【愛情】如地下情一樣嘅癮，係我對你嘅定義: 42. 提醒

解散嘅時候，鍾樂時估呢兩個人應該完全冇留心聽啱啱講嘅嘢；鍾樂時行喺兩人後面偷聽佢地嘅對話

「我都想企喺會長同副會長中間⋯！」「都唔知要羨慕好定妒忌好⋯」

「唉⋯所以話做Hepler係啱㗎⋯」「黎昕就好啦，成日都同會長一齊⋯」

「不過佢地好多時都一齊，加埋副會長真係更加不得了！」「唔知會長有冇女朋友呢？冇嘅話留個位比我都好⋯後備都得⋯！」

「會長有女朋友啦，後備都唔會留比你⋯」鍾樂時喺心裏回答佢嘅問題，「你冇聽過佢氹黎昕真係太可惜～」





「唔係會長嘅話，副會長都得！」「副會長都唔錯，雖然我比較偏向會長呢類。」

「咩意思呀？當我哥後備呀！？」鍾樂時喺心入面為鍾安而抱打不平，「太過份啦⋯！」

鍾樂時輕哼一聲，都懶得再聽佢地講嘅嘢，直接從佢地身邊行過

鍾安而番到課室嘅時候，其他人都已經交緊功課

「副會長，中文默書改正差你嗰本咋～」坐喺鍾安而隔離嘅鄭洛苡提醒一聲，佢嘅枱上放咗其他人交過嚟嘅默書簿





「唔該。」鍾安而坐低，將默書簿放到鄭洛苡嘅枱上面

最近佢地班調咗位，鄭洛苡坐咗喺鍾安而隔離嘅位置，本來都有啲熟嘅兩個人一齊坐之後好似又熟咗啲

「嗒。」鍾安而放喺枱邊嘅筆跌咗落地上

鍾安而彎低腰準備執起跌咗喺路中心嘅筆嘅時候，鄭洛苡攬住數齊嘅默書簿起身，餘光見到鍾安而嘅筆嘅時候順手彎腰將筆執起，輕放喺鍾安而嘅枱上

「唔該⋯」鍾安而嘅動作一頓，抬頭坐起身嘅時候正眼對上鄭洛苡嘅目光





「唔洗～」鄭洛苡帶住甜美嘅微笑點一點頭，然後轉身行出課室去教員室嘅簿櫃

鍾安而愣咗一下，耷低頭嘅時候托一托眼鏡，嘴角自動微微上揚，就算努力咁抿緊唇都難以抑制嘴角上揚

「咳⋯」鍾安而輕咳一聲令自己冷靜少少，收起笑容坐喺位等上堂

⋯

晏晝食飯嘅時候，鍾安而食到一半見到手機有新message，本能反應下望向手機，眼見係學生會嘅group message，鍾安而淡然咁食埋口中嘅嘢先緩緩拎起手機

「今日又開會？」坐喺鍾安而對面嘅江清懿望住鍾安而嘅無奈表情，即刻就估到咩狀況

「嗯。」鍾安而點一點頭，佢都習慣咗一有活動會連我開會，因為仲有好多比賽或者活動相關嘅事要處理，「應該食飯之前番到，幫我講聲。」

「哦。」江清懿冇太多猶疑，爽快咁點頭





不過放學前嘅一堂遲咗落堂，鍾安而到會室嘅時候，其他人都已經到齊，就差佢一人

「唔好意思，遲咗落堂。」鍾安而行到黎昕淇隔離嘅空位拉開櫈坐低

「唔緊要，齊人就開始啦。」陸修然講道

大家都習以為常咁分工，討論完就開始做自己該做嘅一部分，有新嘅想法就會提出一齊解決下

雖然大家各有崗位，但始終係一個團隊，唔互相合作、幫助，好難做出一份好睇嘅匯報結果

黎昕淇從座位起身，轉身企到書櫃前面，伸手想拎放喺架上嘅文件夾，不過就算係踮起腳尖都有啲勉強

「副會長，可唔可以幫我拎一拎？」黎昕淇轉身向坐佢隔離嘅鍾安而求救





「你要拎啲咩？」鍾安而聽到之後企起身行到黎昕淇隔離

陸修然抬頭望咗一眼，喺大家察覺唔到嘅時候輕皺起眉頭，可能係連陸修然自己都冇察覺到

「上面藍色個file，參考下之前係點編排。」黎昕淇伸手指一指

比黎昕淇高半個頭嘅鍾安而提手，輕易咁將藍色嘅file拎落嚟，其實黎昕淇都唔算矮，不過就係差少少先拎到

「唔該。」黎昕淇禮貌道，然後同鍾安而一樣轉身番埋位坐低，黎昕淇側一側身，將電腦嘅螢幕轉向鍾安而，「你覺得呢個編排好唔好？」

「個間隙會唔會太短，可能唔夠時間？預番少少時間比佢over run。」鍾安而望住黎昕淇寫嘅活動編排，伸手指住活動時間，「可能有啲太貼。」

「十五分鐘係唔係好啲？」黎昕淇將本來嘅時間刪走改成有十五分鐘嘅預留時間，「睇起嚟好似會好啲？」

陸修然一直輕皺住眉頭，其他人冇特別留意，除咗鍾樂時；鍾樂時望向對面，見到鍾安而同黎昕淇坐得有啲近，下意識就朝陸修然望咗一眼





「嬲啦⋯」鍾樂時心中一頓，「可惜會長又唔可以當面嬲，要默默咁嬲⋯快啲坐開啲啦鍾安而⋯！」

陸修然拎住筆喺紙上快速咁寫嘢，佢都冇完全察覺到自己嘅感覺，只係覺得有種不爽凝聚喺心頭

黎昕淇一直同鍾安而有講有笑，睇起嚟討論緊其他事，鍾樂時每隔兩秒就偷瞄陸修然一眼，想睇佢嘅反應

陸修然忽然起身，喺書櫃前經過打算出去會室，行嘅時候唔小心踢咗黎昕淇嘅櫈一下，本來想同鍾安而再講啲咩嘅黎昕淇，說話到嘴邊即刻吞番落去

「Sorry。」陸修然道歉，但睇起嚟冇咩悔意可言

陸修然講完之後頭也不回咁行出會室，鍾樂時因為愕然而雙眼瞪大咗一下，不過佢唔想引人注目，隨即就耷低頭當冇睇到任何嘢

「會長真係嬲啦⋯」鍾樂時喺心裏道





鍾安而同鍾樂時偶然咁對上眼，鍾樂時即刻瞪咗佢一眼；可能真係兄妹之間嘅心靈感應，鍾安而即刻就明白鍾樂時嘅意思，悄然地移開少少

今日手頭上嘅目標工作做得差唔多之後，大家都已經準備好番屋企，時間已經係黃昏

陸修然喺去車站嘅路上嘅時候，黎昕淇就行喺佢正前方，陸修然冇追上去，一直保持住一段距離行喺佢身後

上車嘅時候什至連坐嘅地方都唔會喺正對面，會坐大斜角嘅位置，有時已經唔係怕唔怕其他人知嘅問題，而係形成咗一種習慣

喺列車駛離月台嘅時候，陸修然探頭左右望一望，確定冇學校嘅人之後起身坐低喺黎昕淇隔離

彼此有默契咁沉默不語，安靜咁坐喺對方身旁，黎昕淇嘅餘光卻一直默默咁留意住陸修然嘅一舉一動




IG Link: https://www.instagram.com/nd_cotttoncandy/?hl=zh-tw