你指咩？」
她想了想，說：「嗯……我覺得你好識得關心人，對人好溫柔。」
「係咩？我又唔覺自己有特別溫柔喎。」
「你係。好似之前聖誕咁，我嗰時話凍，你就即係比件褸我著。到情人節嗰時，我無話凍，但你都主動問我夠唔夠暖。然後啱啱，你又主動攬住我膊頭，等我唔使比人撞親。我知你無特別意思，只係單純出自關心，但每次 ……你不經意咁對我溫柔……都令我更加鍾意你。」
「……係咩。」聽到她那唐突的表白，我難為情地別開視線。
「我可唔可以……繑住你影相？」
被她這樣一說，我才發現我們已站在目標佈景前好一會兒了。那道徵求同意的提問讓人更覺不好意思，我無法自然地作出反應，只能笨拙地點了點頭，「……你唔使問都得呀。」
她似是沒有聽到這邊的話，只是專注地看著手機。螢幕中的我們都笑得有點牽強，但這並不是因為尷尬或者覺得不舒服所致。我想……是因為我們都在害羞吧。
「而家無得用友情嚟做掩飾……我唔知應唔應該好似以前咁。」給我看回合照，Tracy稍稍垂下眉，苦笑回答我片刻前的話。
「點解？我哋仍然係friend，唔係咩？」
「嗯，無錯……」
「咁就唔使特登避忌呀。」
「但係我對你嘅感情唔只係友情。」
「但我哋係朋友呢個事實，同時都係無改變呀。只要我哋一日都係朋友，我哋就唔需要改變相處模式。」
「咁如果我哋唔再係朋友呢？」旁邊女生凝視著我的目光，似是要看透藏在深處的心思。
「只要我哋一日無翻面，一日都會係朋友。做咩，你想同我絕交呀？」我故意打趣地說道。
「唔係，我只係想知，如果有日，我哋……唔只係朋友嘅話，會變成點啫。」
「就算我哋有日真係，改變咗關係……我哋嘅友情仍然都係不變。我哋可以係朋友之餘，又可以同時有……其、其他稱呼。兩個人嘅關係，唔一定只有一種定義。」越是說到後面，我越是感到兩邊臉頰燙得快要冒煙似的。
聽畢我的話，Tracy似是受了感動，稍稍用力勾著我的手，有點激動地感嘆道：「Jane，點解你可以咁可愛！」
不明白為什麼剛才的話會讓她得出如此結論，還在冒煙的臉瞬間爆發開來，我稍微放聲喊道：「吓、吓！？你就可愛！我意思係你個人唔好奇奇怪怪咁，同我照返平時咁相處！我係頂你唔順先咁講，無其他意思！」
「係嘅係嘅。你知唔知，你啱啱又再加深咗我對你嘅愛喇。」
「……點解你可以成日都講埋啲咁嘅嘢。」面對今天晚上不知是第幾次的表白，我害羞地別過臉去，喃喃自語道。
「我講咗啲咩？」
旁邊女生探過頭來，一臉無辜地問著。低頭避開對方視線，我小聲說道：「成日講埋啲咩掛住、鍾意、愛嗰啲……你唔怕醜嘅咩？」
Tracy輕輕笑了出來，說：「嘻嘻，怕架。但係對住鍾意嘅人，梗係會想表達自己心意。同埋……我要確認我而家唔係發緊夢。你知唔知，由同你表白嗰日開始，我就成日都諗，會唔會一切都只係自己嘅幻想。會唔會有日瞓醒，發現原來所有嘅一切，只係一場好長好長嘅夢。現實嘅我，仲停留喺巴士度撞返之前嘅日子。所以，除咗想同你表白我嘅感覺之外，可能有部份係想藉住你嘅反應，去令自己安心。實實在在咁等我明白，一切都唔係一場夢。」
聽畢她長長的剖白，我用力捏了一下流露些許不安的臉頰。被弄痛的人喊了出來，說：「好痛！你做乜無端端揻人！？」
「點？係咪好痛？係咪仲覺得自己發緊夢？我成個人企咗喺你隔離，同你講緊嘢，仲揻埋你，邊有得假！」
「因為我真係估唔到會有機會行到呢步……」
「總之你唔使擔心，你而家唔係發緊夢。以後你每講一次自己發夢，我就揻你一次。」語畢，我故意在她面前做了一個捏人的手勢。
「嘻嘻，好嘅……頭先一直無企咁埋唔覺，你好香。噴咗香水？」
摸著臉的女生先是微微一笑，然後湊過來往脖子附近嗅了嗅，好奇地問道。耳邊傳來她鼻子輕輕吸氣的聲音，一陣奇妙的搔癢感緊緊捏住心房。我故作鎮定，淡淡回道：「嗯。」
「特登為咗今日？」
「……唔知。」我不理會她，無聲地咳了一下，往售賣角色周邊產品的商店走去。
走進店內，Tracy拿起一個匙扣，看著它問道：「Jane，你頭先話可以做返朋友之間會做嘅嘢，咁錫你包唔包含在內？
「吓！？」還以為她要問我有關匙扣的東西，誰知竟然是這般完全不相干的屁話！意料之外的問題讓我禁不住高聲喊了出來，失控的表現頓時引來四周目光。我連忙掩嘴，低聲嚷道：「你突然亂噏啲咩！」
「咁我哋小學嗰時曾經……錫過。」
我瞬時愣了愣。原來，她還記得。「你仲記得。」
「點會唔記得，你都仲記得……係咪？」
我輕輕點了點頭，本來還想再問詳細一點，但在開口前，旁邊女生就先把臉哄了過來，壓低聲音，在耳邊試探道：「咁……即係錫額頭……計唔計？」
「唔、計！！！」我沒再理會刻意撩人的女生，徑自走到商店的另一旁，逃避她的追問。
這個人為什麼要在這種時候說這些話！？好好的逛商店都不行嗎！？就不會挑氣氛場合嗎！？不……要是在對的氣氛，對的場合被問也不行。是更加不行。很多意味上。
就在腦內胡思亂想之時，Tracy走到旁邊，邊窺探我的表情邊問道：「真係唔計？」
突然，腦海閃過剛才在餐廳的某段對話，我冷冷地道：「你頭先喺餐廳嗰時唔係話好想知我對今日嘅睇法嘅咩？你再整我呢，我今日就比你零分！」
聽到我的話，旁邊女生頓時垂下眉，如哄小孩般摸了摸我的頭，放輕聲線說道：「OKOK，唔整唔整。係我錯喇，唔好嬲喇~」
「哼。」
「我會乖㗎啦，唔會再曳！」
「一切都已經太遲，我今日要扣你兩分。」
「點解呀？嗰兩分扣咗去邊呀？」
「因為你整蠱咗我兩次。餐廳一次，而家一次。一次扣一分。」
「好喇，我都話唔再整你咯~唔好嬲啦，好無？」
「哼，我唔會信你。」以手掌推開又想湊過來的臉，我氣沖沖地走出店外。
Tracy從後追上，繞住我的手繼續哄我，嘴上雖然在認錯，表情卻笑得開懷。這也是理所當然的。因為我根本就沒在生氣，即使努力想要裝作發怒的樣子，嘴角也總是不爭氣地上揚。雖然不甘心，但我想對方大概也注意到這點。
我們就這樣緊貼在一起，互相打鬧，漫無目的地在快要關門的商場裡亂逛。