【愛情】如地下情一樣嘅癮，係我對你嘅定義: 06. 輕吻
「冇，番工有個伴幾好呀，唔洗咁悶。」江清懿講道，「今個星期六你係唔係要番工？」
「你唔係咩？」黎昕淇收起手機，蓋番三文治盒嘅蓋，慵懶咁伏低喺枱，頭枕喺左手嘅手臂上
「我係呀。」江清懿回答，黎昕淇第三次覺得無奈
「呢個人係淨係睇自己嘅更？都唔睇下有邊個同佢番同一日？」黎昕淇喺心入面發出一個疑問
「喂，江清懿，你支筆。」宋楚妍彎腰執起地下嘅筆，擰轉身擺到江清懿嘅枱面
「幾時跌咗落去？」江清懿望住筆問，「你又知係我嘅？」
「你平時都係用呢支唔係咩？」宋楚妍反咗個白眼，嫌棄咁講道
「咁你都發現到？」江清懿笑問
「之前你坐我前面咋先生⋯」宋楚妍無奈咁講，「你日日都拎住呢支筆，我呢啲觀察力咁強嘅人好難睇唔到。」
「咁都比到機會你自己讚自己⋯？」江清懿比宋楚妍講嘅嘢搞到無言以對，「厲害⋯」
「多謝。」宋楚妍嘅面皮都唔薄，「你星期六番緊炸雞店係唔係？」
「你又知嘅？你點解咩都知？」江清懿感到震驚，「你想番咩？」
「黎昕話我知㗎⋯」宋楚妍講道，「唔好講到好似我想知你嘅嘢咁⋯」
「你係唔係諗多咗啲咩⋯？」江清懿輕皺起眉頭，到佢有啲嫌棄咁望住宋楚妍，「我咩都冇講，你自己諗太多咋。」
黎昕淇聽住宋楚妍同江清懿嘅對話，對佢嚟講都算係佢無聊嘅日常嘅一絲小樂趣，如果日日番學都係上堂然後等放學嘅話，咁讀書嘅日子中就失去咗好多讀書時期先有嘅快樂
⋯
食完午飯番到學校嘅時候，黎昕淇番課室放低佢要擺低嘅嘢嘅之後就去咗會室
「你又度睇手機。」一打開會室嘅門就見到陸修然坐喺會室嘅角落睇手機
「冇嘢做，課室太嘈。」陸修然將佢隔離嘅櫈拉開，「而且呢度有轉轉櫈坐，坐得舒服啲。」
黎昕淇行到陸修然拉開嘅櫈前坐低，然後打開放喺枱上嘅手提電腦，喺文件檔入面打番前日嘅會議紀錄
「你宜家先打番？」陸修然坐住電腦椅，連人帶櫈移到黎昕淇隔離
「嗯，琴晚冇做到。」黎昕淇平淡咁回應，「好攰，星期六番工⋯」
「唔番。」陸修然比咗一個直接嘅解決方法
陸修然坐嘅櫈貼住黎昕淇坐嘅櫈，陸修然嘅右手搭住喺黎昕淇嘅櫈背上面，指尖輕撩起黎昕淇嘅髮尾；黎昕淇感覺到陸修然玩緊自己嘅頭髮，但係佢冇理會，指尖輕敲喺鍵盤上
黎昕淇嘅手機解咗鎖就放喺手邊，望一眼佢喺手機記錄咗嘅會議內容，然後又望住電腦螢幕打字
「你個friend send嘢比你，片嚟。」本來睇緊黎昕淇打嘅會議內容嘅陸修然，睇到一半見到宋楚妍send比黎昕淇嘅message
陸修然好快手幫黎昕淇㩒咗入去宋楚妍嘅message，影片自動播放，都係啲著西裝嘅靚仔，果然係宋楚妍嘅作風
陸修然望住播緊嘅片輕皺起眉頭，然後又望一眼黎昕淇睇下佢嘅反應
「係佢中意，happy sharing。」黎昕淇冷靜咁將頁面轉番去佢嘅備忘錄，淡然咁解釋咗一句
「嗯。」陸修然微微點頭，黎昕淇望咗陸修然一眼，佢覺得陸修然呢個回答係質疑緊佢，「嗯？」
「冇。」黎昕淇定睛望住陸修然，陸修然伸手托起黎昕淇嘅下巴，黎昕淇即刻輕皺起眉頭，「陣間有人入嚟。」
「你搽咗唇膏？」陸修然嘅目光落喺黎昕淇嘅唇上，嘴唇有少少反光
「潤唇膏。」黎昕淇輕抿唇一下
「叩叩—」敲門聲忽然傳嚟，陸修然同黎昕淇即時分開，陸修然番到去佢本來坐緊嘅角落睇手機，就好似冇事發生一樣
「得你地咋？」推門嘅係負責學校活動嘅鍾樂時，身後係負責校外福利嘅張詩楠
「你搵人？」坐喺電腦前嘅黎昕淇望向門口
「我嚟搵鍾安而，我仲以為哥哥喺度添～」鍾樂時扁起嘴講道
「副會長冇嚟過，我諗佢應該喺課室。」黎昕淇微笑道
「哦，咁好啦～」鍾樂時笑一笑，「咁我去課室搵佢啦～拜拜～」
「咔。」鍾樂時將會室嘅門閂上，同張詩楠一齊去咗鍾安而所在嘅課室嘅樓層，會室內又一次只係得番陸修然同黎昕淇
「我都話會有人入嚟⋯」黎昕淇輕嘆一口氣講道
「你怕人地講嘅話，你應該唔好同我單獨一齊。」陸修然又坐番去黎昕淇隔離
「我真係要做嘢。」黎昕淇對陸修然直接反咗個白眼，喺其他人面前嘅話佢一定唔會有呢個反應
喺打鐘前10分鐘，黎昕淇已經做晒成份會議紀錄，然後閂電腦準備番課室
「我走啦，轉頭你記得鎖門。」黎昕淇行到會室嘅門前嘅時候再提陸修然一次
「嗯。」打算幫黎昕淇開門嘅陸修然頷首示意知道，「放學見。」
「嗯。」黎昕淇本來側身企，打算伸手去開門，但見到一隻戴住皮質手錶嘅手捉住咗門柄，「會長，你仲比唔比人開門走？」
黎昕淇望向陸修然，本來陸修然只係想幫佢開門，但黎昕淇咁樣一問，陸修然又唔係淨係想幫佢開門咁簡單
喺安靜落嚟嘅瞬間，口乾舌燥嘅感覺忽然冒出，喺唔適當嘅時候出現唔適當嘅感覺，所以話「癮」呢回事真係⋯好麻煩⋯
黎昕淇捉住陸修然嘅校呔，喺佢稍微用力將陸修然向自己拉嘅同時，黎昕淇微微踮起腳尖，準確無誤咁喺唇上輕吻一下
「會長，我可以番去未？」黎昕淇鬆開陸修然嘅呔，細聲問道
「嗯，番去啦。」陸修然扭動門鎖打開門，黎昕淇直接頭也不回咁番去課室
潤唇膏嘅質感，由黎昕淇嘅唇上分咗啲比陸修然，陸修然輕抿唇，決定留多五分鐘先番課室
IG Link: https://www.instagram.com/nd_cotttoncandy/?hl=zh-tw