[GL] 重遇之後: 32—(1)

「嘩，我覺得個人好似仲係飄下飄下咁！呢程船明明只係搭咗十分鐘左右！」走在碼頭甲板上，Tracy似是覺得很有趣般，盯著自己的腳尖說道。
「哈哈，係呀。」
「個人暈暈地咁，睇嚟我要搵啲嘢扶住先可以行到落去！」旁邊的人誇張地將手臂擋在雙眼前，裝作一副快要倒下的模樣，順勢把身體靠過來，想要勾上我的手。
「哼，你只係想搵個藉口繑住我咋嘛？」
「梗係，難得有個可以親近你嘅藉口，我點會輕易放過。」語畢，她輕輕繞著我的手臂，瞇起雙眼，擺出一臉自信的樣子。
「你行開。」我笑著搖了搖頭，把另一隻手放在對方緊貼這邊的肩膊上，擺出想要推開她的姿勢。當然，我也只是做做樣子，不是真的想要讓她離開。
走過兩、三個前往不同目的地的碼頭，我們在一個面海的位置坐了下來。我放下乘船前買來，盛有台式飲品的塑膠袋，與跟我並肩而坐的人一起眺望被夜色染黑的海景。
Tracy閉上雙眼享受初夏晚風的吹拂，說：「夜咗有少少風吹埋嚟，無晏晝咁熱。」
「嗯。」
「嘻嘻，晏晝啲韓燒仲未落格，我仲覺得好飽。」




「我都係，所以今晚齋飲嘢都夠。」我笑了笑，瞄了一眼放在身旁的飲料。
「Jane，多謝你今日同我出嚟，我好開心。」旁邊女生對上我的眼睛，彎下雙眸甜笑道。
「你又嚟。」自從我們開始約會後，她都會像這般向我道謝。我雖然能夠理解她這樣做的原因，但這般態度，卻同時讓人感到納悶。「你次次出完街都同我講多謝，我覺得咁有啲生外喎。」
「我真係好珍惜每次同你一齊出嚟嘅機會，覺得呢啲時間好寶貴。」
「但係你都唔使成日講多謝，聽起嚟好似係你單方面求我，跟住我應承你咁。我唔係單單因為你約我先出嚟，我都係想同你出街所以先至……出。」
「嘻嘻，聽到你咁講，我好開心。」看到這邊稍微狼狽起來的神情，Tracy嘻嘻地笑了出來，然後又把視線投回平靜的海面，些許落寞地續道：「我而家可以咁同你一齊，真係覺得好開心。開心到……開始擔心，呢啲日子可能會有完結嘅一日。」
「你點解會咁諗？哦，你意思係你開始覺得厭，唔想再見到我。係咪？」
我故意作弄她說，對方聽到後連忙否定道：「唔係，我唔係咁嘅意思。我只係有時會喺度諗，而家嘅幸福會唔會有日突然無聲無色咁消失……越係開心，就越怕失去。」
「你係咪諗得太多？」
「可能鍾意一個人，就係會令到自己變得多愁善感。」




「哈哈，你有無咁鍾意我？」
她拿出放在透明袋裡的飲料，把吸管插進杯子，啜了一口後，又再看著前方說道：「我一直以為……自己呢份感情會以暗戀作結。」
對方的話，勾起前些日子跟Susan吃火鍋的回憶。
『會唔會由小學開始，對方就一直偷偷暗戀你……』
『點會無可能？你又無問過人哋！可能嗰時發生過啲事，你覺得無嘢，但就令到對方痴痴愛上你愛到今日呢？』
『真係想知嘅話，你咪下次問下人囉。你成日都自己得到估字，要勇敢啲先得㗎嘛！』
同事的神情語調，繪形繪聲地於腦海重現。眼前的女生，到底是從何時開始喜歡我呢？我一直都很想知道這道問題的答案，卻總是鼓不起勇氣問她。
此時，一陣微風吹來，透過輕撫肌膚的涼意，悄悄地朝我呢喃，此刻就是開口的時機。受了唆擺的我，突然感到一陣口乾舌燥。莫名地緊張起來的我搓了搓手，在內心稍作掙扎後，還是緩緩開口，以顫抖的聲線問道：
「Tracy，你……係幾時開始鍾意我？」