【愛情】如地下情一樣嘅癮，係我對你嘅定義: 98.
「等陣等陣⋯」蘇序然起身，整理好枱上嘅嘢先慢慢行離座位
「你好慢呀⋯」宋楚妍用嫌棄嘅語氣對蘇序然道，「去食個嘢都行咁慢⋯」
「你都係啱啱先行到出嚟仲好意思話我？」蘇序然反咗個白眼，用同樣嘅語氣對宋楚妍道
「行啦，食嘢，餓啦。」江清懿行喺最前，蘇序然跟上，宋楚妍同黎昕淇行喺後面
「最近涼咗好多⋯」宋楚妍挽住黎昕淇嘅手臂，將臉頰靠喺黎昕淇嘅膊頭上，「你都好冰呀⋯」
「我長期都係冰冰凍凍咁。」黎昕淇輕挺一下拳，佢可以感覺到自己嘅手瞓冰冷，不過都算已經習慣咗
喺手輕握起拳嘅時候，陸修然嘅模樣喺腦海中閃過，黎昕淇悄然抿唇
「都唔知點解佢長期都係咁暖⋯好似長期都發熱嘅暖包一樣⋯」黎昕淇喺心裏嘆氣道
最近天氣涼，黎昕淇都唔可以否認佢中意貼喺陸修然隔離，因為佢太溫暖
「黎昕黎昕！」宋楚妍壓低聲線，捉住黎昕淇嘅手搖咗兩下
黎昕淇以為宋楚妍有咩要講，但淨係見到宋楚妍朝住前方微微抬一下下巴，黎昕淇順住佢示意嘅方向望去，眼神瞬間無奈起嚟
「會長喎。」宋楚妍帶住笑意抬頭望黎昕淇道
「見到⋯」黎昕淇同陸修然對望一眼
兩人默契咁連頭都冇點，只係對望一眼，陸修然同莫淮禮喺佢地身旁行過
「你地做咩咁尷尬？」宋楚妍回頭望陸修然嘅背影一眼後認真咁問黎昕淇
江清懿聽到後擰轉頭望黎昕淇，黎昕淇望住江清懿一副準備食花生嘅模樣，心入面即刻反咗個大大嘅白眼
「你地平時都成日會見到㗎啦，做咩咁尷尬啫～」江清懿故意加把口問一句，臉上嘅笑容將佢嘅意圖表露無遺
「你地成日講，搞到我地好尷尬。」黎昕淇以冇破綻可言嘅語氣同表情回答
「一齊咗咪唔尷尬囉～」宋楚妍攬住黎昕淇講道，「會長呢啲荀盤嚟！」
「嗯⋯」黎昕淇只係露出尷尬嘅笑容，抬眼就見到江清懿擰轉頭朝佢望咗一眼
江清懿輕輕一笑，佢都想知黎昕淇打算隱瞞到咩時候先同宋楚妍坦白
喺小食部嘅時候，宋楚妍同蘇序然行咗去買嘢飲，黎昕淇同江清懿企喺一邊食嘢
江清懿見宋楚妍行遠之後先開口：「做咩仲唔同佢講呀？啱啱係個好時機。」
「走廊咁多人點講？」黎昕淇無奈道
「會長呢啲荀盤又唔係唔拎得出嚟見人。」江清懿抱住一半關心一半食花生嘅心態道，「一齊咗幾耐？」
「好難計一齊咗幾耐。」黎昕淇望住喺遠處嘅宋楚妍默默嘆氣，「好難解釋。」
「好難解釋？點解？」江清懿有啲疑惑，開玩笑咁隨口講：「唔通係青梅竹馬之類嘅關係？」
「算係啦。」黎昕淇微微點頭，呢個回答係喺江清懿意料之外嘅答案
「吓⋯？我隨口講都講中事實呀⋯？」江清懿難以置信咁笑問道，「難怪你咁淡定，見到咁多女仔圍住佢都唔怕佢比人搶走啦～」
「比人搶得走嘅話，咁我要唔要都罷。」黎昕淇聳肩，神色自若，冇絲毫緊張，「冇咩好驚。」
「你對會長咁有信心呀？」江清懿探頭想望清楚黎昕淇嘅表情，試圖搵出佢內心嘅不安嘅破綻
黎昕淇笑而不語，佢唔止係對陸修然有信心，亦都係對自己有信心；如果一個人嘅心夠定，再眼花撩亂嘅誘惑都唔會令佢動搖，從來都係人心所向嘅問題
「都係嘅，算係近水樓台先得月？」江清懿見搵唔到佢嘅慌張，於是輕嘆一口氣
「唔知算唔算。」黎昕淇從來都冇諗過呢個問題，佢亦冇深究過陸修然對佢嘅感覺係由邊一刻開始轉變，「可能，都算。」
「佢地番緊嚟，好期待你嘅好朋友發現呢個天大嘅秘密～」江清懿低聲笑道
黎昕淇望佢一眼，無言以對，佢都唔明白江清懿點解要咁期待呢件事發生，因為食人地嘅花生最開心？
「講緊咩呀？」宋楚妍笑住番嚟，佢離遠已經見到兩人講緊嘢
「冇，問上堂啲嘢啫。」江清懿隨口搵個藉口搪塞過去
「哦～」宋楚妍冇懷疑太多，聽完就點點頭
黎昕淇喺一旁安靜咁拎住嘢飲嘅飲管放喺嘴邊，喺沉默嘅時候思考緊江清懿嘅一句「近水樓台先得月」
「邊有真係咁簡單嘅事⋯」黎昕淇喺心裏回答，「都要有天時地利人和⋯」
黎昕淇偶然望向小食部嘅門口，見到鍾樂時同張詩楠一齊，鍾樂時一直環顧四周，直到望到望到江清懿嘅時候，離遠都可以察覺到佢微微一征
鍾樂時嘅視線稍微往旁邊移開就見到黎昕淇，佢先微微點頭，嘴角微微上揚
「對邊個笑？」江清懿嘅餘光見到黎昕淇微笑，喺問嘅同時順住佢嘅視線望去，原來係鍾樂時
鍾樂時即刻就將視線移開，江清懿冇思考太多，不過腦海中一瞬間就閃過早幾日行出廚房見到鍾樂時匆忙番房嘅身影
「你哥哥同黎昕一齊。」張詩楠朝住黎昕淇嘅方向指一指
「先唔係我哥⋯」鍾樂時抿唇後低聲否認道
「你咁偏心嘅？」張詩楠唔知道鍾樂時嘅說話嘅背後含意，以為佢只係單純咁同鍾安而親近啲
「唔係啦⋯」鍾樂時自己都覺得鬱悶
佢唔係偏心，只係佢對鍾安而同江清懿嘅感情有分別，但佢冇理由同其他人坦白，要點樣將呢啲正常人都反對嘅心聲講出口？
「嗰種中意，唔一樣啦⋯」鍾樂時喺心裏嘆氣道
午飯後，鍾樂時一個人去到會室，推開門見到只有陸修然喺度
「黎昕呢？」鍾樂時順口問一句，「我哥唔喺度嘅？」
「去咗廁所。」陸修然抬頭望一眼又低頭睇手機，「鍾安而好似喺課室。」
「哦⋯」鍾樂時微微點頭，拉開櫈坐低，今次佢冇坐喺近門口嘅位置，揀咗坐喺黎昕淇坐嘅位置隔離
陸修然抬眼望咗一眼後又低頭，黎昕淇推門入嚟，坐低喺佢本來坐緊嘅位置；黎昕淇一坐低，鍾樂時就將臉頰靠到佢嘅膊頭上
IG Link: https://www.instagram.com/nd_cotttoncandy/?hl=zh-tw