【愛情】如地下情一樣嘅癮，係我對你嘅定義: 109
「人會變唔係好正常？」「呀？」
黎昕淇嘅回答係明示比宋楚妍知事情嘅真相，但似乎宋楚妍冇即時明白黎昕淇說話中嘅意思
連堂之間，老師比咗一個短嘅休息時間，總算係喺眼瞓嘅時候可以精神一下
「去唔去廁所？」宋楚妍起身，順便問黎昕淇
「哦，好呀。」黎昕淇放低筆起身，同宋楚妍一齊行出課室
經過隔離課室嘅時候，隔離班嘅同學仍然上緊堂，陸修然托住額，表情睇起嚟有啲疲倦；黎昕淇嘅目光下意識朝課室內望去，一窗之隔，但無法阻止佢嘅目光找尋佢
黎昕淇嘅嘴角微微上揚，有時候心意就係咁明顯，想避都避唔過，想隱藏起嚟都冇辦法
「你笑咩呀？」宋楚妍見到黎昕淇嘅一抹笑意
「冇咩特別～」黎昕淇搖搖頭，然後又朝課室內嘅陸修然望咗一眼
小息嘅時候，陸修然比莫淮禮捉住一齊去咗小食部，企喺一邊陪佢食嘢，但目光一直不自覺咁朝同一個方向望去，目光所及之處係同一個人嘅身影
佢中意嘅人唔算高大，但喺人群中佢永遠可以一眼就見到佢嘅身影，喺佢眼中，黎昕淇最受人注目，佢嘅目光一直會自然咁跟隨住佢
「你望緊咩咁專心？」莫淮禮見陸修然一直心不在焉又冇聽佢講嘢，順住佢嘅視線望去：「黎昕？」
「你講咩？」陸修然呢一刻先若無其事咁望向莫淮禮
「你望緊咩？黎昕？」莫淮禮將佢啱啱講嘅嘢完整咁重複一次
「喺度講緊咩⋯」陸修然耷低頭，避開莫淮禮嘅視線
「隨口講下估下咋～」莫淮禮朝黎昕淇嘅方向望去同時聳肩，「點知你望緊邊個～」
「發呆咋。」陸修然輕嘆一口氣
「你同黎昕到底係點？」莫淮禮問
「咩點，冇點⋯」陸修然搖搖頭，手將校呔順好
「其實私下冇一齊嘅？」莫淮禮追問
佢咁樣一問，陸修然就唔知要點咩，佢唔想講大話但又冇理由講事實比佢知
「哎。」陸修然冇講其他嘢，只係微微側住頭望住莫淮禮
莫淮禮一頭霧水咁望住陸修然，陸修然模棱兩可嘅回答，莫淮禮好似知佢講咩但又唔知佢講咩
「即係⋯？」莫淮禮想引導陸修然再講多啲
「你自己諗。」陸修然唔比機會佢追問，拋出一句中止呢個話題，「食完未？」
「哦⋯食完啦⋯」莫淮禮望一眼手中空咗嘅膠袋
陸修然轉身就行，莫淮禮連忙跟上前；黎昕淇雖然同宋楚妍食緊嘢，不過時不時都會留意下陸修然做緊咩
「會長走啦。」宋楚妍望過去嘅時候，正好見到兩人離開
「嗯。」黎昕淇微微點頭後又耷低頭咬住飲管，睇起嚟好似事不關己一樣
宋楚妍默默咁瞄向黎昕淇，想偷偷睇下黎昕淇嘅反應，但黎昕淇完全冇其他反應
黎昕淇嘅指尖輕快咁喺螢幕敲，喺陸修然番到課室前回覆陸修然嘅message
「我食完啦～番上課室啦～」宋楚妍企起身，行到黎昕淇嘅身旁伸手將黎昕淇拉起
「好呀。」黎昕淇起身
宋楚妍拖住黎昕淇嘅手行，黎昕淇輕捏咗宋楚妍嘅手一下，佢嘅手同陸修然嘅手相差太遠啦⋯感覺太唔一樣⋯
自從緋聞嘅日子嚟到之後，就算只係好普通咁因為學生會嘅事務一齊行、停低講兩句都好，身邊總會有人自然咁注視住佢地，就算只係因為一啲好普通嘅事都好，大家都會望多兩眼
「如果你識咗一個好似會長咁受人注目嘅男朋友，你會唔會好大壓力？」黎昕淇忽然問宋楚妍，佢呢個問題對佢本人而言算係好直白嘅提問
「我？唔⋯我諗點都會有啲，佢受人注目嘅話，其他人好容易覺得我唔夠好。」宋楚妍稍微思考後認真回答道，「好容易比人喺背後評頭品足⋯」
「你唔會在龍其他人講嘅嘢？」黎昕淇又問道
「我點解要在意？」宋楚妍露出理所當然嘅表情道，「男朋友都唔在意，我仲要在意其他人講啲咩？個個嘅評論一下我就要變嘅話，我要變到幾時？」
「雖然你有時好外協，但你講嘅嘢其實有時都真係幾啱。」黎昕淇打從心底認可呢一樣嘢
「吓⋯？我係睇樣啫，同我嘅價值觀、戀愛觀冇關係⋯」宋楚妍輕皺起眉頭，語氣都帶住撒嬌嘅意味，「不過，你做咩突然間～問呢啲問題呢？真係心動啦？知道我地會長好啦？」
黎昕淇直接沉默，只係無奈咁笑一笑，陸修然好唔好，佢唔係第一日知道
「我覺得你完全唔需要在意外界嘅聲音，我覺得你同會長就係⋯好襯！」宋楚妍好認真咁游說黎昕淇，黎昕淇默默咁聽，「而且重點係咩？係你都有好感啦嘛！咁就一定要去試啦！」
「但係，會長冇話有好感呀～」黎昕淇故意咁講想逗宋楚妍玩，「所以冇辦法呀～」
「唔⋯咁⋯」宋楚妍瞬間就猶疑起嚟，「咁我都冇辦法啦～你加油啦～」
⋯
陸修然比黎昕淇搭早一班車，今日佢冇一如既往咁企喺地鐵站出口等黎昕淇，簡單咁send咗一個message話比佢知自己嘅所在位置
黎昕淇望一眼手機嘅螢幕，明顯咁加快咗腳步，連喺扶手電梯企一陣嘅時間都等唔切，直接扶住扶手小跑向上行，行到地面朝陸修然所在嘅地方小跑，直至見到陸修然嘅身影就喺離佢不遠處嘅位置
一個強力嘅擁抱從旁邊撞嚟，腰間比人環抱住，陸修然嚇咗一跳，望過去就見到黎昕淇帶住笑容攬住佢
「你⋯」陸修然瞬間露出笑容，語氣柔和起嚟，「嚇死我啦⋯」
「就係要嚇你呀～」黎昕淇笑道
「唔怕比人見到啦？」陸修然彎腰問黎昕淇嘅時候，手偷偷咁拖住黎昕淇嘅手
「怕呀，超怕！」黎昕淇肯定咁點頭，但卻冇甩開陸修然嘅手
IG Link: https://www.instagram.com/nd_cotttoncandy/?hl=zh-tw