【愛情】如地下情一樣嘅癮，係我對你嘅定義: 18. 簡潔
「今日⋯唔洗都可以，我陣間send個message上group。」陸修然拎起手機準備send個通知比大家
陸修然嘅message一send出嚟，鍾安而同黎昕淇嘅手機即刻彈出新通知
「我番課室先。」黎昕淇拎住手機起身
「好。」陸修然微微點頭，鍾安而抬頭望一眼
「黎昕心情唔好？」鍾安而喺黎昕淇出咗會室之後望向陸修然
「我諗佢攰啫。」陸修然回答，佢只係以直覺去估，因為大概都離不開呢個原因
⋯
上堂上到最後兩堂，黎昕淇都就嚟瞓著，咁啱仲要係睇影片時間，閂晒燈又安靜就更眼瞓
「叮噹叮噹～叮噹叮噹⋯」
聽到放學鐘聲嘅黎昕淇即刻醒咗，坐喺老師枱前嘅阿sir都即刻抬起頭、拎起咪
「條片下堂先播埋，科長，幫我記住播到邊。」阿sir直接閂電腦，執好嘢就落堂
「醒啦，黎昕！」江清懿捉住黎昕淇嘅枱搖咗兩下
「醒咗。」黎昕淇睜開眼，仍然一臉疲倦，「執嘢走。」
黎昕淇雙手撐起自己起身，執好要拎番屋企嘅嘢放入書包，其他嘢擺入locker
「你今日去會室定番屋企？」宋楚妍幫locker扣番個鎖
「屋企，番去瞓⋯」黎昕淇嘅聲線聽起嚟都特別冇神，「會長喺group講咗佢要講嘅嘢啦⋯」
「你琴晚做賊嚟？眼瞓到咁樣？」宋楚妍跟喺黎昕淇身後行番埋位
「瞓唔著。」黎昕淇孭起書包，行到宋楚妍嘅座位拉一拉宋楚妍，「行啦，好攰。」
黎昕淇一番到屋企將校服換咗落嚟之後即刻灘喺床瞓晏覺，瞓低咗十秒都冇就已經瞓著咗
起身嘅時候外面已經天黑
「阿昕，食飯啦。」黎媽媽打開黎昕淇嘅房門
「嗯⋯」黎昕淇眉頭一皺，外面嘅光對佢嚟講特別刺眼
黎昕淇坐咗一陣，拎住手機起身出去食飯，坐到喺餐枱前嘅時候仍然有啲床氣，飯菜好香但勾唔起黎昕淇嘅食慾
「咩嚟㗎⋯？」黎昕淇望住放喺枱上嘅白色長方形紙袋
「阿然拎落嚟㗎， 佢媽咪買嘅朱古力餅，呢間好好食㗎。」黎媽媽將紙袋推到黎昕淇嗰邊
「呢個牌子好貴㗎⋯！」黎爸爸望到紙袋上寫住嘅牌子名講道
「佢話買開有折，所以買咗三盒，比一盒我地。」黎媽媽講道
黎昕淇對呢個餅冇咩興趣，可能因為未瞓醒嘅關係，只係安靜咁食飯
「你最近做咩咁攰呀？」黎媽媽將菜夾到黎昕淇嘅碗中，「我問阿然，佢又話學生會唔係好忙。」
「唔忙呀，佢忙咋嘛。」黎昕淇回答道，「佢幾時上嚟㗎？」
「大半個鐘先囉。」黎爸爸搶答道，「佢話同咗你講佢攞嘢落嚟，但你冇覆佢。」
黎昕淇呢一刻先拎起手機睇，陸修然真係有搵過佢，黎昕淇宜家就回覆陸修然：「餅我睇到，啱啱醒」
「好」陸修然只係覆咗一個字比佢
黎昕淇望住陸修然嘅回覆，再睇下上面嘅對話，不禁覺得原來佢地嘅對話經常都係咁簡潔而且直接
佢同陸修然好少會轉彎抹角，好多時都係直接講自己想講嘅嘢，如果有人問起佢同陸修然有幾熟，黎昕淇都已經知道自己嘅答案會係咩
「唔係特別了解，但亦唔係唔了解，所以都算熟？」
黎昕淇比嘅答案就係咁無棱兩可，自己講完都會笑出嚟，不過呢個答案唔太可能講出口，因為佢有意隱瞞佢同陸修然嘅熟絡，但事實就同佢講嘅一樣
「唔太熟，一般啦。」呢個先會係黎昕淇真正講出口嘅答案
本來黎昕淇就係有意咁令自己同陸修然睇起嚟唔熟，但係唔係真係唔熟，又唔係，佢地想表現出嚟嘅嘢本來就同事實係相反⋯
「好攰，諗太多嘢⋯」黎昕淇嘆一口氣，拎起飯碗食飯，都係先稍微填飽肚比較重要
⋯
「會長，仲有冇嘢要幫手呀？」
「嚟緊係唔係都會要Helper幫手？」
「係，嚟緊活動都會要Helper幫手，到時出咗報名紙你地可以去填名。」陸修然微微點頭，佢企喺會室嘅門前，身邊圍咗幾個女仔，都係學生會嘅支援人員
「好呀好呀！」
「等張紙一出咗，我地就即刻去寫名！」
「麻煩你地幫手啦。」陸修然禮貌咁微笑道
「唔麻煩！」
黎昕淇雙手攬住一個大紙箱，入面都係一啲嚟緊要用嘅物資，一行到上嚟會室呢一層，就見到陸修然比一堆女仔圍住
「又係咁樣啦⋯」黎昕淇認得嗰幾個女仔，因為佢地最熱衷於幫學生會嘅忙，正確嚟講係陸修然嘅忙
陸修然嘅餘光見到黎昕淇，於是望過去就見到黎昕淇攬住一個睇起嚟好重嘅箱
「點解係你拎上嚟？」陸修然從幾個女仔之間嘅穿過去走向黎昕淇，接過黎昕淇手上嘅箱，「個箱好重。」
「副會長喺樓下整緊其他嘢，負責財政嗰位冇番學。」黎昕淇跟喺陸修然嘅身後行入會室，幾個女仔即刻讓開咗比佢地過，「而且大家都有嘢做緊，我拎一拎上嚟好快啫。」
「好彩揀咗做今屆學生會嘅支援人員！」幾個女仔喺門口細聲講道，「外協嘅人好啱做今屆學生會嘅支援⋯！」
「我落去拎埋另外一箱。」企喺門口頂住門嘅黎昕淇講道
「我同你去攞，太重啦。」陸修然轉身走向黎昕淇
幾個女仔一直企喺門口望住兩人、聽住兩人嘅對話，對陸修然嘅好感度又高咗一截
喺佢地眼中，佢地嘅學生會會長幾乎係完美，所以就算多人仰慕都係唔出奇嘅事，好感度一直上升緊
「師姐。」喺同黎昕淇對到眼嘅瞬間，佢地即刻微微彎腰點頭
IG Link: https://www.instagram.com/nd_cotttoncandy/?hl=zh-tw