【愛情】如地下情一樣嘅癮，係我對你嘅定義: 101

兩個女仔肩並肩咁一齊番學校，行喺路上嘅時候，視線一直停留喺行喺前面嘅人身上，討論嘅內容都同佢有關

「唔知會長幾高呢，睇起嚟好似好高⋯」「睇嚟有180？應該有啦。」

「唔知會長嘅擇偶條件係咩呢～」「好似文書咁呀，唉，人地近水樓台先得月啦⋯」

「都唔知係咪真，佢地都冇承認過！」「但都冇否認呢！」

「唉，會長呢啲男仔邊度搵，我都想搵番個，搵番嚟擺下睇下都好呀⋯」「你估買個雕像番嚟擺咩，人地會長唔係花瓶嚟⋯」





早會嘅時候，學生會有宣傳，所以內閣嘅成員都一齊喺台下嘅位置

陸修然一隻手拎住疊紙，另一隻手因為無處安放而插喺褲袋，微微低頭但耳仔專注咁聽住黎昕淇同張詩楠喺台上嘅宣傳

「會長一直微微點頭。」企喺班隊中嘅女同學細聲道，朝台上講緊嘢嘅黎昕淇望一眼

「如果真係一齊咗嘅話，硬係覺得文書襯唔起會長⋯」企喺佢前面嘅女同學抿一抿唇，「其實文書佢都唔算好靚啫。」

「係咩，我覺得佢幾靚呀⋯」女同學望住黎昕淇輕皺起眉頭打量





若然喺學校唔以平常心相處，絕對會比其他人好似捉到破綻一樣做話題，多望一眼都會惹起懷疑同傳言

黎昕淇講完之後同張詩楠一齊轉身行落台，陸修然見到後下意識向前行，差唔多到樓梯嘅第一級時黎昕淇望咗佢一眼，陸修然立馬意識到唔可以，於是自然咁收步停喺原地

「會長係唔係同文書對望一眼之後停低咗？」有心留意嘅女同學提道

「有咩？只係咁啱啫？」亦有人覺得只係巧合，「對望一眼只係咁啱啫。」

只有放學後可以隨心所欲咁一齊，就算係拖手、擁抱、什麼親吻都好⋯但只要喺學校，就算唔想保持距離都一定要保持距離





幾人企喺一旁聽早會，陸修然企喺黎昕淇同鍾安而之間，企嘅位置更近鍾安而

「嗯⋯？講緊咩呢？」

黎昕淇望向陸修然，然後指一指佢嘅後領又摸一摸自己嘅衫領

「衫領反咗？」「文書會唔會直接幫會長整番好衫領？」

陸修然伸手摸衫領，然後對黎昕淇講咗兩句，黎昕淇嘅視線落喺陸修然嘅校呔上

陸修然低頭望咗一眼，將偏側咗一邊嘅校呔移番去中間，鍾安而同黎昕淇都比咗個Okay手勢

「睇起嚟副會長好似係用嚟做打掩護一樣⋯」「多心啫，佢地平時都一齊㗎啦。」

就算只係一句自然嘅提醒同互動，喺其他人眼中睇起嚟都係曖昧嘅痕跡





喺早會結束之後，佢地幾個經後梯番課室，喺到咗佢地嘅樓層時剩低陸修然、鍾安而同黎昕淇三人

喺經過陸修然嘅課室嘅窗戶之前，鍾安而識做咁行喺前面，陸修然經過黎昕淇嘅身旁番課室之際，伸手悄然咁捉咗黎昕淇嘅手一下後直接行入課室

小息嘅時候，莫淮禮坐到陸修然嘅前面，陸修然冇打開話題，只係坐喺位拎住手機睇

本來專注咁睇手機嘅莫淮禮忽然豎起耳仔，認真咁聽住前面幾個男仔細聲嘅聊天內容

「你又stalk人地IG，你又中意人呀？」「你最近做咩成日stalk佢？」

「人都中意睇靚嘅嘢㗎啦，我睇下啫，唔叫中意囉。」「不過睇真啲，黎昕真係唔差，都真係幾靚。」

「有樣，有成績，而且睇起嚟身材都好似唔差。」「嘩～你諗咩呀～」





看似冇聽到佢地對話嘅陸修然其實一直都聽緊，由佢地提起黎昕淇開始已經聽緊

佢地嘅談話內容引起陸修然嘅不悅，不過呢種不悅唔可以擺上面，只可以壓抑喺心入面

「事實嚟，佢真係唔差，佢同鍾安而個未來女朋友比起嚟，似乎黎昕更勝一籌。」「未來女朋友？笑死，你講緊鄭洛苡？人地都未一齊～」

「嘖，你唔好搞笑啦，個個都知佢兩個一齊係遲早嘅事⋯」「反正我中意黎昕多啲。」

「你唔好講得咁大聲，黎昕嘅緋聞喺度，會長嘅人你都敢掂？」

「你唔好再講得大聲啲？」莫淮禮起身，上前搭住前面男同學嘅膊頭笑道，「我地會長都聽到晒啦～」

「講下啫～我地冇咩想法㗎～」幾人即刻表明立場一樣澄清道

陸修然只係望住佢地幾人，然後擺出一個虛偽中帶點不屑嘅笑容，睇起嚟好似佢冇太在意一樣





莫淮禮望到陸修然臉上掛住嘅笑容時有啲奇怪，察覺到有啲咩異常一樣行番去坐低，定睛望住陸修然

「有咩幫到你？」陸修然回復本來嘅平靜，餘光留意到比眼前嘅人直盯住

「你係因為佢地講嘅嘢，所以係呢個表情？」莫淮禮猶疑咁開口，佢唔知道自己察覺到嘅異常係唔係真

「一半一半啦。」陸修然嘴角微微勾起上揚，從容嘅回答令莫淮禮更加半信半疑

「吓⋯？」莫淮禮不禁一愣，但陸修然冇比機會佢追問，直接企起身，「你要去邊？」

「廁所。」陸修然道

喺經過前面嗰幾個男同學身旁嘅時候，陸修然面無表情咁朝佢地幾人瞄咗一眼





當中提起身材問題嘅男同學剛好同陸修然對上視線，本來掛喺男同學臉上嘅笑容瞬間凝固，陸修然冇講嘢但眼神內嘅冰冷同不屑直接刺向佢

坐喺後面嘅莫淮禮將呢個對望睇得清清楚楚，佢啱啱察覺到嘅異常唔係錯覺，但佢都係唔敢肯定佢嘅想法係啱定錯

「嘩⋯」莫淮禮忍唔住喺心中感歎，「呢個反應真係⋯」

兩堂之後迎嚟嘅係午飯時間，陸修然行出課室嘅時候見到黎昕淇喺前面嘅課室行出嚟

行喺隔離嘅莫淮禮自然都見到，下意識第一個反應係偷偷望向陸修然

「食咩呀？」宋楚妍拉住黎昕淇停低等埋另外兩個人

「米線？」「今日想食米線。」

江清懿同蘇序然同時開口，異口同聲咁講出想食嘅嘢，兩人對望一眼，輕碰拳頭一下

「你做咩抄我？」江清懿笑問道

「我講先㗎。」蘇序然搖頭

「咁食米線啦～」宋楚妍拉住黎昕淇向前行，「想食個蕃茄湯底⋯」

「都好喎，你講完我都有啲想食。」黎昕淇思考咗一陣之後對宋楚妍一笑

到咗餐廳，幾人啱啱坐低，餐廳嘅門就被推開，鍾樂時同張詩楠加上另外幾個女仔一齊行入餐廳，坐低喺黎昕淇佢地斜對面嘅位置




IG Link: https://www.instagram.com/nd_cotttoncandy/?hl=zh-tw