【愛情】如地下情一樣嘅癮，係我對你嘅定義: 56. 下台階
「唉⋯好麻煩⋯」黎昕淇喺心入面講出佢嘅口頭禪
諗起啱啱陸修然帶點冰冷嘅眼神，黎昕淇嘅眸色一沉，佢可以察覺到陸修然嘅視線中嘅冷淡，心裏討厭佢呢種故意表露比佢睇嘅冷淡
黎昕淇諗到啲咩一樣抬頭望咗江清懿一眼，但呢個問題唔會有答案，因為黎昕淇唔會問出口
黎昕淇嘅腳提起一半，諗嘢諗得太入神嘅佢都冇留意到腳前嘅梯級，直接向前絆咗一下
「喂！」江清懿伸手捉住黎昕淇嘅手踭，「睇路呀！」
「唔該。」黎昕淇企穩之後將手抽番出嚟，江清懿都即刻有分串咁鬆開手
「諗嘢還諗嘢，但都要睇路。」江清懿無奈咁行喺前面
「冇諗嘢。」黎昕淇下意識就否認
放學之後，陸修然要去會室一趟，想影低少少嘢番去睇下點做好
陸修然推開會室嘅門，裏面傳嚟清脆嘅打字聲，係黎昕淇坐喺電腦前打緊字
黎昕淇嘅餘光見到陸修然行入嚟，但冇特登抬起頭望；陸修然放低書包喺其中一張櫈上面，然後就伸手朝放喺長枱上嘅文件埋搵佢要嘅file
兩人各自做自己嘅嘢，陸修然拉開櫈坐低，打開file睇佢要睇嘅內容，專心致志嘅模樣睇起嚟完全唔受其他事打擾
黎昕淇一直打緊會議嘅記錄內容，雙眼一直望住電腦嘅螢幕，敲喺鍵盤上嘅聲音清脆利落，比人一種好有效率且爽快嘅感覺
陸修然靠喺櫈背上，抬頭望向窗外嘅同時，視線不自覺咁朝黎昕淇嘅方向
挺得畢直嘅腰、認真嘅眼神同表情、爽快利落嘅打字聲，只要處於工作狀態，黎昕淇就會認真對待，唔會比自己出錯一樣嘅認真態度
過咗大約十五分鐘，黎昕淇將成份記錄都打好，直接將檔案上傳到學生會嘅drive
「唔⋯！」黎昕淇覺得自己一直專心咁望住電腦螢幕，雙眼同腰都有啲攰，所以舉高雙手伸咗個懶腰，「會長，你仲喺度嘅？等緊我？」
「唔係。」陸修然起身拎起書包孭到背上，行到黎昕淇隔離望住電腦螢幕，「你仲未做完？」
「搞掂啦。」黎昕淇閂咗電腦，拎起書包嘅時候陸修然已經行到去門前，完全冇等埋佢嘅打算
陸修然拉開門行出會室，黎昕淇黎昕淇將長袖冷衫除落嚟，將冷衫搭喺前臂上後行到門邊閂燈，打開會室嘅門嘅時候已經見唔到陸修然嘅身影
「行得咁快⋯」黎昕淇鎖上會室嘅門，轉身行離會室門口嘅位置，一向前踏一步，黎昕淇即刻頓咗一下，「你企喺度嚇邊個⋯？」
因為會室嘅位置係凹入去，所以要行出一步先會見到走廊嘅位置，一踏出一步就見到陸修然成個人企咗喺度
「你行未？」陸修然瞄咗搭喺黎昕淇手臂上嘅外套一眼
「行啦，鎖咗門。」黎昕淇微微點頭
陸修然轉身就行，黎昕淇攬住冷衫追上前，佢本來仲以為陸修然真係唔等佢直接番屋企，出咗門口先發現原來陸修然有等佢
「唔怕比人睇到？」陸修然淡然問咗一句，聽起嚟冇指向性嘅說話其實意有所指
「唔怕，呢度得我同你，而且我用冷衫遮住咗。」黎昕淇望一望周圍，又將搭住冷衫嘅手提一提起示意
「嗯。」陸修然冇再講多餘嘅說話，點一下頭就繼續向前行
「好似有啲冷淡⋯」黎昕淇望住陸修然嘅側面，喺思考片刻後小心翼翼咁開口：「你心情唔好？」
「唔係。」陸修然搖搖頭，「冇心情唔好。」
陸修然用餘光悄然留意住黎昕淇嘅表情變化，佢嘅心情稱唔上唔好，不過都冇特別好
有一層薄薄嘅陰霾籠罩喺心頭，令陸修然嘅心情唔太好，完全笑唔出，只係佢眼神中嘅冷淡佢自己睇唔到
陸修然同黎昕淇之間嘅距離拉開咗少許，喺路上一如既往安靜，但呢份安靜入面夾雜住異常感
「今日晏晝之後，就心情唔好啦？」黎昕淇認真咁望住陸修然問道
喺等待陸修然嘅回答嘅時候，黎昕淇一直定睛望住佢，佢嘅直覺一早已經講咗原因，但黎昕淇冇選擇相信自己嘅直覺
陸修然嘅瞳孔稍微放大咗一下，呢個提問對陸修然嚟講係意料之外嘅事，佢沉思咗一陣，望住黎昕淇嘅雙眼用冰冷嘅語氣道：「嗯。」
呢個回答直接用力戳喺黎昕淇嘅心中令佢心臟一縮，默默咁吞口水但又唔知可以講啲咩
「點解⋯？」黎昕淇一開口就係提問，佢本來都冇打算問一個結論，「算—」
正當黎昕淇想講一句當佢冇問過之際，佢嘅手機忽然響起嚟
陸修然瞄咗一眼來電顯示，上面寫住「江清懿」三個字
「喂？江清懿？」黎昕淇冇任何避忌，直接就喺陸修然嘅面前㩒咗接聽，「做咩？」
陸修然深呼吸一口，喺黎昕淇揀咗聽電話嘅一刻，心中嘅厭煩感一湧而出，默默咁加快腳步，佢同黎昕淇嘅距離頓時拉開
黎昕淇望住忽然行得好快嘅陸修然，佢嘅猜測已經中咗一大半
「我有啲事，唔番嚟加更啦，拜拜。」黎昕淇嘅語速加快，語氣卻依舊平靜，冇露出一絲嘅破綻，「喂！」
收線之後嘅第一件事，係追上前拉住陸修然嘅手踭，陸修然嘅腳步頓時一頓，但好快又回復正常
「做咩？」陸修然若無其事咁問，但卻將手從黎昕淇嘅手中抽出嚟
黎昕淇嘅手懸喺半空，連佢自己都估唔到，陸修然居然會避開佢嘅手；佢望住陸修然，但想要講嘅說話到嘴邊又講唔出
兩人一直沉默咁番到屋企樓下，喺𨋢入面嘅時候兩人都格外安靜，呢種安靜令𨋢內嘅空氣都瞬間凝固
𨋢到咗黎昕淇住嘅樓層嘅時候冇停落嚟，而係再上兩層之後先停低，黎昕淇先一步行出𨋢企喺𨋢門前
「你唔番去？」陸修然行出𨋢企喺黎昕淇隔離問咗一句
眼見黎昕淇冇回答，佢直接行到自己嘅屋企門口用鎖匙開門，推開門之後行入屋，但冇將門閂埋
IG Link: https://www.instagram.com/nd_cotttoncandy/?hl=zh-tw