【愛情】如地下情一樣嘅癮，係我對你嘅定義: 08. 邀請
「Okay啦，又冇特別想去嘅，不過係有少少興趣。」黎昕淇微微點頭，「做咩？你去？」
「你唔係想玩咩？我識人喺嗰度做，可以平啲，叫埋宋楚妍去囉～」江清懿提議
「叫楚妍呀？冇靚仔佢唔去㗎⋯」黎昕淇搖搖頭
「咁呀，我睇下叫唔叫到鍾安而去囉～」江清懿一副得意嘅模樣，未問已經講到好似成功叫到人一樣
「楚妍可能會去。」黎昕淇微微點頭，覺得成功叫到宋楚妍嘅機率大大提高
⋯
放學之後嘅會室
今日唔係開會嘅日子，不過大家似乎中意留喺會室做下功課再打發下時間
「Roller？」鍾安而坐低嘅時候，咁啱見到黎昕淇睇緊嘅嘢
「嗯，諗緊去唔去。」黎昕淇有啲苦惱咁微笑對鍾安而道，「睇咗幾日㗎啦⋯」
「想去咪去玩下囉，都冇咩唔好。」鍾安而拎咗份功課擺喺枱面，拎起筆就準備做功課
「你去唔去呀？江清懿有冇問你？」黎昕淇見鍾安而咁樣講就順口問道，「佢今朝話問下你去唔去。」
「佢冇問我，可能諗住番到屋企先問。」鍾安而搖搖頭，不過佢都估到江清懿未問佢嘅原因
「哦⋯咁副會長你去唔去呀？」黎昕淇好奇咁追問，叫到副會長去，叫到宋楚妍嘅機會又大啲
「都可以。」鍾安而諗咗一陣之後點頭，鍾安而拎起書包左搵搵右搵搵，然後企起身，「我番課室拎番本書先。」
鍾安而講完就行出會室，黎昕淇趁會室冇其他人就望向陸修然：「你去唔去？踩Roller。」
「仲以為你唔問我添。」一直專心做功課嘅陸修然抬起頭，淡然咁講咗一句
「宜咪問緊你囉！」黎昕淇輕哼一聲，啱啱喺副會長面前嘅溫文模樣一秒消失，「當住副會長嘅面我唔好意思問你嘛！」
「當住我面問鍾安而就唔會唔好意思？」陸修然比黎昕淇嘅邏輯震撼到，臉上都寫住難以理解四個字，「次序係唔係應該調一調？」
「咁你去唔去？」黎昕淇直接了當咁問重點，「不過未約實時間。」
「既然你誠心問我，咁我去。」陸修然微微頷首，黎昕淇滿臉無奈
⋯
星期五嘅啱啱好係學校假期，佢地就約好喺呢日出嚟玩
喺預定時間到達嘅嘅前五分鐘，宋楚妍興奮咁拉住黎昕淇嚟到，一嚟到地鐵站出口就見到江清懿同鍾安而
「江清懿真係好叻仔⋯！」宋楚妍即刻捉住黎昕淇興奮咁講道，「連副會長都叫到出嚟⋯！」
「嗨～」江清懿見到迎面而嚟嘅宋楚妍同黎昕淇，「大家都好早，再等陣，未齊人。」
等多一陣之後，陸修然都嚟到，宋楚妍用力咁捉住黎昕淇嘅手表達佢嘅激動；陸修然好自動自覺行到鍾安而隔離，同黎昕淇保持距離，兩人對望咗一眼，又默契咁將視線移開
「咦，你同會長隻手錶一樣嘅？情侶裝？」宋楚妍捉起黎昕淇嘅手，指住黎昕淇手腕上嘅手錶低聲笑問道
「我同你個袋都係同款，我地係唔係情侶裝⋯？」黎昕淇無奈咁問道，不過手錶同款係事實，睇起嚟係真係幾似情侶裝，所以平時黎昕淇番學都唔會戴呢隻手錶
「仲有邊個嚟？」鍾安而問江清懿
「我叫咗⋯到啦。」江清懿正想答鍾安而，就見到鄭洛苡同周晟祐行到上嚟，「到啦～嗨～齊人啦！」
「嗨～」鄭洛苡同大家打招呼，睇起嚟完全係一副乖巧嘅模樣
「我係唔係做得好好？」江清懿咬住牙低聲咁對鍾安而講道，避免人地從佢嘅口型睇到佢講咩，「識得叫鄭洛苡過嚟，仲叫咗你個friend過嚟打掩護。」
「番去叫阿姨煮多隻雞髀比你食。」鍾安而撇開臉同時低聲回答
鄭洛苡同鍾安而同班，兩個人見到面嘅時候嘅尷尬感，宋楚妍都睇喺眼裏面，即刻就估到兩個人之間有啲內情，今日又係得到咗新情報嘅一日
到咗之後，江清懿一次過拎咗三對鞋過去比三個女仔，至少睇起嚟係一個好嘅舉動
今日係平日，呢個鐘數可以話係包場嘅時間，鄭洛苡行到同佢比較熟嘅宋楚妍身邊
「楚妍識唔識踩roller？」鄭洛苡企喺場邊問道
「識識地？但其實都唔太穩。」宋楚妍講道
「你地仲企喺度做咩？」江清懿行到過嚟，企喺三個女仔身後問道，「唔行入去？」
「我地都唔識。」宋楚妍回頭對江清懿講道，黎昕淇痴住喺宋楚妍身邊
「哦。」江清懿微微點頭，然後一手拉住喺佢身邊行過嘅鍾安而，「三個都唔識，你帶一個？」
「吓⋯？」鍾安而一時半刻未反應過嚟，喺佢想再講啲咩嘅時候，江清懿行到場內，一手托住宋楚妍嘅手腕，一手托住黎昕淇嘅手腕
「洛苡就麻煩你啦～」江清懿100%係特登，拉住宋楚妍同黎昕淇即刻遠離場邊
「江清懿！慢啲慢啲！」宋楚妍比江清懿拉住向前，「太快啦！」
「江清懿等陣呀！」黎昕淇笑住嗌道，「要飛出去啦！喂！」
江清懿見自己好似行得太快，即刻就將速度減慢落嚟，拉住兩個女仔到入場口嘅對面
「你行咁快，心都要飛出嚟啦⋯！」黎昕淇捉住扶手
「會長嚟啦會長嚟啦。」江清懿見到陸修然同周晟祐過緊嚟，「你地猜包剪揼啦，跟會長同周晟祐去玩啦，佢地好明顯識踩。」
「贏咗就跟會長去⋯！」宋楚妍講道，然後伸出手準備好，「包、剪、揼！」
「呃。」黎昕淇望住自己出嘅剪同宋楚妍出嘅包，佢贏咗
黎昕淇帶住少許心虛嘅眼神望向企喺佢隔離嘅陸修然，心入面有種莫名嘅心虛
「你去啦！」宋楚妍講道
IG Link: https://www.instagram.com/nd_cotttoncandy/?hl=zh-tw