【愛情】如地下情一樣嘅癮，係我對你嘅定義: 41. 低語

「噗⋯！哈哈！等陣、等陣！」黎昕淇一向後縮，陸修然已經伸手，黎昕淇向後灘低喺床上，腳直接一下踢起，一直轉嚟轉去掙扎，「阿然等陣！哈哈哈哈！等陣！等陣！」

陸修然鬆開咗手，黎昕淇嘴唇微張喘住氣，手捉住陸修然嘅手腕，終於可以好好呼吸一下，啱啱都要笑到窒息

「唔公平，我吱咗你一下咋⋯！」黎昕淇曲起雙腿瞓喺床上，輕皺起眉頭抱怨

「睇你下次仲敢唔敢吱我。」陸修然嘅語氣帶住半威脅嘅感覺

「唔敢啦唔敢啦⋯」黎昕淇一臉乖巧咁笑道，笑意似乎冇散去，咔一下又笑一下，「你唔好再吱我啦⋯！」





睡房內又變得安靜起嚟，兩個人似乎都冷靜咗落嚟，黎昕淇平瞓喺床上，姿勢同啱啱完全一模一樣，只係輕舔一下嘴唇，然後從裙袋中拎咗支潤唇膏搽喺唇上

陸修然安靜坐喺床邊，默默咁望住黎昕淇搽潤唇膏；黎昕淇朝陸修然輕輕抿一下唇，喺寧靜嘅環境中可以聽到細聲嘅「啵」一聲

坐喺床邊嘅陸修然側一側身，喺黎昕淇提手想拉陸修然嘅衫袖嘅同時陸修然俯身，精準咁吻喺黎昕淇水潤嘅唇上

黎昕淇嘅雙手搭喺陸修然嘅膊頭上，啱啱搽到唇上嘅潤唇膏又逐少逐少咁蹭走

逐漸熾熱嘅氣息、逐漸喘速嘅呼吸、逐漸深入嘅吻，內裏所藏嘅到底係咩感情？





陸修然嘅手放到黎昕淇嘅後腰，向上一掃到佢嘅背，本來撐住成個人嘅左手托起黎昕淇嘅腰將佢一下抱起坐喺床上

「唔⋯」黎昕淇嚇咗一嚇，扶喺陸修然膊頭上嘅手握咗一下

唾液腺嘅分泌物沿住喉嚨往下流，黎昕淇吞一啖口水，好似都分唔清吞落去嘅口水係屬於邊個

陸修然緊緊咁抱住跪坐喺床上嘅黎昕淇，黎昕淇將陸修然嘅衫角攥住喺手中

親吻嘅聲音微弱但曖昧，令人不自覺咁覺得羞澀，臉頰泛起紅霞，有種微弱嘅電流一直沿住脊椎而上到頭頂，成個人都麻咗一下





直到因為微微缺氧而疲倦嘅時候，陸修然鬆開黎昕淇，右手仍然托住黎昕淇嘅腰，左手自然垂低，耷低頭用額靠喺黎昕淇嘅膊頭上

黎昕淇嘅雙手搭喺陸修然嘅腰間，喺陸修然喘息嘅時候黎昕淇亦同樣，黎昕淇靠喺陸修然嘅懷中比佢輕輕抱住

「潤唇膏要再搽過啦⋯」黎昕淇從裙袋中拎出潤唇膏搽到唇上，輕抿一下唇，陸修然默默咁望住佢嘅唇又一次變得水潤

「仲打唔打機？」陸修然柔聲問道，唇上仍然有殘餘嘅潤唇膏嘅味道

「唔啦⋯攰⋯」黎昕淇搖搖頭，坐好起身將馬尾梳番好

陸修然起身坐喺電腦椅上，眼中係梳緊馬尾嘅黎昕淇，佢地嘅關係好似愈變愈奇怪，但講到嘴邊又唔識形容嘅感覺

「我去個廁所。」黎昕淇梳留好馬尾之後起身行出房

陸修然將遊戲機收番好，閂咗電視，打開電腦，餘光望到勾喺枱上嘅小白兔毛公仔嘅時候不禁一笑





黎昕淇企喺洗手盆前整理頭髮，望住鏡中嘅自己忽然出神

「佢點解仲咁平靜⋯？得我一個人覺得奇怪係唔係正常⋯」黎昕淇喺心入面自言自語，「搞唔明⋯」

⋯

喺一日早會嘅時候，有學生會為新活動嘅宣傳，鍾樂時今次捉咗黎昕淇同陸修然陪佢

佢捉佢地一齊絕對唔係為咗自己嘅宣傳咁簡單，仲係為咗自己可以近距離睇不為人知嘅秘密

陸修然開口講嘢嘅時候，黎昕淇自然咁將目光投向佢，臉上帶住淡淡嘅微笑，台下嘅女仔已經雙眼發光

偏沉且平穩嘅聲線、說話井井有條、整潔有禮嘅外型，再加上帶住自信同令人信服嘅氣場，的確係一個好完美且值得仰慕嘅學生會會長





黎昕淇開口回應嘅時候，陸修然側住頭望住黎昕淇，餘光都可以見到台下嘅男仔直勾勾咁望住黎昕淇嘅表情，陸修然下意識一樣咬緊牙

睇起嚟隨意但有刻意做簡單編髮嘅低馬尾、明亮嘅雙眸、溫柔嘅眼神、矜持嘅微笑，睇起嚟的確容易令人動心

「唉⋯我真係太似電燈膽啦⋯！」鍾樂時咬住唇喺心裏道

「請大家踴躍報名啦～」

佢地講完宣傳嘅最後一句就轉身落台，喺台後面有幾級梯級

「我下一級係踩邊級⋯？」黎昕淇行落去嘅時候，大腦忽然空白咗一片，唔知道自己要踩嘅到底係邊一級，但腳已經伸咗出去收唔番

黎昕淇下意識伸手捉咗陸修然嘅手臂一下，陸修然嘅餘光留意到，於是將手微微提起

「做咩？」陸修然低聲關心嘅同時，黎昕淇連跨兩級踩到平地





「冇，空白咗一下⋯」黎昕淇以只有兩個人先聽到嘅聲量回答，「唔知要踩邊級。」

早一步到地嘅鍾樂時偶爾回頭，一擰轉頭就見到兩人嘅舉動，心入面又激動咗一下

「果然我叫佢地陪我做宣傳唔係白費⋯！」鍾樂時忍住笑意，喺內心激動咁講道，「其他人唔知道真係好可惜⋯！」

鍾樂時望住眼前保持距離嘅兩人，心入面默默嘆氣：「唔知佢地一齊咗幾耐呢？如果一齊咗好耐但到最近先比我發現都好厲害⋯！佢地咁忍得嘅⋯」

「今次應該都要搵Helper幫手，洗唔洗貼定紙通知？」黎昕淇有意提醒問道

「貼定啦，同Miss Chung講聲叫佢陣間喺召集時間講。」陸修然講完就行咗去搵Miss Chung，Miss Chung聽完陸修然講嘅嘢微微點頭

陸修然番嚟嘅時候，黎昕淇同鍾樂時都望向佢嘅方向，但陸修然下意識就揀咗望向黎昕淇，然後微微點頭示意佢已經同Miss Chung講咗





「我真係好似電燈膽⋯」鍾樂時將兩人嘅下意識嘅小動作睇喺眼內，得出一個無奈嘅結論

喺早會結束之後，Miss Chung召集咗學生會成員同支援組嘅同學，講解嚟緊嘅活動安排

黎昕淇嘅左邊係鍾安而，右邊係陸修然，呢個組合睇起嚟就好似校園入面嘅鐵三角一樣

鍾樂時企喺三人嘅對面，左邊企咗兩個女仔，一睇就知做支援人員係衝住佢地嘅會長同副會長而來

聽住佢地你一言我一語嘅悄悄話，字裏行間都係仰慕，視線鎖死喺同一個方向，似乎完全冇聽Miss Chung講嘅嘢




IG Link: https://www.instagram.com/nd_cotttoncandy/?hl=zh-tw