[GL] 重遇之後: 31

我：今日會遲少少走
Tracy：遲幾多到？
我：突然有手尾跟，大約半個鐘左右
我：你唔好等我，我哋聽日再約
Tracy：OK，咁聽日見
我：聽日見
完成手上工作，我舉起雙臂伸了個大大的懶腰。聊天室畫面顯示半個多小時前與Tracy的對話內容，我關掉手機螢幕，抱著淡淡的期待離開辦公室。
甫走出公司大樓，一個圓柱形的東西從旁邊遞到面前。內心的期待成真，我不自覺勾起嘴角，把目光投向身旁：「Tracy！」
「嘻嘻，我嚟接你放工。驚唔驚喜呢？今日一日都辛苦晒啦。」笑得燦爛的人，輕輕搖了搖擺在眼前的水果茶，示意要我接過。
「多謝！」我笑笑地拿過她手上的飲料，問：「你呢？你今日買咗咩？」




「我今日買咗珍珠奶綠。」
「咁我哋四圍蕩下先去搭車？」
「嗯！」
最近，Tracy間中會來接我下班。她總會在那間有貓店長坐鎮的台式飲品店買來我愛喝的水果茶，送上幾句慰勞說話。之後，我們會一起漫無目的地四處閒逛，直到把手中的飲料喝完。
Tracy隨意地看著四周，問道：「禮拜日我哋邊度等好？」
「間嘢喺尖沙咀，就地鐵站等？」
「好！」
「哈哈，平時放工你等我，到放假就掉轉我等你。」我笑道。
聽到我的話，旁邊女生不滿地鼓起臉頰，嘟嘴道：「你係咪串緊我同你出街成日遲到？」
「唔係，我只係咁啱諗到。」




「我次次都有努力準時㗎，只係成日臨出街前都硬係有啲嘢睇自己唔順眼，執下個樣就搞到遲咗……Sorry……」
「哈哈，你又唔係遲好多，照返而家咁就得喇。而且平日都係你等我多，放假就俾我等下你，打返個和！」
「真係？你無嬲我遲到？」
「無喇，我先無咁小氣。」
「嘻嘻，你份人咁大量，做你個friend一定好幸福。」
「咁你一定都好幸福啦？」
「我可以咁樣同你肩並肩一齊，就已經夠晒幸福。」
「唉，你真係唔會放過任何機會。」我搖搖頭，沒好氣地笑了出來。
星期天，我們坐在吃韓式燒烤放題的店內，Tracy以夾子夾起一塊牛肉片，確認它烤得恰到好處，放到我的盤子裡。
「你呢？你自己都食呀，唔使理我。」




「餵飽你重要啲。」語畢，她也給自己夾了點東西。
我把熱騰騰的烤肉片放進口中，想起兩星期前跟Susan的聚餐：「我發現呢排都幾成日食放題。」
「係？你最近去咗食咩？」
「前排同Susan去咗食打邊爐放題，佢請。」
「咁好嘅？」
「係呀，佢話要賠罪。」
「點解嘅？佢做錯嘢？」
「嗯，可以咁講。」
「即係點？」
「唔話你知。」我向好奇的人吐了吐舌。
「講一半唔講一半，咁神秘？」
「嘿嘿。」
「Jane，你想食咩？我幫你燒。」
對面女生又再拿起夾子向我問著，我不好意思地婉拒道：「我真係可以自己嚟……你唔使當我係細路仔咁。」
「我無當你係細路仔，我當你係我心上人咁照顧。」




我瞄了一眼又開始撩人的女生，沒好氣地搖了搖頭。眼角瞥到放在烤爐上的蝦子，我開玩笑道：「哈哈，咁我話我想食蝦，你係咪會幫我剝埋殼先？」
「嗯，梗係。」Tracy理所當然地點了點頭，作勢夾起放在烤爐上的蝦子。我連忙伸手輕輕搶過她手中的夾子，把烤蝦往自己碟裡放。
「你冷靜啲，我自己嚟就得。唉，你咁嘅態度，係咪我叫你做咩，你都會做？」
「係㗎，你叫我做咩，我都願意做㗎。我對住鍾意嘅人，就係咁死心塌地。」
「係係係，你唔好死住，食埋隻蝦先死。」
看著我剝起蝦殼的雙手，對面女生語帶疑惑地問道：「嗯？你剝比我食？」
「嗯，你幫我烤咗咁多肉，當回禮。而且，你口講話幫我剝，但我估你心入面，根本就唔想整污糟隻手。我有無講錯？」我挑起一邊眼眉，故意耍壞地笑道。
「哦？你話係回禮？」
「嗯。」我邊點頭邊把剝好的蝦肉給對方遞去。
「咁……我要你餵我。」她抓住想要把食物放到盤子的手，對我投以銳利的眼神。那雙像是要看穿內心的視線讓我瞬間漲紅了臉，微微彎起嘴角的女生，壓低聲音催促道：「嚟，快啲。」
「你、你自己有手唔識食呀？」
「係，快啲。」語畢，Tracy輕輕張開口。
明白再抖纏下去也沒法改變對方心意，被擺回一道的我只好以顫抖的指尖為手中蝦肉沾了醬汁，如丟般投進對方口裡。「……滿意未？」
「非常滿意。」
「陣、陣間食完嘢想去邊？」以面紙擦拭指尖，我低頭避開對方直盯著這邊的視線。




「嘻嘻，你怕醜？」
「係呀！唔得呀？你就直頭係唔知醜添呀！四圍咁多人喺度！」
被罵的人先是無辜地眨了眨眼，然後看著我的臉噴笑了出來。失控的笑聲讓人氣上加氣，我狠狠地瞪了對方一眼，自暴自棄地把烤爐上的東西全都夾到自己那邊去，不給對方留下一點。