【愛情】如地下情一樣嘅癮，係我對你嘅定義: 27. 比賽

「你咁快換完PE衫啦？」宋楚妍見江清懿著住PE衫喺外面行入嚟，「打幾點呀？」

今日已經係打冠亞季，宋楚妍同黎昕淇全個星期都喺學校食飯，除咗因為黎昕淇係學生會成員要落籃球場幫手之外，仲係因為宋楚妍想睇比賽

「我地班係第一輪。」江清懿將換咗落嚟嘅校服塞入書包，然後朝佢嘅隊友問：「我地抽到邊班？係唔係隔離D班？」

「係呀。」佢嘅隊友聽到江清懿嘅呼喚就望咗過嚟，「加油呀江清懿，我地班嘅獎狀靠你啦！」

「靠埋你呀大佬！」江清懿擰轉頭道，「隔離班係唔係有個落唔到場？」





「係呀，話早兩日踩單車斷咗腳嘛，佢地有後補會上場。」隊友道

「後補？邊個？」江清懿問道，但大家都唔知邊個係候補

兩人都有啲困惑，同時因為唔知道邊個係後補而有少少不安嘅感覺

黎昕淇準時到達籃球場，其他學生會成員已經到齊，除咗佢同陸修然

「會長呢？」黎昕淇見唔到陸修然，自然就開口問鍾安而





「換衫，佢係佢嗰班嘅後補，你唔知咩？」鍾安而平靜咁整理枱上面嘅資料，再反問黎昕淇

「唔知，佢冇講⋯」黎昕淇稍微一愣，佢完全冇聽過陸修然提起過佢係後補

班際比賽嘅呢一個星期，黎昕淇完全都冇聽陸修然提起過呢件事，再加上佢又冇特登睇各班嘅名單

喺學生會嘅右邊係黎昕淇所在嘅B班，左邊係D班

「江清懿加油呀！」鍾樂時企起身探頭望向江清懿對佢大嗌道





「知啦知啦！」江清懿望向鍾樂時微微點頭

「加油加油！」黎昕淇對佢嗰班嘅隊伍打氣，雖然喺學生會，但幫自己班打氣好正常，「江清懿加油！」

「收到收到！」江清懿對將手放喺額角，對黎昕淇敬個禮示意

「會長加油～」坐咗喺膠櫈上嘅鍾樂時同張詩楠望向左邊對陸修然打氣

陸修然微微頷首，望向黎昕淇嘅時候，黎昕淇啱啱好望向佢，不過黎昕淇只係冇感情咁眨一下眼

陸修然拎起貼咗防窺mon貼嘅手機，喺佢收起手機嘅時候，黎昕淇放喺裙袋嘅手機震咗一下

「做咩唔同我講加油」黎昕淇拎出手機望一眼message，又望向陸修然，陸修然啱啱好望向佢，同佢對上視線

「我嘅立場有啲尷尬」黎昕淇拎起手機回覆，佢好難喺呢個位置同陸修然講加油





黎昕淇望一望右邊嘅自己班，大家已經起身落場，陸修然嘅D班都起身，等緊做裁判嘅同學吹哨開場

「加油」黎昕淇望住喺場上做準備嘅陸修然，偷偷地喺手機打咗兩個字send出去，不過陸修然應該唔會睇到呢個加油

喺啱啱開場之際，優勢先比D班搶走，B班嘅人都睇得格外緊張，生怕睇少一眼就比D班將分差再進一步拉開

D班睇起嚟一直都游刃有餘，直到分數可始比B班追近，D班嘅隊員睇起嚟有啲緊張，兩隊嘅分數一直好接近，在場嘅人都忍唔住跟住緊張起嚟

黎昕淇探頭望一眼分牌，本來應該追隨住自己班隊嘅行動軌跡嘅目光，一直會不自覺咁注意陸修然

雖然一開始的確係D班佔上風，但B班可以打到嚟呢度都唔係可以輕視，B班開始一分一分追番嚟，將分數拉至同分

「搶到⋯！」喺陸修然從B班嘅手中搶到波嘅一刻，黎昕淇忍唔住激動咗一下，但瞬間就清醒過嚟，「我係B班㗎！我地班要贏呀⋯！」





「好緊張呀⋯！分數好近啦⋯！」鍾樂時一隻手緊張咁捉住手中嘅水樽，另一隻手捏住鍾安而嘅膊頭，「會係會長贏定江清懿贏⋯！」

喺呢個緊急嘅關頭，江清懿搶到波直接又得分，氣氛變得更緊張，只要再多一分，再射中一球⋯！

「半分鐘。」鍾安而望一眼旁邊嘅計時器

「半分鐘⋯！要再攞多一分⋯！」江清懿喺空檔中跑到隊友可以將籃球傳到比佢嘅位置

陸修然眼尾瞄到佢跑到空位，再觀察一下其他人嘅位置之後，選擇去攔江清懿

江清懿嘅隊友冒險咁將籃球照傳過去，江清懿向旁邊嘅空位一移，喺接到籃球嘅瞬間，佢決定直接跳起射籃

陸修然跳起想將射向籃框嘅籃球攔落嚟，籃球擦過佢嘅指尖直接向籃框飛去

緊張嘅氣氛喺人群中蔓延，所有人都忍住呼吸，等待勝負分出嘅一刻





「哐！」籃球完美咁穿過籃框，最後嘅勝利係屬於B班

「呼⋯」黎昕淇鬆一口氣，自己班贏咗對佢嚟講的確係一件開心事

「會長！你好勁呀！」鍾樂時同張詩楠喺陸修然行過嚟嘅時候即刻化身小迷妹，其他仰慕會長嘅人只有羨慕嘅份

「好熱⋯」陸修然冇咩顧忌咁直接拎起衫領抹汗，露出咗少許小腹嘅位置

本來轉身準備走嘅女仔都即刻停落嚟再望多兩眼，畢竟呢個畫面唔係成日可以睇到

「會長，水。」黎昕淇將陸修然嘅水樽遞到佢面前

「唔該。」陸修然接過水樽之後擰開蓋飲咗一大啖水





「我都想做遞水比會長嗰個⋯！」企喺一旁嘅女仔帶住羨慕嘅眼神低聲道，「文書係點做到企喺會長面前完全冇反應？」

「人地喺學生會日日都見住會長，仲可以有咩反應？」另一個梳起髮髻嘅女仔一臉理所當然咁講道，「又或者人地關係本來就非一般呢～」

「點可能？佢地平時睇起嚟完全就係工作拍檔嘅模式。」梳住低馬尾嘅女仔仍然偷望緊學生會嗰邊做緊咩，「而且，喺學校點可能做到密不透風？係非一般嘅話一定有人講。」

「只係講法啫，大家唔係都中意講八卦，幻想下都好嘛～」梳住髮髻嘅女仔講道，「個個都係咁講咁幻想㗎啦～」

「又唔見你幻想下你自己～」梳低馬尾嘅女仔笑道同時拉住梳髮髻嘅女仔轉身離開球場

「呢度麻煩你地啦，我去換衫先。」陸修然拎住校服就轉身朝住更衣室嘅方向行

佢一經過人群，一堆女仔即時出現喺陸修然隔離，眉飛色舞咁讚咗一大輪

「啲女仔幾時出現⋯？」黎昕淇望住比身邊一堆女仔圍住嘅陸修然，輕輕皺一皺眉頭，心入面困惑又無語，「一堆比陸修然表面呃到嘅小迷妹⋯」

喺陸修然行去廁所嘅路途上，佢拎出手機，見到來自黎昕淇嘅message，嘴角不禁微微上揚




IG Link: https://www.instagram.com/nd_cotttoncandy/?hl=zh-tw