【愛情】如地下情一樣嘅癮，係我對你嘅定義: 110
拖住陸修然嘅時候，心入面好緊張但又覺得好有安全感，緊張大概係因為喺街外，隨時有比同校生撞到嘅風險
「因為要等到卸任呀～」黎昕淇笑道
「好快啫，好快就到卸任嘅時候啦。」陸修然道
「咁我地喺卸任前⋯」黎昕淇提起同陸修然緊扣住嘅手，遲疑咁開口：「係咪唔應該咁光明正大？」
「我地係唔可以公開嘅秘密關係咩？」陸修然反問道，手緊緊咁將黎昕淇嘅手握喺手中，「你甩得開嘅可以試下。」
兩人行入大堂，𨋢好快就到，陸修然企喺門嘅右邊背靠住牆企，手稍微用力拉咗一下，輕易就將黎昕淇拉到懷中
黎昕淇冇掙脫亦冇推開陸修然，只係拉住佢嘅衫角，安靜咁靠喺佢嘅懷中，聞到熟悉嘅味道令佢覺得安心
「阿然呀，我地會一直一齊㗎可？」黎昕淇嘅語氣淡淡然，但抬頭望住陸修然嘅眼神卻係無比認真
「會呀⋯」陸修然有啲意外，「點解唔會？」
「只係問下。」黎昕淇嘅手偷捏咗陸修然一下，將額頭抵喺佢嘅膊頭上，「我都覺得會一直一齊⋯」
陸修然感覺到最近黎昕淇明顯嘅變化，之前無論點都好，都唔會喺屋企以外嘅地方親近佢
但最近好似突然間受咗咩刺激一樣，喺街都夠膽直接攬上去；雖然話關係同以前有啲唔一樣，但陸修然認為黎昕淇唔會輕易比呢件事改變
𨋢門打開，黎昕淇先一步鬆開手，輕力咁將陸修然推開後轉身行出𨋢，陸修然跟喺黎昕淇身後行出𨋢
黎昕淇行到屋企門前開門，陸修然行喺後面輕力將門閂埋
「放飯先～」黎昕淇順手就將書包放到門邊嘅櫈上，然後直接行入廚房拎出裝住貓糧嘅膠盒
「喵～」牛奶望住黎昕淇行開，隨即行到陸修然嘅面前喵一聲
「你都掛住我啦？」陸修然蹲低摸牛奶嘅下巴，牛奶瞇起眼側住頭享受
「邊個掛住你？」黎昕淇笑問道，貓糧落喺鐵碗嘅咚咚聲頓時將貓嘅注意力吸引走，「睇嚟牛奶唔係真係咁掛住你。」
「貓似主人，睇嚟你都係，唉⋯」陸修然㩒住膝頭借力起身，翹埋雙手靠住牆企
「貓先係主人，我只係放飯嘅奴才。」黎昕淇比陸修然講嘅嘢逗笑，「就算我係貓，都係反叛啲嘅貓。」
「你？你唔係反叛嘅貓貓，係口不對心嘅貓貓⋯！」陸修然走近黎昕淇，直接伸手捏住黎昕淇嘅臉頰
「呀！」黎昕淇提手搭喺陸修然嘅手上，「邊有口不對心！」
「你呀⋯明明想公開，但又唔想認，一直兜一大個圈嚟問我⋯」陸修然鬆手，輕撫黎昕淇臉頰上紅紅嘅一塊，「明明想知但又唔想開口問，你唔係口不對心係咩？」
黎昕淇啞口無言，冰涼嘅手搭喺陸修然嘅手背上，陸修然原來一早知道佢嘅小心思
「你有咁了解我？」黎昕淇望住陸修然嘅雙眼中夾雜咗一份期待，嘴角微微嘅上揚顯得佢好自在，但緊握住陸修然嘅手卻表達咗佢心入面嘅在意
「要了解你唔難，呢兩年喺學生會都已經好夠。」陸修然伸手攬住黎昕淇嘅腰，將佢拉到自己嘅懷中溫柔抱住，「太睇小我啦⋯」
陸修然耷低頭，靠坐喺餐枱邊，黎昕淇企喺佢雙腿間嘅位置雙手環抱住陸修然嘅腰，喺呢個距離可以感受到佢嘅心跳
「如果唔係因為中意，都唔會特登去留意。」陸修然湊近黎昕淇嘅耳邊低聲道
「你講咩？」黎昕淇即刻露出笑容，「講多次？」
「會長講嘢淨係講一次，唔重複。」陸修然雙臂間嘅範圍收得更窄，「聽唔到就冇啦。」
「真係？」黎昕淇笑問道，「我懷疑你一開始就帶住私心錫我。」
「唔知呀～」陸修然慨嘆般道，「我又未到是旦一個人都可以錫嘅地步。」
「咁你仲想錫邊個？」黎昕淇問道，認真咁開玩笑
黎昕淇望住陸修然嘅雙眼，心入面其實有個大概嘅答案，不過有啲問題要聽到親口講出嚟嘅答案先安心
「唔⋯」陸修然冇喺第一時間回答
黎昕淇頓時不滿咁喺陸修然嘅胸口上揼咗一拳，眼神都質問緊陸修然點解會猶疑
「淨係想錫你。」陸修然道
「哼⋯」黎昕淇撇開臉
黎昕淇拎起陸修然嘅手機，突然間要檢查手機一樣，但係陸修然冇阻止，默默咁望住黎昕淇用密碼開鎖
「唉⋯」陸修然彎腰，稍微用力就將黎昕淇抱起，轉身將黎昕淇放到枱上坐好，「我冇做虧心事，你隨便睇。」
陸修然口係咁講，但手卻將黎昕淇拎住手機嘅手捉住向下拉，將佢嘅手壓喺枱上，身貼近黎昕淇
「我冇話你做咗虧心事，我又冇話唔信你。」黎昕淇從容咁坐喺枱上，表情自然
「你話點就點，聽你嘅。」陸修然壓低聲線道，捧起黎昕淇嘅臉頰準確無誤咁吻喺唇上
陸修然攬住黎昕淇嘅腰一手將佢推到更近自己嘅位置，另一隻手騰空出嚟將黎昕淇抱起
黎昕淇嘅雙手即刻緊抱住陸修然，就算知道佢唔會將自己跌落地都好
陸修然一步一步走向黎昕淇嘅睡房，行入房後有手尾咁將門閂上，小心翼翼咁將佢放喺床上後將佢壓喺身下
望住黎昕淇泛紅嘅臉頰同微喘，陸修然將校呔向下拉鬆：「對其他人，我冇咩興趣。」
就算係風度翩翩嘅會長，都有隱藏嘅一面，只係選擇性表露出嚟
「暫時信你先，免得你以後三心兩意⋯」黎昕淇嘅背貼住床，盡力伸手去拉陸修然嘅校呔
信的確係信，但黎昕淇就係唔想咁輕易承認，佢自己都冇察覺到自己其實係個要面子嘅人
陸修然將頭靠喺黎昕淇嘅頸窩上，就算已經喺一個咁親近又親密嘅距離，陸修然依然會將喺佢眼前嘅人緊抱住
「你好重⋯」黎昕淇開玩笑咁推咗陸修然一下，又向旁邊移動咗一下
陸修然不為所動，頭微微轉動，髮絲喺黎昕淇嘅頸同臉頰上掃過，痕癢嘅感覺如同電流經過一樣，黎昕淇下意識就縮開
IG Link: https://www.instagram.com/nd_cotttoncandy/?hl=zh-tw