【愛情】如地下情一樣嘅癮，係我對你嘅定義: 13. 負責
「唔想講嘢，想快啲番屋企。」黎昕淇一臉疲倦咁瞄咗陸修然一眼，「今日比人折磨咗一日。」
「你講因為呢個？」陸修然故意指住自己嘅下唇問道
「嘖。」黎昕淇即刻瞪陸修然一眼
「我又冇供你出嚟，我話我食嘢咬到。」陸修然聳肩
「你仲講⋯！」黎昕淇成個人都窒咗一下，一回神就不滿咁一拳打喺陸修然嘅手臂上
「你今日直接番屋企？」陸修然避免黎昕淇又要嬲
「唔⋯」黎昕淇冷靜咗落嚟，抬頭望向陸修然，陸修然亦望住佢，黎昕淇又撇開臉，「陣間答你。」
黎昕淇從裙袋拎咗支潤唇膏出嚟，打開蓋扭出潤唇膏搽喺唇上；陸修然望到佢手上嘅潤唇膏，隨即就諗起琴日，然後不自覺咁輕抿一下唇
「你做晒功課啦係唔係？你部switch有叉電呀可？我有啲想打機。」黎昕淇忽然講道
「哦，好呀。」陸修然定睛望住黎昕淇，微微點頭
⋯
「耶，係我贏咗～」黎昕淇開心咁起身跳咗兩下
「勁啦勁啦⋯」陸修然無奈咁向後靠住梳化嘅坐墊仰起頭
兩個人喺梳化前嘅毛毛地氈，拎住手掣望住電視打機，啱啱好完場嘅時候放喺黎昕淇隔離嘅手機響起嚟
陸修然見黎昕淇拎起手機聽電話嘅時候望咗佢一眼，陸修然就知道黎昕淇係叫佢唔好出聲
「楚妍？做咩呀？」黎昕淇拎住手掣坐番低喺毛毛地氈上
「我想問你有冇拎到英文書番去？有嘅話影聽日背默嗰part比我呀～」宋楚妍嘅聲線聽起嚟悠悠閒
「哦，我睇下先⋯」黎昕淇將手機從耳邊拎開，將通話狀態開咗靜音模式之後問陸修然：「你有冇帶英文書？」
「冇帶番嚟，喺locker。」陸修然搖搖頭，起身行入房
「我晏啲影比你。」黎昕淇解除咗靜音模式
「你唔喺屋企咩？」宋楚妍疑惑咁問道
「我出咗去。」黎昕淇隨便搵咗個理由搪塞，「晏啲再影比你。」
陸修然喺房行出嚟，手上拎住本英文書，黎昕淇即刻起身去拎
「原來我手機有影低，我宜家影比你，」黎昕淇講道，然後又一次將通話狀態較做靜音，但開咗擴音，方便聽佢講嘢，抬頭望一眼陸修然：「好彩你有帶書。」
「你今日開會有冇問會長？」宋楚妍忽然間冇頭冇尾咁問
「吓？問咩？」黎昕淇解除靜音問道，陸修然就企喺佢隔離
「今朝同你講嗰樣！」宋楚妍講道
「又講，你想知咪自己去問，會長咪答咗囉⋯！」黎昕淇有少少唔耐煩，「你想知佢有冇女朋友你直接問佢啦。」
「喂呀⋯！」「你喂呀都冇用，唔會幫你問，影咗比你啦。」
黎昕淇收咗線之後，發現陸修然靠住餐枱坐喺枱邊，正一臉得意洋洋咁望住佢
「自己惹出嚟仲對朋友發脾氣？」陸修然側住頭望住黎昕淇
「我只係有啲，煩躁。」黎昕淇糾正道，「你下次戴口罩啦。」
「仲有下次？仲要我戴口罩？」陸修然挑起眉，伸手捏住黎昕淇兩邊嘅臉頰，黎昕淇嘅嘴微微嘟起，「同學，為自己嘅行為負責。」
「點負責？冇得負責。」黎昕淇不在意咁聳肩
「方法有千萬種⋯」陸修然拉住黎昕淇嘅手腕，將黎昕淇向自己嘅方向拉一下，黎昕淇蹌踉一下，企喺陸修然面前，「睇下揀咩方法啫。」
喺陸修然雙膝之間嘅黎昕淇低聲哼一聲，望住一臉高傲嘅黎昕淇，陸修然比佢逗笑
「聽講，你個friend係超級外協。」陸修然帶住稍微上揚嘅嘴角，語速比平時慢咗少少，「如果比佢知道咗你同我私下嘅事嘅話⋯」
「陸修然，唔可以⋯！」黎昕淇即刻緊張起嚟，「邊個都唔可以講⋯！講咗嘅話唔⋯！」
說話講到嘴邊就被強制撤回，陸修然唔似表面睇起嚟一樣溫柔有禮，私下嘅佢比較有「攻擊性」⋯
「佢會唔會咬我⋯？」黎昕淇心臟一縮，佢唔想番到去比人懷疑佢係唔係同陸修然有咩關係，即刻推開陸修然：「你唔好諗住咬番我報仇⋯！」
「我又唔係你。」陸修然一愣之後無語咁笑道，「唔係個個都好似你咁狠，小辣椒。」
「你唔可信⋯！」黎昕淇向後行咗一少步，陸修然瞬間就將佢拉番番嚟
「癮，過咗啦？」陸修然嘅手輕握住黎昕淇嘅手腕，力度輕到只要黎昕淇一甩就可以掙脫
黎昕淇吞口水，但遲遲都唔開口回答，唇同喉嚨仍然有種乾涸嘅感覺
癮⋯呢樣嘢真係好危險，一旦開始就會進入無止境嘅循環深淵，就好似要直至完全吞噬之後先可以停止落嚟⋯
感覺唔係你好口渴想飲水，而係你唔係特別口渴，但飲咗一啖之後，就想飲晒所有嘅水
陸修然凝視黎昕淇，喉核稍然上下滾動一下，佢唔會等黎昕淇嘅回答，因為對視時嗰種無辜且略帶羞澀眼神已經代佢回答
陸修然稍微用力握咗黎昕淇嘅手一下同時將佢又一次拉向自己，黎昕淇嘅右手抵喺陸修然嘅膊頭上
冰涼嘅唇輕輕觸碰，電流一直走遍全身，本來冰涼嘅唇連同空氣同鼻息都變得熾熱起嚟
愈吻得深，關係愈撲朔迷離⋯但就算關係複雜，但係解決當刻嘅癮睇起嚟比較重要⋯
⋯
上堂嘅時候，老師拎住粉筆喺黑板上邊寫邊講書，黎昕淇望住黑板拎住筆，將聽到嘅重點寫落嚟
唔似學霸嘅書一樣有密密麻麻嘅字句同解釋，但佢記落嚟嘅重點都足夠令佢考試有好成績
「黎昕，呢個佢啱啱話答案係B定D？」坐喺黎昕淇隔離嘅江清懿一隻腳跨出座位，半個人喺走廊問道
「D。」黎昕淇望一眼江清懿本書就回答，「B嗰個喺篇文入面冇講。」
「Okay～」江清懿點點頭坐番好喺位
今日終於有少少陽光，黎昕淇成個人都精神咗，聽書嘅時候都唔會覺得就嚟瞓著一樣；黎昕淇挺直腰拉一拉筋，然後又繼續聽書
黎昕淇拎起一旁嘅鉛芯筆圈起佢唔明嘅地方，等陣間再處理，宜家先專心聽咗書先
「叮噹叮噹～叮噹叮噹⋯」落堂嘅鐘聲響起，宋楚妍同黎昕淇一齊行出課室去一轉樓下小食部
IG Link: https://www.instagram.com/nd_cotttoncandy/?hl=zh-tw