【愛情】如地下情一樣嘅癮，係我對你嘅定義: 100.

黎昕淇總係一副認真嘅模樣，要面子嘅佢喺佢面前從來都唔會輕易低頭，有時有啲倔強但唔影響佢對黎昕淇嘅感覺

由以前從來唔會有越線嘅接觸到想越線更多；由以前從來唔會爭吵到有冷戰嘅情況；由以前從來唔會妒忌到想要佔有

一直一齊所以察覺唔到特別之處，一旦分開就連空氣都夾雜住對方身上嘅氣味

有啲說話冇辦法從要面子嘅人口中講出嚟，但每一個行為都表達緊內心真正嘅想法，用實際行動去證明比口講出嚟更輕易打動人心

陸修然寫埋最後一題後放低筆，靠住櫈背仰起頭閉目養神





等黎昕淇寫好作文放低筆嘅時候，陸修然似乎已經瞓著咗；黎昕淇輕手輕腳咁起身，一步一步行到陸修然嘅身旁，彎腰喺佢嘅臉頰上落下一吻

「做咩偷偷地錫我？」仍然閉起雙眼嘅陸修然感覺到身後有人企喺度，緩緩開口問道，「功課搞掂啦？」

「冇偷偷地，光明正大。」黎昕淇輕笑一下，行到佢本來嘅座位執好枱上嘅文具同功課行入陸修然嘅睡房

陸修然將枱上嘅文具同功課疊好，跟喺黎昕淇身後入房後順手將房門閂埋，聽到閂門聲嘅黎昕淇回頭望向門口

「喂⋯！」黎昕淇比人瞬間抱住喺懷中，雖然唔係好大嘅驚嚇，但都可以令佢心跳加速





陸修然調整好角度微微彎腰低頭，但黎昕淇卻用手抵住佢嘅膊頭，陸修然瞬間皺起眉頭，露出不滿嘅表情

「等陣⋯」黎昕淇望到陸修然嘅不滿但都係推住佢唔比佢錫

「等咗好耐啦，仲要等到幾時？」陸修然嚴肅咁問道，騰出一隻手將黎昕淇抵喺佢膊頭上嘅手捉住拉開，「今次你冇拒絕嘅權利。」

陸修然冇比時間佢回答或者反駁，落喺唇上嘅觸感反而令內心嘅慾望更難壓抑，怕黎昕淇會掙脫一樣將佢牢固抱緊

唇上嘅觸感、舌尖嘅柔軟、溫熱嘅氣息，每一樣都令人難以抗拒





「等、等陣⋯」黎昕淇艱難咁從喉嚨發音，捏咗陸修然嘅膊頭一下

「你再拒絕嘅話，我要嬲啦。」陸修然低聲道

「咁你嬲啦。」黎昕拉住陸修然嘅衫袖要佢彎低腰，微微踮起腳尖，喺嘴邊嘅位置輕吻一下

黎昕淇輕輕一躍，雙手環抱住陸修然嘅頸，陸修然彎低腰、手托住佢嘅背承受佢嘅重量

「你真係一啲都唔可愛。」陸修然忽然一笑低聲道

「我向來都唔係用可愛形容。」黎昕淇淡然道

「咔—」外面傳嚟大門閂埋嘅聲音，黎昕淇同陸修然同時望向房門口

陸修然鬆開黎昕淇，打開房門探頭望出去，見到媽媽喺走廊同玄關之間嘅位置除緊鞋





「媽？你今早收咁早嘅？」陸修然行出房門口

「阿姨。」黎昕淇跟喺陸修然身後行出去，乖巧咁打招呼

「阿昕喺度呀？」媽媽睇起嚟有啲意外，「做功課呀？」

「做完啦。」黎昕淇點一點頭

「你今日唔洗番工咩？」陸修然又問一次

「今日？今日放假。」媽媽將裝滿嘢嘅環保袋放到枱上，將薄外套除落嚟疊喺櫈背上

黎即淇伸手偷偷扣住陸修然嘅指尖，陸修然嘅手收喺背後，手指微微曲起，喺媽媽嘅面前偷偷拖手；就算表面上睇起嚟再平靜，內心都係會忍唔住緊張，心臟噗噗跳





「你地唔洗理我㗎，你地繼續打機得㗎啦～」媽媽見兩人企喺原地好似等待緊佢嘅指示一樣，於是揮揮手示意

陸修然先一步鬆手，轉身後直接番房，黎昕淇嘅視線跟隨住陸修然嘅身影移動，喺陸修然經過咗佢嘅身旁後，黎昕淇先轉身跟喺陸修然嘅身後行入房

「咔—」黎昕淇將房門輕力推埋閂上，陸修然拉開電腦椅坐低

「阿姨番咗嚟。」黎昕淇坐低喺床邊面對住陸修然

「冇影響。」陸修然嘅膝頭頂住床邊，將黎昕淇困喺呢個位置

「會長你真係同大家講嘅形象好唔一樣。」黎昕淇看似百無聊賴咁伸手勾住陸修然嘅校呔領結，微微側着頭盯住陸修然嘅領結

「形象係做比其他人睇，你唔係都一樣？」陸修然垂眸瞄咗一眼捉住佢領結嘅手，「對其他人嚟講我係完美已經足夠，你冇見到我完美嘅必要。」

與眾不同先會突出，喺茫茫人海中都可以一眼認到先係特別嘅存在，唔需要太在意同人地睇到嘅事唔一樣





「會長，你講嘅嘢真係好有意思。」黎昕淇嘅嘴角微微上揚

「提多你一次，已經放咗學。」陸修然起身，右腳提起跪到床上，黎昕淇勾住佢嘅領結同時往窗台嘅方向坐，「開會嘅時候唔係記憶力好好？放學之後就要我一次一次提你？」

「形象係做比其他人睇，唔係咩？會、長。」黎昕淇刻意咁喺最後兩個字落重音

「識咗咁耐，我發現原來我都唔太了解你。」陸修然聽住刻意嘅說話一笑，凝視住黎昕淇同佢四目交投

黎昕淇握住領結往下拉，將兩人嘅距離收窄到可以感覺到對方熾熱嘅鼻息，勾唇一笑：「需唔需要⋯再認真咁⋯了解下？」




IG Link: https://www.instagram.com/nd_cotttoncandy/?hl=zh-tw