【愛情】如地下情一樣嘅癮，係我對你嘅定義: 15. 早安

「想番去瞓晏覺⋯」黎昕淇翹腳靠住櫈背坐，用皮鞋嘅邊緣輕踢咗陸修然嘅腳踝一下

「好，我又冇阻止你番去。」陸修然提手托喺黎昕淇嘅下巴，輕捏一下黎昕淇嘅臉頰

「陣間佢地番嚟見到。」黎昕淇嘅手搭喺陸修然嘅手腕上輕握住

「佢地會敲門。」陸修然一笑，「我地SU嘅人好有禮貌。」

「我知呀。」黎昕淇講道，陸修然即刻稍微用力咁捏咗佢嘅臉頰一下





「叩叩—」啱啱先講完就即刻傳嚟敲門聲，陸修然即刻鬆手，黎昕淇摸一摸自己嘅臉頰，兩人即刻分開保持一段距離

「你地咁快手貼完嘅？」鍾安而同鍾樂時一齊番嚟，鍾樂時一入嚟就一臉訝異，「好快手！」

「係唔係貼晒啦？」陸修然擺出認真嘅模樣問道

「嗯！貼晒啦！」鍾樂時用力咁點頭

「貼晒就散啦。」陸修然提手望一望手錶，微微點頭





「好呀～」鍾樂時拎起放喺一邊嘅書包，望向鍾安而，「你行未？」

「行啦。」鍾安而拎起書包，「你地行未？」

「行啦。」黎昕淇微微點頭，然後望向陸修然，「會長你行未呀？」

「行啦都。」陸修然拎起書包，今日係罕見嘅四人組一齊走

⋯





「飲咩好⋯買樽茶好唔好呢？但我都想飲乳酸⋯」黎昕淇企喺7仔嘅雪櫃前面沉思，三心兩意唔知飲咩好

「買嘢飲呀？」一隻手搭落黎昕淇嘅膊頭，黎昕淇頓時嚇咗一嚇，擰轉頭一望見到唔知幾時都喺度嘅江清懿望住雪櫃

「你都要買嘢飲呀？」黎昕淇問，佢自己都仍然猶疑緊要飲咩

「今日買，你飲咩呀？」江清懿打開雪櫃，拎咗樽奶茶

「飲⋯唔⋯未諗好⋯」黎昕淇三心兩意咁望住雪櫃，「飲茶好定乳酸好？」

「猜包剪揼。」江清懿伸定手出嚟，「我贏就揀茶，你贏就飲乳酸。」

「包⋯剪⋯揼！」「茶。」

黎昕淇打開雪櫃拎咗樽茶落嚟，同江清懿一齊去比錢，江清懿好快手拎咗八達通拍卡，黎昕淇都未拎得切錢





「你咁快手嘅⋯我比番錢你⋯」黎昕淇默默咁伸手拎嘢飲

「等得你嚟都比完錢走咗啦～」江清懿笑道，擰開樽蓋先飲一啖，「請我飲嘢得啦，唔好搞嗰啲散銀⋯」

「好啦。」黎昕淇諗咗一諗，覺得呢個提議都可以

江清懿喺黎昕淇擰開樽蓋嘅時候望咗佢一眼，輕嘆一口氣之後又將手好順便咁搭喺黎昕淇嘅膊頭上

「當我扶手呀？」黎昕淇冇刻意將佢嘅手推開，都有啲習以為常，好多時番工見到江清懿，江清懿都係咁順便

黎昕淇先行上電梯，自然咁擰轉身望一望行喺佢身後嘅江清懿，江清懿就企喺佢後一格嘅位置

「望咩呀？」黎昕淇見江清懿定睛望住佢，輕皺一下眉頭困惑問道





「你企高咗一級都係冇我咁高。」江清懿笑言

「先生你知唔知自己幾高⋯？」黎昕淇無奈咁問，佢企喺電梯級上都係矮過江清懿少少，「你有冇190？」

「咁又冇～」江清懿捉起一少撮頭髮卷咗兩下，「四捨五入可能有啦～」

「佢好似同陸修然差唔多⋯？」黎昕淇將江清懿由上而下打量一次，「好似係⋯」

「你呢個舉動係咩意思⋯？質疑我嘅身高⋯？」江清懿挑起眉，用略帶不滿嘅語氣問，喺佢咁樣問嘅時候，電梯啱啱好到平地，兩人嘅身高差又變回原形

「唔係～就係望下。」黎昕淇笑道，抬起頭望住江清懿，「你嘅身高冇得質疑。」

「身高差咁明顯，梗係冇得質疑！」江清懿低頭望黎昕淇，自然咁提手將手放喺佢膊頭

黎昕淇抬頭就瞪江清懿一眼，將江清懿嘅手推開，然後輕哼一聲，下一秒江清懿又好似要逗佢一樣特登又將手放上去





黎昕淇望住江清懿，江清懿笑而不語，黎昕淇都冇佢咁好氣，呢個人真係太無聊⋯

番工嘅時候，黎昕淇一直喺樓面送餐，喺終於開始冷清嘅時候，偷偷地企喺一邊休息；江清懿撥開廚房嘅門簾行出嚟嘅時候，一眼就望到企喺一邊黎昕淇

「江清懿，幫手買嘢飲啦去，錢比你啦。」店長行出嚟輕推咗江清懿一下

「又係我做跑腿呀⋯」江清懿皺起眉頭不情不願咁講，但都係接過店長手上比嘅錢行出去

黎昕淇企喺一邊靠住櫈背發呆，心入面默念：「好想快啲收工⋯」

江清懿番嚟嘅時候，手上拎住個白色嘅膠袋，袋入面裝咗江清懿隨便買嘅嘢飲，呢個好似係鋪頭嘅日常，有時夜晚太忙，店長都會請大家飲嘢，佢出錢，大家揀

「買珍珠奶茶咁識飲？」店長見到江清懿用另一隻手拎住嘅珍珠奶茶，係喺樓下嘅奶茶店買





「你請嘛～多謝店長～」江清懿即刻識趣咁講，「我買咗你成日飲嗰隻綠茶。」

「咁醒知我成日飲嘅？」店長拎起膠袋中唯一一樽綠茶，擰開蓋先飲為敬

黎昕淇行入嚟，店長行開之前指一指膠袋叫佢揀嘢飲，企喺膠袋隔離嘅江清懿拎咗一樽乳酸遞比黎昕淇

「知我想飲乳酸喎～」黎昕淇笑住接過乳酸，扭開樽蓋飲咗一啖

「你當我金魚呀？番工前先講完⋯」江清懿反咗個大大嘅白眼

黎昕淇微微聳肩，然後先將乳酸放到雪櫃，放工先再拎番屋企；收工一番到屋企，沖個涼換件衫、灘喺床蓋個被，拎住手機迷迷糊糊咁就瞓著咗

翌日起身嘅時候係清晨6點，黎昕淇拎起只有30%電嘅手機思考咗一陣，然後拎起叉電線幫手機叉電，側身灘喺床拎住手機睇

黎昕淇打開琴晚陸修然最後send比佢，但佢冇睇到嘅message：「消失咗？」

「瞓著咗，太攰，宜家醒啦」黎昕淇回覆道

黎昕淇望一望時間，佢估陸修然應該已經起咗身，平時就算係喺假期，陸修然都會早起身，感覺上多啲時間做嘢

「早晨」陸修然好快就睇到message回覆番嚟，「你居然咁早起身？」

「早餐食咩好，宜家有啲餓」「食白粥油炸鬼」

黎昕淇望住啲字，忽然覺得有陣油炸鬼嘅香味飄過，肚都咕咕叫起嚟，本來冇真係好肚餓，但宜家就真係好餓

「你食咗早餐未？」「未」

「食唔食，出去食」「都得」

黎昕淇一秒坐起身，喺手機鍵盤打道：「15分鐘後樓下等」




IG Link: https://www.instagram.com/nd_cotttoncandy/?hl=zh-tw