【愛情】如地下情一樣嘅癮，係我對你嘅定義: 96.

鍾樂時跟喺江清懿嘅身後行入屋，然後企喺門邊除鞋，江清懿彎腰將皮鞋放到鞋架上面，鍾樂時將自己嘅皮鞋放喺江清懿嘅鞋隔離

「你地咁早嘅？安而呢？」江阿姨從廚房行出嚟

「佢未番到掛，啱啱冇見到佢。」江清懿停低腳步，行番房換衫之後行入廚房企喺江阿姨隔離，「你今日唔洗番工咩？」

「今朝起身嘅時候頭痛得太厲害，所以請咗假。」江阿姨拎起湯殼，然後將煲蓋蓋上，「煲個湯啦～」

「好呀。」江清懿酙咗杯水，企喺焗爐前安拖靜咁飲水





「你今日同細妹一齊番嚟嘅？」江阿姨朝廚房門口望咗一眼，然後望咗江清懿一眼問道

「同一間學校，番嚟撞到有幾出奇⋯」江清懿第一個感覺係覺得呢個問題好似明知故問一樣，但佢唔蠢，知道媽媽咁問應該仲有嘢想問，「做咩突然咁問？」

「你同細妹，唔好玩得咁埋⋯」江阿姨嘅語氣中夾雜咗一絲嘅憂慮

「你當你個仔係咩人⋯」江清懿聽到媽媽嘅說法，佢即刻就明白佢嘅意思，「我唔會啦⋯」

「去睇下今晚食咩先～」鍾樂時將髮圈除落嚟，用手抓一抓頭髮後行出房





差唔多行到廚房門口嘅時候，鍾樂時聽到廚房內傳嚟低聲嘅說話聲，八卦嘅本能令佢自然咁貼住牆匿喺一邊聽

「細妹最近好似成日痴住你。」江阿姨道，「你有啲分寸知唔知？」

「我知，我對樂時冇咩心思，我知道唔可以。」江清懿肯定嘅語氣聽喺鍾樂時嘅耳中格外刺耳，「佢平時都痴鍾安而，當然我知道唔一樣，但我清楚自己嘅位置。」

鍾樂時背靠住牆扁起嘴，每一下心跳都唔再輕鬆，好似有重力壓喺胸口上一樣，眼眶忽然濕潤

一早就知道呢份感情唔會有好下場，唔會被接受，一早已經做好心理準備會係呢個結果，但心理準備同親耳聽到係兩回事





「呵～欠⋯我要番房瞓陣啦⋯」江清懿打咗個喊露行出廚房

行出廚房嘅時候第一樣見到嘅係鍾樂時匆忙跑番房跑情境，江清懿回頭望咗一眼

「佢係唔係聽到⋯？」江清懿猜測道，「但佢做咩跑番房⋯？唔會係真係⋯」

江清懿唔算遲鈍，唔多唔少都可以感覺到鍾樂時最近對佢嘅態度，成日唔係留喺佢房喺佢隔離發呆，就係會有啲比較親密嘅舉動

望到鍾樂時咁樣對鍾安而，江清懿唔覺得奇怪；但見到鍾樂時咁樣對自己，江清懿總係覺得自己好似罪人一樣犯錯

「就算真係都冇辦法，我啱啱講嘅都係事實。」江清懿喺心中道

另一邊廂，黎昕淇拎住手掣坐喺床上，佢已經連輸咗三場，處於唔忿氣但又無可奈何嘅狀態

「唔玩啦，又係你贏晒！」黎昕淇將手掣扣番喺遊戲機上





「咁我都冇辦法，你冇我咁叻。」陸修然嘅說話聽起嚟好似挑釁一樣，佢將手掣放番好，閂上床尾嘅電視

「你好煩呀陸修然！」黎昕淇低聲哼一聲後拎起手機，但只係呆坐喺床上冇睇任何嘢，「你做咩唔換番屋企衫？」

「冇所謂啦，你走咗先換都一樣。」坐喺電腦椅上嘅陸修然低頭望一眼身上嘅校服，冇所謂咁聳肩

陸修然抬頭，同黎昕淇對視一秒後，起身行到門前閂上一直虛掩住嘅房門，將校呔向下拉鬆

「你做咩？」黎昕淇呆咗一秒先再次回神

「換衫。」陸修然嘅手捉住領結，以毫無波瀾嘅語氣同表情回答

「你等我出咗去先換！」黎昕淇猛然起身朝房門口行去，但行咗兩步就比陸修然攔截住





陸修然冇比機會佢掙脫，伸手攬住黎昕淇，低頭準確無誤咁將佢嘅唇封住

「唔⋯！」黎昕淇向後退一步，陸修然就向前行一步，退兩步就行兩步，直到黎昕淇嘅腳跟撞到床邊跌坐喺床上，「陸修然！」

「係。」陸修然一副乖巧嘅模樣回答

「你唔好咁離譜呀⋯！我咁大個人仲喺房入面你換咩衫！」黎昕淇皺起眉頭氣沖沖咁問，臉頰早就泛起紅霞

「我點可能真係會。」陸修然望住黎昕淇嘅反應滿意咁笑

「陸修然！你特登玩我係唔係！」黎昕淇伸手就喺陸修然嘅手臂上搣一下

陸修然坐低喺電腦椅上，望住陸修然臉上得意洋洋嘅笑容，黎昕淇就覺得自己又比陸修然玩咗一次

黎昕淇側身訓低喺床上，拎住手機側住頭睇，陸修然望住冇顧忌佢嘅黎昕淇， 轉身戴上耳機望向電腦，開晒佢要睇嘅嘢之後朝黎昕淇遞出右手





黎昕淇嘅目光從手機嘅螢幕上移開落喺陸修然嘅手上，喺收回視線同時伸出手，將手放喺陸修然嘅手心上

過咗一陣之後黎昕淇起身去廁所，去完廁所番嚟就見到陸修然灘咗喺床睇手機

「做咩灘低咗？」黎昕淇坐低喺陸修然隔離，「唔睇電腦啦？」

「陣間先睇。」陸修然拎住手機，一直睇緊group嘅新message

「哦。」黎昕淇冇多講啲咩，沉默咗一陣之後回頭望向陸修然，心入面有啲想攬，但佢又唔想咁主動

「喂！」黎昕淇喺陸修然嘅大髀上用力搣咗一下，陸修然頓時縮腳坐起身，「又搣我⋯！」

見黎昕淇唔出聲，陸修然探頭望一眼，伸手攬住黎昕淇後彎腰將下巴靠喺黎昕淇嘅膊頭上





「做咩？」陸修然問道

「冇咩，就係想搣你。」黎昕淇笑一笑道，佢就係覺得冇嘢做所以搣佢一下

陸修然頓時無言以對，黎昕淇成日都搣佢，有時會好明顯咁紅咗一塊，但叫佢還手嘅佢，佢又唔太捨得⋯

陸修然喺黎昕淇嘅膊頭上蹭咗兩下，頭髮令頸上傳嚟痕癢嘅觸感，黎昕淇不禁縮咗一下、笑咗一笑

「好痕⋯」黎昕淇想轉身望一眼，點知陸修然緊緊咁抱住佢喺懷中，黎昕淇想郁都唔太郁到，「我又唔係要走去邊⋯」




IG Link: https://www.instagram.com/nd_cotttoncandy/?hl=zh-tw