【愛情】如地下情一樣嘅癮，係我對你嘅定義: 19. 投訴
「嚟緊要麻煩你地幫手啦。」黎昕淇連忙微笑道，睇起嚟係好友善嘅師姐
「唔麻煩㗎！你地忙啦，我地走啦⋯！」幾個女仔臉上掛住滿滿嘅笑容講道
「會長，你啲小迷妹又嚟仰慕你啦。」黎昕淇喺幾個女仔行遠咗之後對陸修然講道，「個個入嚟做支援都係為咗你同副會長。」
「所以你嚟得好及時。」陸修然同黎昕淇一齊落樓下拎埋另一箱，「手痛唔痛？啱啱嗰箱咁重。」
「有條痕，都Okay。」黎昕淇打開手心，手心除咗有啲紅之外仲有一條紅痕，本來穿過手挽位拎住個箱，但因為太痛所以先攬住
「紅晒啦小姐⋯」陸修然嘅目光落喺黎昕淇嘅手心上，有啲心痛佢隻手一樣嘅眼神，「下次你就唔好格硬嚟啦⋯」
「知啦，我冇格硬嚟⋯⋯」黎昕淇撅一撅嘴，然後搓一搓手心，「所以宜家會長你咪同我一齊去。」
去完教員室交嘢嘅江清懿迎面行嚟，佢望到黎昕淇同陸修然一齊
「喂！」江清懿自然咁叫咗黎昕淇一聲，「你落去交嘢呀？」
「唔係呀，同會長落去拎嘢。」黎昕淇指一指陸修然
「好啦，陣間數學堂見～」江清懿冇所謂咁笑一笑，然後就喺黎昕淇隔離行過
喺江清懿經過咗兩人身旁之後，陸修然面色隱約一沉，回頭望咗江清懿一眼，短短半秒已經將佢由頭到腳打量咗一次
行到拎物資嘅課室門口就見到有一個大紙箱放喺枱，陸修然大步行到枱前拎起紙箱就轉身行番出嚟
「我冇嘢拎住喺手好似唔係幾好⋯」黎昕淇望一望兩手空空嘅自己，然後伸手喺箱入面拎咗放喺最上面嘅物資file
陸修然一臉困惑咁望住黎昕淇，黎昕淇見陸修然望住佢便解釋道：「我冇嘢拎住好似扮緊工，所以幫你拎少少。」
「哦，多謝你嘅幫忙。」陸修然無奈咁捧住手上沉甸甸嘅箱講道
「唔洗客氣。」黎昕淇帶住虛偽嘅微笑道，「舉手之勞啫。」
黎昕淇行喺前面開門，陸修然將紙箱放到本來已經又擠逼又亂嘅枱上，黎昕淇企喺門邊望住陸修然
「你仲企喺度？」陸修然擰轉身就見到黎昕淇企喺門邊
「吓⋯」黎昕淇嘅大腦忽然間窒咗一下，佢都諗緊自己企喺度做咩
陸修然行到佢面前，提手㩒住門鎖，黎昕淇望咗門鎖一眼，又怯怯咁抬頭望陸修然一眼，下意識向後踏咗一小步，但背脊已經貼住牆
「你仲唔番課室？」陸修然扭動門鎖，宜家只要有人推門就可以入到嚟
「呀⋯？」黎昕淇呆咗一下，有啲猶疑咁望一望門鎖又望住陸修然
「陣間有人推門入嚟見到，就好難講清⋯」陸修然嘅聲線帶住少許嘅慵懶講道，「你要保持距離嘅目的就做唔到啦。」
「聽起嚟你唔太滿意啦？」黎昕淇翹埋雙手側着頭，喺陸修然嘅面前完全將小辣椒嘅本性暴露無遺
「還好啦，覺得唔係幾公平啫。」陸修然面不改容咁聳肩
「會長，我邊度唔公平？」黎昕淇聽完一頭霧水，佢可以點樣唔公平？
「你同我喺學校就要保持距離，最近唔好行咁埋，見到最好轉身走；你同其他人就唔洗，仲可以有講有笑，大家都係男仔，會唔會有啲唔公平呢？文書。」陸修然用平靜嘅語氣講，但喺黎昕淇耳中聽起嚟好似講說話比佢聽一樣
「會長，你就係因為呢件咁無聊嘅事所以唔滿意？」黎昕淇輕哼一聲再加上冷笑，成件事睇起嚟更有挑釁性
「咁係唔係唔公平先？」陸修然嘅不滿都唔隱藏住，直接用不滿嘅語氣問黎昕淇
「陸修然，我地係咩關係？本來就唔公平。」黎昕淇重重咁嘆一口氣解釋道，「會長，我同你之間嘅關係，本來就同其他人唔一樣。」
黎昕淇睇起嚟好冷靜，佢同陸修然對望住，對恃咗一陣之後，黎昕淇伸手捉住陸修然嘅校呔，將陸修然向下拉，鼻尖輕碰嘅時候一呼一吸嘅聲音顯得好明顯
「我條校呔要爛啦⋯」陸修然低聲講咗一句，手撐住喺牆上
「關我咩事，又唔係我條呔⋯」黎昕淇事不關己咁講道，喺陸修然嘅唇上輕吻一下就鬆咗手
「你要錫我仲要拉低我⋯」陸修然無奈一笑，手整理住佢嘅校呔
「我就係要你彎腰就我。」黎昕淇一臉高傲咁輕哼一聲講道，然後開門就行出會室番課室
「真心隨心所欲⋯」陸修然一個人喺會室入面將校呔嘅領結推番上去貼住裇衫嘅衫領，擋住裇衫嘅第一粒衫鈕
⋯
Lunch後嘅班主任課
「義工活動，仲要強制參加⋯」莫淮禮一聽到班主任講嘅嘢，下意識就皺起眉頭抱怨起嚟，「會長，你打算參加邊個？」
「唔⋯我未諗好。」陸修然望住黑板嘅選項，唔係去老人院就係去幼稚園，「仲諗緊。」
「我諗住跟你。」莫淮禮帶住微笑着陸修然講道
「我諗完再同你講。」陸修然拎住原子筆喺手中轉起嚟把玩
陸修然托住下巴思考起嚟，到底要去邊一個先好？陸修然有啲苦惱，唔太肯定去邊一個比較好
「都唔想去⋯」陸修然喺心入面嘆氣，「但係強制活動⋯」
陸修然從褲袋拎出手機放喺櫃桶，冒住可能會比隔離位發現嘅風險快速咁send咗個message比黎昕淇：「你去老人院定幼稚園」
同樣喺課室猶疑緊嘅黎昕淇睇到陸修然send比佢嘅message，黎昕淇思考咗一陣之後作出佢嘅選擇：「幼稚園」
「填完名就交番出嚟啦。」班主任講道，陸修然睇到黎昕淇嘅回覆，然後拎起筆喺幼稚園嗰一格打咗個剔
「你揀好啦？」莫淮禮問道
「我揀幼稚園。」陸修然講道，然後拎住報名表起身行出去交比班主任
「咁我跟你揀幼稚園。」莫淮禮點點頭，然後喺幼稚園嗰一格打咗個剔，跟喺陸修然身後出去交報名表，「你中意小朋友咩？」
「一般。」陸修然微微聳肩，「冇特別感覺。」
黎昕淇幫宋楚妍一次過交埋出去，佢地兩人都揀咗去幼稚園做義工，因為兩個人都中意小朋友
「陸修然唔係唔中意小朋友㗎咩⋯？」黎昕淇忽然有啲困惑
拎住手機嘅陸修然忽然收到一個來自媽媽嘅message：「比個任務你」
陸修然一頭霧水咁㩒開message，睇下媽媽委派比佢嘅任務嘅真面目；陸修然一見到任務內容就有啲唔情願，但媽媽又加咗一句：「任務咁簡單，應該難唔到作為學生會會長嘅你」
IG Link: https://www.instagram.com/nd_cotttoncandy/?hl=zh-tw