【愛情】如地下情一樣嘅癮，係我對你嘅定義: 02. 保持距離

「陸修然，講咗喺學校唔可以⋯！」黎昕淇嘅第一反應係望向會室嘅門口

「係係⋯」陸修然企起身，本來同黎昕淇差唔多高，但一企起身即刻比黎昕淇高咗一個頭

「睇下手，有冇嘢？」陸修然直接捉起黎昕淇嘅手，手心仍然有啲紅，「成個人撞落嚟，都唔睇路。」

「趕時間交嘢。」黎昕淇望住自己嘅手心，佢今日撞到嘅人就係陸修然，「番去啦。」

黎昕淇轉身行去拎書包，陸修然孭起書包，行喺前面去開門，黎昕淇面不紅心不跳咁行喺陸修然嘅身後





「鎖門呀。」黎昕淇提醒陸修然，企喺同陸修然相距三步嘅地方

黎昕淇同陸修然都係一齊走，兩人之間保留一隻手掌嘅距離，睇起嚟疏遠又唔熟

「你洗唔洗食嘢？」陸修然問黎昕淇

「要。」黎昕淇回答，「我餓咗好耐啦。」

「Sorry，不過⋯」陸修然平靜咁講咗一句冇悔意嘅對唔住，然後低聲講出後半句：「唔係咁樣冇辦法有理由一齊走。」





「下次屋企樓下等。」黎昕淇淡然回答，「喺學校唔好行咁近，會長。」

「喺學校已經行得好遠⋯」陸修然無奈咁講

「我搵到男朋友嘅話一定唔理你。」黎昕淇回答

「咁你搵到未？」陸修然反問道，黎昕淇喺心入面忍唔住反個白眼

「好明顯未，我搵到嘅話實同你講。」黎昕淇輕哼一聲





黎昕淇都唔太清楚點解佢同陸修然嘅關係變得咁奇怪，本來嘅關係都幾單純，只係因為屋企嘅關係所以成為朋友嘅朋友

但宜家佢地係朋友，但又唔止係朋友，亦唔算曖昧，更加唔係男女朋友⋯複雜到黎昕淇嘅大腦都唔想去思考嘅關係

喺學校盡量保持距離，但佢地之間有學生會作為橋樑，無可避免要接觸；既然會接觸到，就盡量睇起嚟唔好咁熟，畢竟私下嘅事，冇人知⋯

「唉⋯煩呀。」黎昕淇喺心入面抱怨，「算啦，由得佢⋯」

⋯

小息

黎昕淇拎住一疊釘好嘅紙行到課室門口，抬頭望一眼班房嘅門牌確定行啱課室之後，直接就邁步行入去

一直行到鍾安而嘅座位先停落嚟：「副會長早晨，上星期會長話交比你嗰份計劃書，樂時搞掂啦，叫我順手幫佢交～」





「唔該。」鍾安而伸手接過對方手上嘅釘裝紙，掀咗兩掀，「又要特登交比你再交比我再交比佢，擺會室咪得⋯」

「冇計啦，會長佢話比副會長你先嘛，話你朝早會早過佢番嚟，樂時話嚟緊嘅活動都大概plan好㗎啦。」黎昕淇微笑道

「好，我晏啲見到佢就比佢啦⋯」鍾安而無奈咁點頭

「另外，上星期嘅會議紀錄已經放咗上SU嘅drive。」黎昕淇提醒道，「樂時嘅活動計劃副本都放咗上去，叫我同你講聲。」

「佢有同我講。」鍾安而露出禮貌嘅微笑，「麻煩你啦。」

「唔麻煩，咁我番去先啦～」黎昕淇笑着搖頭，微微點一下頭之後就轉身走

黎昕淇行出課室嘅時候回頭望咗一眼，本來就已經有啲崇拜副會長嘅佢，宜家更崇拜多幾分





鍾安而同鍾樂時兩兄妹都係學生會成員都算，仲要都係品學兼優嘅人，一個沉穩可靠，一個活潑開朗，兩兄妹完美到唔似人

所以，雖然陸修然同鍾安而都有人仰慕，但黎昕淇傾向鍾安而嗰邊多啲，因為佢太清楚大家仰慕嘅會長實際上同大家想像中嘅落差

⋯

「所以，大概嘅活動方向都定落嚟啦。」陸修然手上拎住鍾樂時托黎昕淇比鍾安而再比佢嘅活動計劃

「其實都冇咩要再執，睇你。」鍾安而坐喺左邊嘅位置打開飯盒，「再執嘅話同樂時講聲。」

「嗯，我諗大概都Okay，比Miss Chung再睇下有冇咩大問題要改。」陸修然將活動計劃放到一邊，拎出啱啱喺樓下小食部買嘅飯團

黎昕淇推開學生會室嘅門，一打開門就見到兩個人坐喺度食緊飯

「睇下，黎昕到啦。」陸修然慢悠悠咁拆開飯團嘅包裝





「你兩個都喺度呀？食飯就開窗啦⋯」黎昕淇直接行到窗前，將玻璃窗向外推開少少

「你食完飯啦？」陸修然問

「未呀，特登過嚟食飯。」黎昕淇打開飯盒，平時佢都係自己帶飯番嚟食，「副會長你食緊咩呀？」

黎昕淇一眼就望到鍾安而食嘅嘢，即刻好奇咁問鍾安而

「樓下買嘅嘅瑞士雞翼配白飯。」鍾安而講道

「睇起嚟好好食！」黎昕淇即刻讚道

「你自己帶嘅飯仲好食啦⋯」鍾安而無奈一笑





「我可以同你交換㗎～」「黎昕。」

「做咩？」黎昕淇望向忽然叫佢嘅陸修然，「叫我做咩？」

「份活動計劃我交去比Miss Chung㗎啦，樂時佢仲冇嘢要改啦嘛？」陸修然拎住份活動計劃問黎昕淇

「冇啦⋯都係幫佢睇多次先。」黎昕淇放低匙羹起身行到陸修然嘅身旁將計劃書放到枱上睇，「副會長唔係話冇咩，你覺得okay嘅話可以交㗎啦～」

「好呀。」陸修然將活動計劃放好，等放學交落去比Miss Chung

黎昕淇坐番埋位，啱啱想食一啖飯，陸修然又開口：「黎昕。」

「嗯？」黎昕淇睇起嚟平靜，實際上一秒就煩躁起嚟




IG Link: https://www.instagram.com/nd_cotttoncandy/?hl=zh-tw