[GL] 重遇之後: 41

我發現自己比想像中大膽。
曾經以為，自己一輩子都沒可能跟別人表白心跡。
曾經以為，即使有了喜歡的人，也只能以單戀作結。
可是，當對的時機來臨，一切就如行雲流水般順利。
不敢說的話，也極其自然地從口中溜出。
『Tracy，你可唔可以……做我女朋友？』
一句說話，就只是一句說話，改變了我們之間的關係。
整個人覺得輕飄飄的。
我們真的在一起了嗎？
我們真的從朋友變成情侶了嗎？




真的嗎？
昨晚發生的一切，不會只是我的妄想吧？
「Jane！你印咁多份做咩！？快啲撳停佢！！！」
突然，背後有人大喊一聲，將我拉回現實。一隻手迅速從旁邊冒出，搶先在我作出反應前使力按下影印機的停止鍵。我瞄了一眼操作面板，才發現自己在影印份數的欄位多輸入了一個零。站在後面的人繞到身旁，氣急敗壞地嚷道：
「你搞乜嘢！係咪想下世做樹！？好在我咁啱經過見到咋！」
「……」
我只是呆呆愣愣地看著對方那張寫滿問號的臉，一語不發。被盯著的人把眉頭皺得更深，舉起右手在我面前搖了幾下。「喂，Jane，你聽唔聽到我講嘢？睇唔睇到我？喂喂？」
「……Susan，我有啲嘢想同你講。」
「你做乜揦埋口面？無嘢呀嘛？」
我依舊抿著一張嘴，也許是這張看起來神色凝重的臉惹起對方誤會，Susan緊張地咽了咽口水，屏息靜氣待我開口。

「我……」深呼吸了一口氣，我續道：「同Tracy喺埋咗一齊。」
「吓！？」她誇張地大喊一聲，眨了眨那雙睜得快要掉下來的眼珠子，然後興奮地抓著我的手腕笑道：「你哋兩個終於喺埋一齊嗱！？」
對方響亮的視線讓我倆頓時成為辦公室的焦點，我連忙把食指豎在嘴前，壓低聲線抱怨道：「噓！你係咪要話晒比全公司知！？」
對方不好意思地吐了吐舌，低聲說道：「Sorry！我太興奮，一時控制唔到！不過恭喜你呀，好戥你開心！」
「嗯、嗯，多謝……」我難為情地搔了搔後腦杓。
「你哋幾時開始㗎？快啲話我知！」
「噚晚……」
「噚晚！！！」旁邊的人又再失控地喊了出來，我怨恨地睨了一眼對方，以手肘撞了撞她的手臂。再次犯錯的人以手掩嘴，一臉尷尬的樣子：「Sorry！又係我把衰口！OKOK，我陣間lunchtime先慢慢聽你講！你唔好諗住走得甩呀！」
我沒理會只想聽八卦的同事，此時，剛才還笑得合不攏嘴的人突然嘆了一大口氣，苦著臉說道：「唉，同我最friend嘅同事而家都名花有主喇，幾時先輪到我！」
「……」




「Jane，你身邊有無好對象可以介紹下？」
「……」
「Jane？你有無聽我講嘢？」
「吓？你講咩話？」
「唉！無嘢，只係我自言自語啫！好喇，啲嘢印好啦！」
不得要領的反應令對方再度輕嘆了一口氣，她拿起印好的資料，邊把它們疊整齊邊說：
「你呀，好醒醒定定咪再發吽哣做錯嘢呀吓！暫時擺低兒女私情，諗少陣女朋友先得唔得？救到你一次，救唔到第二次㗎！」
接過Susan遞來的文件，我心不在焉地點了點頭。她沒好氣地搖了搖頭，拍拍我的肩膀，返回自己的座位。