【愛情】如地下情一樣嘅癮，係我對你嘅定義: 12. 痕跡

最近，一直都係雨天，每一日起身都可以聽到滴滴答答嘅雨聲

陸修然坐起身嘅時候，外面嘅天空烏雲密蓋，睇起嚟好似仲未天光一樣；陸修然撥開窗簾，從窗簾縫望出去

「又落緊雨⋯」陸修然輕嘆一口氣，掀開被落地起身，準備番學迎接新一日

陸修然今日直接帶直柄遮出門口，𨋢慢慢向下落，落咗兩層之後𨋢停咗落嚟，門緩緩打開，著住校服嘅黎昕淇行入𨋢，企喺陸修然嘅對面

「早晨。」黎昕淇主動向陸修然打招呼





黎昕淇嘅目光一眼就落喺陸修然明顯紅咗一塊嘅唇上，心入面覺得唔自在於是默默移開視線

「早晨。」陸修然直盯住黎昕淇，視線半步都冇移開

黎昕淇一出𨋢就加快腳步咁行，諗起琴日嘅自己，黎昕淇都想番去摵醒自己

番到學校嘅時候，黎昕淇經過轉角位上樓梯，陸修然行喺佢身後，同佢保持住半條樓梯嘅距離

「喂！」莫淮禮上前拍陸修然，啱啱踏學校門口就見到準備上樓梯嘅陸修然，即刻過嚟拍佢，「早呀喂！」





「早晨。」陸修然擺出佢喺學校用嘅人設，禮貌咁點點頭

「你個嘴唇流血嘅？做咩損咗？」莫淮禮好精準咁留意到陸修然嘅下唇紅咗一塊

行喺前面嘅黎昕淇聽到之後心臟一縮，略帶少許緊張咁吞一啖口水，但喺人前佢要表現得冷靜

「哦⋯」陸修然嘅目光落喺佢前方嘅黎昕淇身上，嘴角嘅上揚弧度漸深，悠悠解釋道：「琴日，咬到。」

黎昕淇聽到之後臉頰一熱，行到轉角位嘅時候，壓抑住緊張嘅感覺狠狠咁瞪咗陸修然一眼





「你食咩可以咬到呢個位？」莫淮禮滿頭問號

「可能熱氣掛。」陸修然輕笑一聲，得到想要嘅當事人嘅反應之後，帶點隨意咁回答

到咗小息嘅時候，宋楚妍喺打鐘嘅時候已經執好晒所有嘢準備落小食部

「黎昕，你去唔去小食部呀？」宋楚妍喺落去之前特登行到黎昕淇嘅座位問道

「唔啦，想瞓陣，你去啦。」黎昕淇搖頭，將枱面清空之後伏低喺枱上

其實黎昕淇冇真係好攰，佢只係唔想行出課室，聽到其他人嘅竊竊私語，今日已經聽咗好多次

「你有冇睇到呀今朝，會長個嘴損咗！」

「點解會損喺嗰個位嘅？食嘢點咬到㗎？」





「食嘢咬到？但睇起嚟似比人咬多啲⋯？」

「不過就算有少少損傷都好，會長今日都好型！」

黎昕淇每次聽到都想坐時光機番去琴日摵醒自己，表面上仲要面不改容，心入面早就尷尬到想搵窿捐

宋楚妍拎住一樽嘢飲番嚟，一番到嚟即刻急不及待咁跑到黎昕淇嘅座位將佢搖醒

「嗯⋯」黎昕淇坐起身，一抬頭就係宋楚妍一個有大件事要分享嘅笑容，頓時不安感來襲

「你估下我啱啱發現咗咩！同會長有關！」宋楚妍一開口，仲要提起陸修然，十居其九離唔開嗰件事

「會長個嘴唇損咗嘛，我知。」黎昕淇以為佢先發制人就可以終止話題，但宋楚妍點可能就咁就終止話題？





「係呀！你點解咁快知㗎！？」宋楚妍一副愕然嘅模樣

「以大家對會長嘅仰慕程度嚟講，會長剪個頭髮、戴咗隻新手錶都會有人講⋯喺個嘴度咁明顯點可能會唔知？」黎昕淇喺心裏輕嘖一聲，「早知唔落口⋯」

「聽會長講話係食嘢咬到，但我覺得似係比人咬多啲⋯」宋楚妍果然開始咗佢嘅雷達同推理，「會長肯定係有女朋友！肯定係為咗保護女朋友唔好成為公敵而唔公開！」

黎昕淇抿住唇耐心聽宋楚妍嘅分析，心入面嘅佢係皺起眉頭帶住少許嘅嫌棄：「救命，陸修然冇女朋友呀⋯諗多咗太多啦，連原因都幫會長諗埋會唔會太貼心⋯？」

「嗯。」黎昕淇用毫無波瀾嘅表情微微點頭

「嘖，都唔知點解你可以對會長零興趣，雖然副會長都好⋯」宋楚妍不解咁打量黎昕淇

「你唔會想知點解⋯」黎昕淇喺心裏又道，「唉，好想呢一日快啲結束⋯」

今日係黎昕淇番學以嚟覺得最艱辛嘅一日，又難捱又痛苦





終於捱到放學去會室開會嘅時候，黎昕淇覺得一切都好美好，終於放學，開會嘅時間都變成眨眼就過嘅時間

「咁今日就暫時到呢度先。」陸修然講道，「比啲時間樂時諗一諗活動內容先，我地過兩日再一齊傾下有冇嘢要加減，傾咗一個大概之後我先叫Miss Chung過嚟聽一聽匯報，如果冇問題嘅話，今日就散會啦。」

「拜拜會長，拜拜副會長～」「拜拜～」

鍾樂時同張詩楠嘅好快就執好嘢，完全唔想喺學校停留多一秒

「會長你個嘴做咩損咗嘅？」鍾樂時喺呢個時候指住會長好奇咁問，執嘢執到一半嘅黎昕淇即刻愣咗一下

「琴晚食嘢咬到。」陸修然沉默咗一秒之後悠悠解釋

「你食嘢咬到呢個位嘅？」張詩楠指住自己嘅下唇示意





「係囉，都唔知點解。」陸修然笑一笑，餘光留意緊黎昕淇嘅反應

「行未呀？」鍾樂時由鍾安而對面嘅位置繞過枱走向鍾安而，「好肚餓，不如食啲嘢再番去？」

「你今晚會食唔落飯。」鍾安而悠閑咁執好嘢，然後孭起書包，轉頭望向陸修然，「走先啦，拜拜。」

「拜拜。」陸修然微微頷首，企起身繼續執埋佢嘅嘢

會室入面只係剩低陸修然同黎昕淇，兩個人都好安靜，陸修然拉上書包拉鍊，悄然望黎昕淇一眼

「你番去未？」陸修然企起身孭書包同時問道

「哦，番啦。」黎昕淇微微點頭，「行得。」

黎昕淇行喺前面，陸修然行喺後面閂上並鎖咗會室嘅門，轉身嘅時候，黎昕淇就企喺離佢唔遠嘅地方睇手機

「行啦。」陸修然講道

黎昕淇今日好安靜，陸修然唔太敢肯定黎昕淇呢一刻嘅心情

「你今日做咩咁靜？」陸修然默默咁觀察黎昕淇嘅表情




IG Link: https://www.instagram.com/nd_cotttoncandy/?hl=zh-tw