【愛情】如地下情一樣嘅癮，係我對你嘅定義: 55. 咬痕
「痛⋯！」黎昕淇咬緊牙、握緊拳頭，比較尖銳嘅犬齒戳喺佢細嫩嘅肌膚上嘅時候痛感更加明顯
陸修然鬆開口，黎昕淇嘅手臂上有一個好明顯嘅牙印，黎昕淇嘅眼神中夾雜住一絲嘅不知所措
「你咬我做咩呀！」黎昕淇一臉委屈咁望住自己手上明顯嘅牙印，牙印傳嚟一陣陣微弱嘅刺痛感，「聽日點番學⋯！」
「著冷衫。」陸修然理所當然道，「你上次都叫我戴口罩，咁你著冷衫番去。」
「你特登係唔係！？」黎昕淇氣沖沖咁問陸修然
望住手上好似記號一樣嘅牙印，黎昕淇有啲不解但又好似可以估中呢個記號嘅意思
黎昕淇嘅指尖喺凹凹凸凸嘅牙印上輕掃而過，落喺手上嘅記號好似盛載住一個人最明顯嘅佔有慾一樣
喺唇上嘅痕跡又好、手臂上嘅瘀痕又好、前臂上嘅咬痕都好，看似無意嘅發洩，答案其實都收喺呢啲痕跡入面
陸修然行到梳化，坐喺梳化嘅扶手上面；黎昕淇嘅視線跟隨住陸修然移動
「無聊⋯」黎昕淇喺心入面默默咁講咗一句，然後行到陸修然嘅面前，「你話你咬到我隻手咁樣，聽日我要點樣番學？」
「著冷衫。」陸修然捉住黎昕淇嘅手腕，佢宜家嘅視線同企喺度嘅黎昕淇幾乎係同一水平
陸修然嘅腰都冇平時挺得咁直，一放咗學番到屋企，佢就會卸下會長嘅面具，變番平日連講嘢都有種慵懶感嘅陸修然
「哦。」黎昕淇輕力推咗陸修然嘅膊頭一下，陸修然坐得穩陣，郁都冇郁
「不自量力。」陸修然捉起黎昕淇嘅手，另一隻手托喺佢嘅下巴輕捏住佢嘅臉頰
「你就不自量力。」黎昕淇反駁咗一句
喺對視嘅時候，大腦會好似有雜訊一樣，喺空白間又夾雜住一啲不知名嘅感覺，喺就嚟要感受到嘅時候又回縮番去
愈想了解係咩感覺，感覺就會變得愈模糊，愈唔了解嗰種感覺係啲咩⋯
⋯
第二日番學嘅時候，黎昕淇一直著住長袖冷衫，完全冇將佢嘅前臂露過出嚟
「你好凍咩？今日番嚟已經著住冷衫。」江清懿望奇怪嘅眼神打量黎昕淇，「課室都唔係好凍啫。」
「有啲凍。」做緊聽日交嘅功課簿嘅黎昕淇完全冇感情咁點頭回應
「平時都唔見你著冷衫。」江清懿覺得有啲新奇，平日好少會見到黎昕淇著冷衫什至著住冷衫番嚟，「好稀有。」
黎昕淇懶得繼續解釋，偶然將筆放低喺枱上面鬆一鬆手指、望向外面嘅時候，陸修然同莫淮禮喺外面經過
陸修然自然咁從向走廊嘅大玻璃窗望入B班嘅課室內，見到黎昕淇著住冷衫坐喺位
「又真係著冷衫。」陸修然喺心裏笑道，「平時明明好唔中意著冷衫。」
「佢個心實喺度笑我今日著冷衫⋯」黎昕淇同陸修然對視嘅瞬間，黎昕淇嘅第一個想法係覺得陸修然會笑佢
黎昕淇將放喺櫃桶嘅手機拎出嚟，偷偷地send咗個message比陸修然叫佢唔好喺心入面偷笑
「黎昕，陣間嗰堂係咪小測？」江清懿伸手拍咗黎昕淇嘅枱邊一下，黎昕淇嚇咗一跳，反射動作令佢將手機鎖屏推入櫃桶
「哦，係呀⋯」黎昕淇成個人都愣咗一下，大腦都未回過神：「嚇死人咩⋯」
「Okay～」江清懿起身離開座位行出課室
江清懿一行開，黎昕淇嘅視線更加清晰，留意到陸修然嘅視線落喺江清懿身上，然後默默收回之後同莫淮禮講咗兩句
「講緊咩⋯？」黎昕淇有啲好奇，不過佢又唔想估，「應該都唔係啲咩重要嘢⋯」
黎昕淇再一次將手機從櫃桶拎出嚟，但係一個新通知都冇
「都正常，佢都未番到課室。」黎昕淇喺心裏道，解鎖後嘅頁面係啱啱未退出嘅對話框
上面係一句句唔淨止係講學生會嘅事同簡潔嘅對話，都會有其他嘅內容，由佢地都冇察覺到嘅嗰一日開始，對話漸漸變得唔再單薄且枯燥乏味
睇番以前嘅對話，都離不開「今日開會」「好」「知道」呢啲重複度極高嘅說話，大概係喺搜尋對話打呢啲字會彈出一大堆一模一樣嘅搜尋結果，但最近嘅對話反而生動咗唔少
雖然分享類嘅內容好少，佢地好少會分享自己嘅日常，可能因為喺離開學校之後都會見面
晏晝食完飯番嚟之後，黎昕淇拎起一疊朝早收號功課簿、夾好點名紙交落去老師嘅簿櫃
黎昕淇到達一樓嘅教員室，一轉彎就見到陸修然企咗喺教員室門口
「你喺度嘅？」黎昕淇行到陸修然面前，問出口先記得佢宜家喺學校，即刻又再補問一句：「搵Miss Chung？」
「嗯，係。」陸修然回答同時留意到黎昕淇手上攬住嘅簿
「哦。」黎昕淇微微點頭，轉身朝住斜對面嘅簿櫃行過去嘅時候，見到遠佢好遠、喺前梯過緊嚟嘅江清懿，「你又喺度嘅？交簿？」
「黎小姐，你拎漏咗我嗰本呀⋯」江清懿將拎喺手上嘅簿放喺簿面，「想屈我欠功課？」
「明明係你啱啱先交，我落嚟之前有再點一次數㗎。」黎昕淇將江清懿嘅簿按學號放番好
黎昕淇提手一推，將簿推到簿櫃嘅中央放好，兩人打算從前梯番去，因為前梯比較近佢地嘅課室
「你行未？」江清懿順口咁問咗黎昕淇一句
「行啦。」黎昕淇微微點頭，江清懿先一步轉身行
黎昕淇喺要邁步嘅時候喺原地微微轉頭望咗陸修然一眼，Miss Chung啱啱好推門從教員室出嚟，陸修然嘅注意力都放喺要搵Miss Chung拎嘢上
「你行咁慢？」江清懿擰轉身等埋黎昕淇，黎昕淇稍微加快少少腳步行過去
「宜家咪行緊過嚟。」黎昕淇上前行喺江清懿隔離，行咗兩步又回頭望咗一眼
陸修然剛好朝佢嘅方向望過去，兩人嘅視線對上，但陸修然嘅視線只係停留半秒就繼續專心聽Miss Chung講嘢，視線落喺Miss Chung手上拎住咗釘裝紙上
喺兩人之間忽然冒出一種疏離感，從眼底嘅倒影都可以感覺到嗰份特登要拉開距離嘅淡然
「真係難觸摸⋯」黎昕淇默默嘆氣，佢同陸修然之間嘅距離忽遠忽近，有時都會覺得有啲迷惘
以前嘅佢地從來唔會有呢種距離感，一直都係喺人前扮演住陌生人嘅角色，私下亦唔算太親近
一吻成癮係呢段關係最大嘅轉捩點，加上大家都喺學生會，接觸嘅機會變得多咗，感覺親近咗唔少
IG Link: https://www.instagram.com/nd_cotttoncandy/?hl=zh-tw