【愛情】如地下情一樣嘅癮，係我對你嘅定義: 09. 習以為常

黎昕淇望咗陸修然一眼，陸修然默默咁伸出手，要盡量表現得平靜，唔可以有任何異樣嘅表現；黎昕淇伸手捉住陸修然嘅前臂

「你捉實我唔好比我跌⋯！」黎昕淇喺陸修然拉住佢遠離宋楚妍佢地之後低聲講道，佢喺陸修然嘅面前明顯緊張好多，用力咁捉住陸修然嘅前臂

「唔會。」陸修然拉住黎昕淇向後行，行嘅速度都遷就咗黎昕淇，「但你都要行㗎⋯靠我拉住你點學？」

「你行慢啲⋯！」黎昕淇緊張咁講道，手心都出緊汗

「我已經行得好慢⋯」陸修然更無奈，再行慢啲佢真係以龜速嚟行，「你踏步行啦，我扶住你，你唔會跌。」





「我驚呀⋯！」黎昕淇好努力咁想踏出一步，但因為怕跌所以一直企喺原地唔郁，陸修然唔行佢就唔郁

「你唔係好勇敢㗎咩小辣椒⋯」陸修然望住黎昕淇罕有嘅一面，忍唔住窒佢一下

「喂呀⋯！等我兩秒，做好心理準備先⋯！」黎昕淇企定咗之後深呼吸，「我真係行㗎啦⋯！你真係捉實我⋯！」

「知啦⋯」陸修然無奈咁點頭，耷低頭望住黎昕淇真係鼓起勇氣向前行嘅時候，陸修然一步一步慢慢向後移動

行咗幾步之後黎昕淇感覺唔錯，感覺自己其實都可以做到，信心又大咗啲嘅佢又再踏大步啲，再行幾步就發現宋楚妍突然出現喺度陸修然身後





「楚妍喺後面⋯！」黎昕淇用力捏咗陸修然嘅手一下

陸修然擰轉頭望一眼，佢同宋楚妍差一個人嘅身位就要撞到，陸修然即刻剎掣停落嚟

「呀⋯！」黎昕淇未剎得切掣，直接撞上去陸修然度

陸修然反應好快，左手即刻鬆手，由黎昕淇嘅手腕迅速移到手踭將佢放穩陣咁扶住，好彩嘅係黎昕淇都企得穩；黎昕淇探頭望一眼宋楚妍嘅位置，宋楚妍望咗兩人一眼，對黎昕淇側側頭笑一笑

喺再玩咗一陣之後，三個女仔坐咗喺場邊嘅長櫈上，由得幾個男仔自己玩，黎昕淇雙腿伸手，手放喺膝頭上，目光落喺仍然喺場上嘅陸修然身上





「幾時學識㗎⋯？」黎昕淇望住行得流暢嘅陸修然喺心入面講道，「之前都冇聽佢講過⋯」

明明一齊長大應該會知道好多關於對方嘅事，但係黎昕淇忽然覺得自己其實都唔太了解陸修然，有時佢地真係好似陌生人一樣疏離，有時又會變番熟悉親近

「黎昕係副會長嗰派㗎，佢對會長冇咩興趣⋯」宋楚妍嫌棄咁指一指黎昕淇，「佢係零興趣。」

「居然？」鄭洛苡有啲意外咁瞪大眼，「但係，我聽好多人講都話覺得佢同會長好襯⋯」

「我同陸修然先唔襯⋯」喺一邊聽住佢地傾計內容嘅黎昕淇喺心裏默默講道

「你同副會長同班係唔係？」宋楚妍問道

「哦，係呀～周晟祐都係我地嗰班。」鄭洛苡微笑着點頭

講嘢嘅時候溫柔，睇起嚟乖巧伶俐，同鍾安而散發住同一種氣質；鄭洛苡嘅視線落喺同江清懿企埋一齊嘅鍾安而身上，由佢望向佢嘅眼神可以察覺到絕對唔係一般嘅仰慕咁簡單⋯





「唉～好想搵個男朋友呀⋯」黎昕淇雙手㩒住喺櫈邊，頭向上仰身向後靠，「唔可能一直都係呢種⋯唔知點形容嘅關係⋯」

喺黃昏嘅時候，大家都各自番屋企，星期一番學先再見面，江清懿一手就搭喺黎昕淇嘅膊頭上，嚇咗黎昕淇一跳

「聽日番工見啦～」江清懿耷低頭對黎昕淇講道

「聽日見。」黎昕淇點點頭

大家搭地鐵番屋企，黎昕淇同陸修然喺同一站落車，喺列車閂門開車之前，兩人仍然保持住一隻手掌嘅距離；車門一閂車一開，兩人同時轉身走，保持距離呢件事又消失殆盡

「原來先5點。」黎昕淇提手望一眼手錶，「肚餓。」

「買嘢番去食。」陸修然嘅目光落喺黎昕淇嘅手錶上，「今日做咩戴呢隻手錶？」





「好耐冇戴。」黎昕淇嘅指尖輕撫過錶面，下一秒提手就撥陸修然嘅頭髮，「頭髮好亂。」

陸修然由得黎昕淇用自己隨身攜帶嘅小梳幫佢梳頭，有時陸修然都幾無奈，因為對於保持距離嘅定義太模糊，喺學校要保持距離，好似陌生人一樣，但放學之後又唔需要啦⋯？

「食咩？」陸修然問

「唔知。」黎昕淇有啲攰咁講道，「想食炸雞，突然間。」

「食囉。」陸修然爽快咁答應

買完嘢食𨋢番上樓，黎昕淇其實就住喺陸修然樓下兩層，所以番屋企嘅距離都好近，兩人安靜咁企喺𨋢嘅一邊，腰貼住一邊嘅扶手

「好眼瞓。」黎昕淇微微耷低頭，額角靠咗喺陸修然嘅膊頭上

「食完嘢番樓下瞓。」陸修然直視前方，從對面嘅鏡望佢身邊嘅黎昕淇





「嗯⋯」黎昕淇冇靈魂一樣頹廢點頭，「食完就番去瞓⋯」

陸修然行喺前面開門，黎昕淇跟喺後面；陸修然將外賣炸雞放喺梳化同電視之間嘅茶几上，黎昕淇洗完手就坐低喺梳化，手打開膠袋將佢嘅炸雞們一盒一盒放喺枱

黎昕淇拎起電視遙控開電視，陸修然開咗放喺一旁嘅風扇，然後拎起薯蓉放到黎昕淇嘅面前，黎昕淇將放喺自己面前嘅蘑菇飯放到陸修然面前之前，先打開蓋將蘑菇都拮到自己嘅薯蓉面上

「乞嗤⋯！」黎昕淇啱啱拎起膠匙羹，都未食到薯蓉就耷低頭打咗個乞嗤，然後又再打多個，「乞嗤⋯！」

陸修然行入房拎起搭喺電腦椅上嘅外套，然後放喺黎昕淇嘅大髀上面蓋住；黎昕淇放低薯蓉，拎起外套著喺身上

食完嘢之後，黎昕淇坐喺梳化，陸修然去掉垃圾；黎昕淇坐下坐下就合埋眼，今日出去玩咗一個下晝都已經好攰，陸修然放輕動作坐低喺梳化上面，黎昕淇眉頭一皺，往陸修然嘅膊頭靠

陸修然拎起電視遙控，將電視嘅音量較細，由得黎昕淇瞓；兩人冇過多嘅交談，只係靜靜地喺對方旁邊





「轉頭先叫醒佢都唔遲。」陸修然小動作咁轉頭望黎昕淇一眼，人又挺直眼坐起咗啲，等黎昕淇靠得舒服啲




IG Link: https://www.instagram.com/nd_cotttoncandy/?hl=zh-tw