【愛情】如地下情一樣嘅癮，係我對你嘅定義: 05. 「地下情」
「邊個影到呢啲相咁勁⋯！？」宋楚妍震驚咁張開口，㩒停story認真睇，「唔通會長私下有女朋友⋯？」
「我影到⋯」黎昕淇喺心入面無奈咁講咗句，陸修然呢個caption都係寫嚟比佢睇，「佢係唔係想引人懷疑⋯」
「你覺得呢？」宋楚妍一手捉住黎昕淇嘅手，黎昕淇頓時回神望過去，「你覺得會長係唔係有個女朋友？地下情？」
黎昕淇心臟一縮，比宋楚妍咁樣一講都會莫名心虛，胸口一直突突跳動，黎昕淇即刻調整坐姿，挺直腰背坐好
「唔⋯好難講⋯」黎昕淇唔知要點樣答，佢怕陣間講完引人懷疑佢，「係唔係你諗多咗？」
「都啱嘅，地下情喺學校好難隱瞞，多數都會比人發現。」宋楚妍諗一諗都覺得有道理，「唔知佢女朋友係邊個呢～」
「有冇一種可能唔係佢女朋友⋯？」黎昕淇心入面希望宋楚妍唔好再思考落去，「唔好諗諗下諗到落我度⋯」
「不過如果係地下情嘅話都可以理解嘅～畢竟應該冇人想比人當成公敵。」宋楚妍仍然停留喺同一個問題上，黎昕淇有啲坐立不安
「都⋯係嘅。」黎昕淇小心翼翼咁點頭
「你真係，對會長一啲興趣都冇。」宋楚妍探頭望黎昕淇，黎昕淇嘅反應由頭到尾都好平淡，「不過你中意副會長多啲嘛～」
「嗯⋯還好啦⋯」黎昕淇保持住平淡嘅態度微微點頭，「我又唔叫中意副會長嘅，唔係嗰種中意。」
「你會唔會好似會長咁偷偷拍拖唔同我講㗎？如果會嘅話我會嬲㗎！」宋楚妍輕皺起眉頭，撅起嘴提醒黎昕淇
「咁快就肯定會長係拍拖啦？朋友唔得嘅。」黎昕淇無奈咁笑道
「咁呢個朋友都太親近啦掛，可以入到會長間房～」宋楚妍開啟咗戀愛雷達之後一發不可收拾
「又冇人話一定係女仔，可以係男仔掛？」黎昕淇更無奈，「你個戀愛雷達收番起先好唔好⋯？」
「唉，你啲雷達偵測咁弱，人地中意你都察覺唔到啦！幾時先等到你拍拖？」宋楚妍嘆氣道，「好想知道同會長咁親近嘅係邊個～」
「唔知道。」黎昕淇搖搖頭，望一望宋楚妍又喺心入面嘆氣：「陣間比楚妍知道，佢應該真係會嬲⋯」
兩人一落車就見到行喺前面嘅陸修然，宋楚妍即刻拉住黎昕淇
「你想知嘅話不如上前問佢。」黎昕淇喺宋楚妍開口前先一步提議，但心入面同佢講嘅嘢正好相反，「唔洗喺度估估下。」
「你喺學生會可以成日見到佢，不如你去問，問完話我知⋯！」宋楚妍提議番比黎昕淇
「唔要，我又唔想知。」黎昕淇搖頭拒絕，心入面又道：「我去問嘅話咪好似賊喊捉賊⋯」
宋楚妍番到學校就直接番課室，黎昕淇就去一轉小食部買早餐，一行到小食部嘅門口就見到陸修然都買緊早餐
「早晨。」陸修然嘅餘光見到黎昕淇行到佢隔離就講咗一句
「早晨。」黎昕淇低聲講咗一句，然後擰轉頭望一眼身後嘅小食部，確認只有佢同陸修然之後細聲問道：「你做咩po咗嗰張相？」
「順手。」陸修然低聲講道，「連我po個story都唔得啦？」
「你咁多嘢唔po做咩po我影嗰張？」黎昕淇壓住聲線，但仍然聽得出佢嘅不滿，佢係嚟抱怨陸修然
「咁唔通po我地屋企一齊食飯？」陸修然拎起枱上嘅餐蛋治反問黎昕淇，「你唔係唔想比人知咩？」
「嗯⋯」黎昕淇低聲回答，「唔想比人知，比人知嘅話，感覺會好麻煩⋯」
「你唔認嘅話，人地講咩都係冇用；畢竟流言蜚語嘅嘢，你愈阻止，人地愈講得繪形繪聲。」陸修然比完錢轉身準備走嘅時候講道，「我地本來又唔係唔見得光嘅關係。」
「的確。」黎昕淇低聲回答，佢認同陸修然講嘅嘢，但冇講出口嘅後半句係「我想避免麻煩。」
企喺收銀機前收錢嘅阿姨一副聽到驚天大秘密一樣嘅表情，呢段對話聽起嚟唔係同地下情一樣咩？
黎昕淇買多份三文治就番課室，番到課室有啲怕宋楚妍又要問一啲佢好驚答多答錯嘅問題
「唉⋯」黎昕淇嘆一口氣
「你仲未飽咩？」宋楚妍轉身，望到黎昕淇抬上嘅三文治
「仲想食嘢⋯」黎昕淇一臉疲倦咁拎起三角形嘅盒掀開蓋，「唉⋯點解就咁肚餓⋯」
「早晨呀。」江清懿行入課室將書包放喺黎昕淇隔離嘅座位
「早⋯」食緊三文治嘅黎昕淇抬頭望江清懿一眼
江清懿開完locker番埋位坐，喺櫃桶拎咗粒牛奶糖遞比黎昕淇：「食唔食？喺櫃桶拎㗎。」
「喺櫃桶拎⋯？擺咗好耐㗎？」黎昕淇本來都伸手接，但聽到江清懿嘅後半句就有啲卻步
「我今朝買㗎！咩擺咗好耐⋯」江清懿反咗個白眼，然後伸手將糖放喺黎昕淇嘅枱上面
「見你話喺櫃桶拎出嚟嘛。」黎昕淇將糖放喺筆袋隔離，「多謝。」
「下個星期嘅更你報咗未？」江清懿向住黎昕淇嘅方向坐，打開佢地番工嘅group
江清懿同黎昕淇一樣都係喺炸雞店番緊part time，好多時番工都會撞到，所以多數都會睇下對方報咩更番工先再報自己嘅
「我未呀，你都未報啦唔係咩？」黎昕淇將group嘅對話拉上去，都冇見到江清懿報嘅更
「我諗住睇下你報咩先嘛。」江清懿笑道
「我都係諗住睇下你報咩更先！」黎昕淇聽到之後即刻笑起嚟，「不過我都係番星期六㗎啦，星期日用嚟休息。」
「你快啲send咗更上group先。」江清懿望住手機講道
「有咩分別⋯」黎昕淇雖然無奈，但都係拎起手機喺group打咗自己下個星期報嘅更
黎昕淇嘅更啱啱send出嚟，下一秒江清懿都將佢嘅更send出嚟，睇起嚟同直接複製貼上冇分別
「同我啱啱send嘅有咩分別？」黎昕淇無語咁問
IG Link: https://www.instagram.com/nd_cotttoncandy/?hl=zh-tw