【愛情】如地下情一樣嘅癮，係我對你嘅定義: 26. 門外
「多謝晒～唔講大話唔通講真話？」黎昕淇放慢咗腳步，同宋楚妍拉開半步嘅距離先回覆陸修然
「我冇所謂」陸修然跟喺莫淮禮嘅身後，同佢保持住三步嘅距離
「會長，你行快啲好唔好？」莫淮禮一擰轉頭，見到離佢有少少距離嘅陸修然，於是轉身就朝佢行去
黎昕淇望住陸修然嘅回覆不禁思考起嚟：「好似就算比人知都冇咩太大所謂，但又會有啲麻煩，人受歡迎就係會咁麻煩⋯」
「行啦。」陸修然喺莫淮禮行到之前將手機收入褲袋，佢同黎昕淇嘅對話唔可以比莫淮禮睇到
「唉⋯唔好諗咁多冇用嘅嘢⋯」黎昕淇搖搖頭，將心中嘅多餘想法撥走
⋯
夜晚嘅晚飯後
「芝麻，我都想好似你咁日日喺屋企灘⋯」黎昕淇將跳到梳化上嘅白貓芝麻抱起到懷中
「叮咚～」屋企嘅門鐘忽然響起嚟，坐喺梳化嘅黎昕淇抱住芝麻起身行去開門
「你做咩上嚟嘅？」黎昕淇望住企喺門前嘅陸修然
「媽咪派我上嚟拎嘢。」陸修然講道
喺黎昕淇懷中嘅芝麻望住陸修然，然後伸脷舔一下鼻，陸修然隨意咁伸手摸一摸芝麻嘅下巴
黎爸爸見到陸修然企喺門口，就即刻行去廚房叫黎媽媽，黎媽媽行到餐枱前拎咗一個紙袋
「呢啲幫你媽咪買㗎，可能有啲重。」黎媽媽將紙袋遞比陸修然，「洗唔洗拎多個袋裝？」
「唔洗啦，好近啫。」陸修然接過沉甸甸嘅紙袋，「唔該阿姨。」
「小心拎呀～」黎媽媽微笑道
「我送你出去。」黎昕淇彎腰將芝麻放低喺地面，將睡拖換成拖鞋，拎住鎖匙就行出去
「呢度行去𨋢口先兩步。」陸修然指住已經近在眼前嘅𨋢，沉默一秒後壓低聲線問道，「做咩送我？有嘢要講？」
「冇，有咩可以講？」黎昕淇貼住大理石牆，望住冇㩒著嘅𨋢掣搖搖頭
「突然間咁好送我出嚟，一定唔係單純想送我咁簡單。」陸修然帶住懷疑猜測打量黎昕淇，心入面凝住黎昕淇有啲咩想話佢知，「講啦。」
「唔好意思，真係冇。」黎昕淇無奈一笑，翹埋雙手企喺陸修然身旁，「冇嘢講就唔可以送你？」
「可以送，只係你睇起嚟唔似會對我咁好。」陸修然側住頭，有啲慵懶咁靠住牆，冰涼嘅感覺傳遍全個背
「你真係一啲都唔了解我。」黎昕淇忽然輕嘆一口氣，無奈咁瞄陸修然一眼
「冇人話識得耐就了解。」陸修然聳肩，「加上我地喺入學生會之前，喺學校幾乎都唔會有交集，唔了解唔係好正常？」
「你好似略有微言⋯？」黎昕淇嘅心情一下變得有啲複雜
「冇，邊敢。」陸修然講嘅說話聽起嚟係順從，但黎昕淇聽起嚟係挑釁，「我唔係按你嘅意思好好咁同你保持距離？除咗喺學生會，其他時間喺人前同你保持1.5米距離。」
「你有不滿嘅話可以講。」黎昕淇翹埋雙手，側住頭望住陸修然
「我可以有咩不滿？你中意嘅唔止可以保持距離，仲可以去搵個男朋友添。」陸修然嘅脷尖舔一下上顎，睇起嚟完全係不滿狀態，但仍然壓抑住自己嘅不滿露出虛偽嘅微笑
「突然同搵男朋友有咩關係⋯」黎昕淇覺得陸修然都莫名其妙，但聽到陸修然叫佢去搵男朋友嘅時候，心入面有一股難以言喻嘅感覺凝聚起嚟，「好啦，唔嬲啦，係咁唔公平㗎啦。」
黎昕淇伸手摸陸修然嘅頭髮，佢嘅安慰完全起唔到作用，聽起嚟一啲都唔係係安慰緊人、叫人唔好嬲
「冇人會好似你咁安慰人，你嘅安慰法完全唔會起到效果。」陸修然捉起黎昕淇嘅手腕，將佢嘅手從自己嘅頭頂上移開
「我講事實，而且我唔太識安慰人。」黎昕淇聳肩，雙手搭喺陸修然嘅膊頭，借力踮起腳尖，喺陸修然嘅嘴角輕吻一下
陸修然沉默不語，手放到黎昕淇嘅後腰，熾熱嘅感覺喺唇上蔓延，黎昕淇嘅手將陸修然嘅衫角都捉到皺晒，連喘息嘅空間都已經消失
黎昕淇唔可以否認，佢嘅癮總係比眼前呢個人輕易咁撩起，陸修然喺佢面前完全唔係嗰個令人仰慕嘅會長，不過黎昕淇嘅內心並唔抗拒
喺黎昕淇想伸手推開陸修然換嚟一下喘息嘅時候，陸修然先一步鬆手
「所以，你嘅癮咁容易比人撩起得唔得？」陸修然低聲問道，聽起嚟就好似惡魔嘅耳語一樣
「陸修然！」「噓⋯」
黎昕淇覺得自己比眼前嘅人呃咗，就算微喘住氣都不忘要瞪陸修然；陸修然將食指抵喺唇前
「陣間阿姨佢地聽到，出嚟見到就唔好啦。」陸修然湊近黎昕淇耳邊低聲道，左手仍然按喺黎昕淇嘅後腰，「破壞我形象。」
「你有咩形象？你平時拎嚟呃人嘅形象？斯文敗類⋯！」黎昕淇微微向後仰，同陸修然拉開少許距離，握起拳頭喺陸修然嘅胸口上毫不留情咁揼咗一下
「噓，唔好破壞我形象。」陸修然鬆開手，將自己身上嘅衫拉一拉，「我要番上去啦，陣間我媽以為我落嚟咁耐做咩。」
「你一早就應該番上去。」黎昕淇輕哼一聲，行前去㩒𨋢
「世上有好多壞人，唔好輕易比人撩起你嘅癮。」陸修然望住𨋢從地下逐層上緊嚟嘅時候淡然咁講咗一句
「你咪嗰個壞人，係你撩我先⋯」黎昕淇貼住牆企，雙手放喺身後，掌心感受住來自牆嘅冰涼感，「唔見得你有幾好人⋯」
「我撩你先，都要你接受，唔好諗住推晒落我度。」陸修然笑道，喺𨋢門打開嘅時候道：「我番去啦，聽日見。」
「嗯。」黎昕淇冷淡咁嗯咗一聲回答就算
喺𨋢門閂上之後，黎昕淇用鎖匙開屋企門，換番睡拖，直接行入自己嘅睡房閂門，直接灘低喺床上，將頭埋喺枕頭中
「點解我當初會咁冇戒心咁比佢錫⋯係因為當時嘅氛圍⋯？」黎昕淇自己都有啲諗唔明
自然嘅靠近取代咗語言，喺當下嘅氛圍的確幾容易令人失去思考能力
「明明喺陸修然先湊近我嘅時候，我可以推開，我點解會揀都湊近少少去迎合佢⋯？」黎昕淇諗番起當時嘅情景，自己就更加唔明白自己，「變成咗癮啦⋯」
作為彼此嘅癮嘅解藥，有啲答案係點搵都搵唔到，係佢地都解唔開嘅問題，愈想知道答案，真相反而愈模糊
IG Link: https://www.instagram.com/nd_cotttoncandy/?hl=zh-tw