【愛情】如地下情一樣嘅癮，係我對你嘅定義: 16. 早餐
坐喺梳化睇緊新聞嘅陸修然望住手機新嘅message，然後起身入房換衫，佢都有啲餓係真，本來仲打算睇埋新聞就去煮嘢食，不過宜家好似冇呢個必要啦
15分鐘之後，戴住cap帽嘅陸修然坐喺大堂等一邊嘅長櫈等黎昕淇，𨋢門打開，一個戴住黑色cap帽嘅女仔喺𨋢入面行出嚟
「你咁快嘅？」黎昕淇將cap帽嘅帽檐用指尖向上頂起，「做咩戴咗cap帽？」
「你自己都戴咗cap帽⋯」陸修然無奈咁將目光放到黎昕淇頭上嘅黑色cap帽
「睇起嚟好似啲可疑人士⋯」黎昕淇對住大堂一邊嘅鏡整理頭髮，將髮絲繞到耳後
「Okay啦。」陸修然企喺黎昕淇身旁道，「行啦。」
兩人行到附近一間好早開店嘅粥麵店，入去坐喺靠近牆嘅位置，黎昕淇拎起餐牌習慣咁望一望，睇完之後陸修然就幫佢落埋單
「好攰⋯醒咗瞓唔番。」黎昕淇雙手掩住面，用仍然帶住床氣、少許沙啞嘅聲線講道
「食完嘢番去再灘下。」陸修然將手機放到枱上，托住下巴用懶洋洋嘅語氣講道
「嗯⋯你咁早起身有咩做⋯？」黎昕淇望住店員阿姨由廚房拎住兩碗粥出嚟，然後行到仍地嘅枱邊，將粥放低
「冇，睇下新聞睇下電腦，有功課做功課，打陣機。」陸修然將白粥放到黎昕淇嘅面前，順手將一隻膠匙羹放到碗中
「哦⋯好悶。」黎昕淇淡然咁回應，然後又望到阿姨將啱啱炸起嘅油炸鬼拎緊過嚟
「小心熱，啱啱先炸起⋯」陸修然望住黎昕淇一副急不及待嘅模樣提醒道
「知啦⋯」黎昕淇撅起嘴望住油炸鬼講道
陸修然習慣黎昕淇喺人前冷靜冷淡，喺佢面前嘅任性高傲，黎昕淇嘅性格本來就係咁樣有少少難觸摸
以前小朋友嘅時候都會成日一齊玩、傾下計，但宜家反而好少，可能一直都唔同班所以冇咩共同話題，又因為要喺人前保持距離所以又拉遠咗啲
因為黎昕淇唔想比人知佢地嘅關係，唔想人地知道其實佢地好熟，所以要刻意喺其他人面前擺出同私下相處完全唔一樣嘅態度
「食完嘢行一陣？」陸修然喺心入面輕嘆一口氣，然後將事情先擺開一邊之後問道，「定你想番去瞓？」
「食咗嘢好似又冇咁攰。」黎昕淇搖搖頭，夾起油炸鬼就擺入口咬咗一大啖
「成個嘴邊都係油⋯」陸修然無奈咁拎咗要紙巾㩒喺黎昕淇嘅嘴上，喺佢鬆手嘅同時黎昕淇將紙巾接住
「打唔打機？」黎昕淇吞咗口中嘅嘢之後問道，「番去打機。」
「都可以，你中意啦。」陸修然回答
「9點，9點再見。」黎昕淇嘅聲線帶住少許愉悅
食完早餐之後，黎昕淇同陸修然各自番到屋企，等到9點嘅時候黎昕淇先再出門口
「你去邊呀？」黎媽媽望住一個居家裝嘅黎昕淇問道
「上去，同阿然講好咗9點上去打陣機。」黎昕淇拎咗對拖鞋著上
「哦好啦，你做晒功課未㗎？」黎媽媽問道，手上仲拎住個鑊鏟
「做晒啦。」黎昕淇扭動門鎖，「我上去啦。」
黎昕淇行出門口，平時如果喺佢屋企番嚟嘅話，黎昕淇會揀行樓梯，但上去嘅話都係搭𨋢比較輕鬆
陸修然收到message就出去開門，黎昕淇入到房之後自動自覺咁爬到陸修然嘅床上，將掛喺床尾嘅電視螢幕開著，幫佢連接好遊戲機
「等你咋。」黎昕淇拎好手掣對陸修然講道
⋯
差唔多兩個鐘之後，陸修然覺得玩到好攰，於是起身起咗個廁所，當佢再番嚟嘅時候，見到黎昕淇側身瞓低喺床上，手上仍然拎住手掣
「阿昕？黎昕？」陸修然將房門閂上後行到床邊叫咗兩次，「瞓咗⋯？」
陸修然將輕手輕腳咁將手掣從黎昕淇嘅手中抽番出嚟，閂咗電視，將手掣扣番喺遊戲機上面
「瞓得咁放心⋯」陸修然拎起搭喺櫈背嘅外套，蓋喺壓喺被上面瞓嘅黎昕淇嘅大髀上面
畢竟佢只係著住短褲，側身一瞓，短褲顯得更短，大長腿一覽無遺
陸修然坐喺書枱前安靜咁睇電腦，由得黎昕淇喺度瞓
安靜咗好一陣之後，放喺陸修然枱面嘅手機震起嚟，陸修然望咗一眼就拎起手機打算聽電話，電話放到耳邊前再望一眼確認係要聽嘅電話
「唔係我部手機⋯」真係望清楚來電顯示之後，陸修然肯定呢部手機係黎昕淇嘅，因為佢冇江清懿嘅電話
陸修然伸手打算叫醒黎昕淇聽電話，手要掂到黎昕淇嘅膊頭嘅時候停咗落嚟
「算啦，唔叫佢啦。」陸修然望一眼手機嘅來電顯示，又望一望瞓緊覺嘅黎昕淇，默默咁收回打算叫醒黎昕淇嘅手
陸修然直接將手機螢幕向下咁擺番喺枱，當冇聽到手機有響過一樣繼續做自己嘅嘢
過咗大半個鐘之後，黎昕淇瞓醒坐起身，房入面嘅遊戲機都已經執好，但陸修然唔喺書枱前
「人呢⋯？」黎昕淇迷迷糊糊咁坐喺床上，稍微回神就雙腳落地，打算出去望一眼
黎昕淇行到房門前扭動門鎖開門，打開門就見到企喺房門前、同樣準備伸手開門嘅陸修然
「瞓醒啦？」陸修然望住一臉睡眼惺忪嘅黎昕淇
「嗯⋯你喺出面嘅⋯？」黎昕淇緩慢咁向後行咗一步再轉身行到床邊坐低
「去廁所。」陸修然行入房嘅時候順手閂門，坐番喺書枱前，「啱啱你電話響過。」
「嗯⋯邊個打嚟⋯？」黎昕淇問道
「唔知，冇留意。」陸修然淡然回答道，餘光望住黎昕淇拎起手機，然後又放番低手機，「唔洗打番去？」
IG Link: https://www.instagram.com/nd_cotttoncandy/?hl=zh-tw