【愛情】如地下情一樣嘅癮，係我對你嘅定義: 97.
黎昕淇起身，坐喺陸修然嘅雙腿間，背安心咁靠住佢，總覺得咁樣坐嘅話有滿滿嘅安全感
陸修然從後將黎昕淇抱住，雙手環抱住佢嘅腰，黎昕淇將自己嘅重心都放喺陸修然身上
「你好凍？手都好冰。」陸修然捉起黎昕淇嘅手，握住喺手中
「成日都係咁，都慣啦。」黎昕淇回握陸修然嘅手一下，「你好似暖包，成日都好暖。」
「咁樣都幾好，唔係咩？」陸修然伸手拎手機，就咁樣喺抱住黎昕淇嘅狀態下睇手機，畢竟佢冇咩秘密喺手機
黎昕淇忽然轉身攬住陸修然，喺佢嘴邊輕吻一下，同陸修然愕然嘅視線對上嘅時候，黎昕淇只係一笑
「容易比人撩起嘅，到底係你定係我自己⋯？忽然間都有啲迷惘⋯」陸修然低聲講道，心底有嘢一直湧動
「係你，因為係你撩我先⋯」黎昕淇調整坐姿，又喺陸修然嘅嘴邊輕吻一下
陸修然下一秒抱緊黎昕淇，黎昕淇都未反應得切已經瞓咗喺床上面，陸修然彎下腰之際，黎昕淇連忙伸手抵住
「喂⋯！你好重呀⋯！」黎昕淇提起手只係形式上抵抗一下
「我都冇壓落嚟。」陸修然低頭望咗一眼，將黎昕淇抵住佢膊頭嘅手拎走，直接吻喺黎昕淇嘅唇上
黎昕淇嘅手喺比陸修然捉住嘅瞬間就冇用力，本來佢就冇抵抗嘅打算，如果係要抵抗，幾個月前就已經抵抗咗⋯
黎昕淇雙手捧住陸修然嘅臉頰，冰涼嘅觸感令陸修然下意識向後縮咗一下；黎昕淇見陸修然一縮，手就往陸修然嘅後頸伸去，撥開佢嘅衫領放喺佢嘅後頸上
「你好暖⋯」黎昕淇稍微用力將陸修然拉向自己
「你做咩成日都咁凍？點樣先會暖？」陸修然忍耐後頸傳嚟嘅壓低聲線問道，不過佢冇打算等待黎昕淇嘅回答
比起講到嘴邊嘅單字，嚟得更快嘅係落喺唇上熟悉嘅觸感，黎昕淇悄悄用力吸一口氣，因為佢知道接住落嚟比佢呼吸一啖新鮮空氣嘅機會唔多
陸修然完全冇放過黎昕淇嘅打算，明知道對黎昕淇嚟講最敏感嘅位置係頸，佢故意湊近頸嘅位置，黎昕淇頓時縮咗一下
「陸修然⋯！」黎昕淇忍唔住輕推眼前人嘅膊頭，然後一拳打喺佢嘅膊頭上，「你特登係唔係⋯！」
「你有咁易面紅？」陸修然望住兩頰紅紅嘅黎昕淇，將想上揚嘅嘴角往下壓以保持表面嘅平靜
「係因為你特登⋯！」黎昕淇雙手掩住臉，喺食指同中指間留一條縫令佢可以望到陸修然忍笑嘅表情，「會長你仲笑！」
「我冇笑。」陸修然將所有笑意收起，因為見到黎昕淇嘅難為情
陸修然彎低腰，手穿過腰同床褥間嘅空隙將黎昕淇攬住，頭靠喺黎昕淇嘅膊頭上嘅時候睇起嚟好似好乖一樣
「會長你好重⋯」黎昕淇口係咁講，但仍然由得佢攬，鼻尖前傳嚟嘅都係屬於佢嘅味道
「放咗學啦⋯」陸修然低聲回頭
「冇咗嗰個痕⋯」黎昕淇嘅手伸入陸修然嘅衫袖入面，但摸唔到佢早前留喺佢手臂上嘅咬痕
「陣間比你留多個⋯」陸修然嘅語速比起啱啱緩慢
「會長，你睇起嚟好乖。」黎昕淇嘅手放喺陸修然嘅後尾枕，抓一抓佢嘅頭髮
「係咩⋯」陸修然嘅聲線聽起嚟比啱啱顯得疲倦，靠喺黎昕淇嘅膊頭上時睡意忽然湧出嚟
「你要壓住我瞓？」黎昕淇側一側頭，眼見陸修然已經就嚟瞓著
陸修然緩緩起身，轉移位置去靠牆嘅一邊瞓低，黎昕淇坐起身打算讓個位比佢瞓嘅時候，陸修然伸手拉住佢
黎昕淇回頭，見陸修然合起雙眼平瞓，感覺下一秒已經可以直接入睡；黎昕淇低頭望一眼自己嘅手，有啲猶疑係唔係要瞓番低
「眼瞓⋯」陸修然感覺隔離嘅位置冇重力落去，又拉咗黎昕淇嘅手一下暗示道
黎昕淇將手機握緊喺手中，面向陸修然側身瞓低，就算已經唔係第一次見到睡顏，但仍然會因為緊張而心跳加速
喺黎昕淇瞓低，頸枕喺陸修然嘅手上，放喺佢頸下嘅手輕輕握拳，陸修然下意識一樣將左腳曲起踩喺床上
黎昕淇抬頭望咗陸修然一眼，見佢好似已經瞓著咗就拎起手機睇
「呢個時候覆楚妍都搞到有啲心虛⋯」黎昕淇望住未讀嘅訊息，心入面都有啲慌張
陸修然察覺到黎昕淇微微嘅郁動，手頓時往黎昕淇嘅膊頭一抱，感覺到黎昕淇仍然喺佢身邊先緩緩鬆開手
「你怕我走呀？」黎昕淇轉身面向陸修然，嘴角帶住淡淡嘅笑意問道
「唔係⋯」陸修然搖頭，手卻默默咁將黎昕淇牢固咁抱住，「你中意走可以走⋯」
「陣間啦。」黎昕淇搵到一個靠得舒服嘅位置就瞓番好
睡意一直打轉，但係陸修然卻瞓唔著，可能因為黎昕淇喺佢隔離，佢嘅香味令佢冇辦法專心咁將睡意凝聚起嚟⋯
⋯
宋楚妍一直點頭，雙眼自動咁合埋又努力睜開，老師講嘅內容喺左耳入卻喺右耳一字不漏咁出番嚟
上完呢一堂之後同冇上過堂一樣，完全冇得到新嘅知識，下一次上堂嘅時候又再重複一次呢個循環
「醒啦⋯！」黎昕淇見到老師行過嚟佢地呢邊嘅時候，即刻拎起筆戳宋楚妍一下
「呀⋯」宋楚妍睜開眼清醒咗一秒，挺直腰要提起精神嘅下一秒係雙眼又緩緩合埋
黎昕淇朝佢嘅右邊望一眼，發現到另一個直接進入咗夢境嘅人；江清懿完全唔怕比老師發現一樣，大爺一樣嘅坐姿、翹埋雙手耷低頭瞓
「叮噹叮噹⋯叮噹叮噹～」落堂鐘聲一響，瞓著嘅人即刻醒過嚟，小息時間一到大家都醒晒
「食嘢食嘢，就嚟餓死啦⋯！」江清懿連枱上嘅嘢都懶得執，第一時間就要食嘢休息，「蘇序然行啦行啦！」
IG Link: https://www.instagram.com/nd_cotttoncandy/?hl=zh-tw