【愛情】如地下情一樣嘅癮，係我對你嘅定義: 01. 秘密
「五分鐘！」
喺上堂鐘聲響起嘅五分鐘前，黎昕淇匆匆忙忙咁攬住一大疊簿落樓梯，手都扶唔切扶手
「快啲啦快啲啦要！」黎昕淇提手望一望手錶嘅時間，隨即加快咗腳步，「呀！」
佢嘅左腳踩到平地，右腳都未落到地，佢已經感覺到自己都趕唔切
本來用橡筋綁住嘅簿散落一地，黎昕淇下意識捉住扶手，但撞咗一下之後重心都撞走咗，直接向後坐，屁股先著地跌坐喺地上
「Sorry呀！」黎昕淇都冇時間去顧自己痛唔痛，直接就道歉然後迅速咁執晒喺地上嘅簿
「唔好意思。」對面嘅男仔彎低腰幫手執起散落嘅功課簿，「橡筋斷咗，你要唔要一條新嘅？」
「唔洗啦唔該！」黎昕淇都顧唔上橡筋嘅問題，執齊啲簿就即刻跑落樓梯去教員室
跑到簿櫃面前嘅佢即刻將疊簿放入簿櫃，然後轉身就跑番去課室，拉開櫈就坐低回一回氣
「交咗啦？」坐喺後面嘅宋楚妍有啲擔心咁望住喘緊氣嘅黎昕淇，「飲啖水先啦⋯」
「好⋯」黎昕淇邊喘氣邊拎起水樽飲啖水
「陣間係班主任堂，唔洗擔心！」宋楚妍講道，「慢慢回下氣先！」
黎昕淇微微點頭，要咁匆忙咁來回跑真係好攰，佢感覺到自己嘅手腳好似都接回到神，有啲冇力
「佢係唔係搵你？」宋楚妍拉一拉黎昕淇嘅手問，下巴向門口嗰邊抬一抬
「邊個？」黎昕淇輕皺起眉頭，扭實樽蓋望向門口
一個高大嘅男仔從門口行入嚟，不過唔係佢地班嘅同學，係隔離班嘅，佢一入嚟就即刻引起咗小騷動
「黎昕，你喺度就啱啦。」佢直接行到黎昕淇嘅座位，叫黎昕淇嘅暱稱，「想問下你，早幾日嘅會議紀錄喺邊？」
「我擺咗上drive。」黎昕淇回答，「喺學生會個drive度。」
「哦，我啱啱搵唔到，我再睇下。」陸修然帶住淺淺嘅微笑禮貌咁點一下頭，目光落喺黎昕淇嘅手上，「你隻手擦損咗，貼定塊膠布。」
「哦，我陣間貼。」黎昕淇微微點頭，「份會議紀錄你再睇下有冇，冇嘅話我再upload多次。」
「嗯，唔該。」陸修然微微點頭，然後就轉身行出課室
陸修然一走，宋楚妍即刻捉住黎昕淇嘅手將佢嚇咗一下
「會長果然係細心嘅人呀⋯！」宋楚妍帶住仰慕嘅眼神望向黎昕淇，「會長果然係顏值同性格都係10分⋯9分嘅人！」
「點解扣咗一分？」黎昕淇無奈咁問，「你講到佢咁完美。」
「人唔係神，唔可能咁十全十美，所以扣番一分。」宋楚妍帶住滿意嘅笑容輕嘆一口氣，「可能你日日都喺學生會同會長一齊做嘢，所以冇特別大感覺啦～」
顏值同性格都達到9分嘅學生會會長，陸修然，學校特別多女仔仰慕佢，大概係大家都係外貌協會嘅關係
「黎昕黎昕，你呢個做文書嘅可以成日同咁靚仔嘅會長一齊做嘢，感覺如何呀？」宋楚妍笑住問道
「冇咩特別感覺⋯」黎昕淇沉默咗一秒，扮思考咗一陣先回答，「就係，咁樣⋯？」
「吓⋯」宋楚妍一臉失望，「明明你地今屆學生會嘅成員顏值都咁高，你居然話冇咩特別感覺⋯」
今屆嘅學生會喺校內比同學稱為顏值最高嘅學生會內閣，特別係會長陸修然同副會長鍾安而，沉穩又可靠，有外表有實力
「可能真係因為成日一齊做嘢掛～」黎昕淇聳聳肩
⋯
放學之後
「我去會室，聽日見啦～」黎昕淇對宋楚妍講道，然後將唔帶嘅嘢都放晒入locker
「好啦，咁聽日見啦～」宋楚妍微微點頭就番埋位拎書包
黎昕淇孭住書包行到去學生會室嘅門口，喺門上敲兩下之後就推門入去，推門入去之後見到只有會長陸修然喺度，其他人都唔喺會室內
「你搵唔搵到？」黎昕淇一開門就問，因為陸修然坐咗喺電腦前面
黎昕淇估陸修然未搵到佢要嘅會議紀錄，放低書包喺一旁，正要行過去幫佢搵嘅時候，陸修然抬頭望向黎昕淇
「搵到啦。」陸修然微微點頭，望住黎昕淇將會室嘅門閂埋，「你做咩過嚟？」
「唔係你叫我過嚟？」黎昕淇回頭望一眼門口，然後輕皺起眉頭，有啲唔耐煩咁反問陸修然
明明啱啱就收到陸修然嘅message叫佢過嚟會室，宜家陸修然卻反問番佢到會室嘅原因
「哦，係呀。」陸修然嘅嘴角微微上揚，然後托住下巴又繼續睇電腦
「今日開會但其他人呢？」黎昕淇行到離電腦枱最近嘅木枱，靠住枱邊坐，喺裙袋拎出手機，「你冇喺group同佢地講要開會？」
「我冇話今日要開會。」坐喺電腦前嘅陸修然淡然咁回答
「吓⋯咁你叫我過嚟，但又唔係開會⋯」黎昕淇又皺一下眉頭，一下就企起身轉身就要走，「我番去啦咁。」
「等多一陣。」陸修然第一時間伸手拉住黎昕淇嘅手腕，「陣間一齊番去。」
黎昕淇因為拉扯感而停喺原地，佢望咗陸修然一眼，心入面已經大概知道陸修然叫佢過嚟嘅原因
「你係想一齊番去所以特登叫我過嚟？」黎昕淇垂眸望住自己嘅手腕
陸修然冇回答，只係默默咁閂咗電腦然後起身，轉身向後坐喺木枱嘅枱邊同時，將黎昕淇拉到自己嘅面前
「唔係好明顯咩⋯？」陸修然嘅手仍然捉住黎昕淇嘅手腕，湊近之後柔軟嘅觸感落喺唇上
IG Link: https://www.instagram.com/nd_cotttoncandy/?hl=zh-tw