那年夏天，親妹的眼睛鮮紅色: #Scene 16

#Scene 16
Day 4
 
從峽谷回去天等房的路，無比遙遠。
當阿葵撐扶著我，再次從乾屍底下穿過的瞬間，我突然覺得，這無頭乾屍就是我未來命運的預警。
不是嗎？我自己逃跑還算了，竟敢拐走天等房的女兒，桃姨會放過我嗎？用腳趾尾想都知道不可能。
在我身邊，阿葵也緊皺著眉頭，似乎為即將要面對的事深深恐懼。
 
憑村民那磅礡的氣勢，我本以為他們會一起闖進天等房裡會審我和阿葵，誰知，他們只是平靜地把我們兩個交給開門的玎公公。
而玎公公也裝成什麼都沒發生過那樣對阿葵躬身說︰




「葵小姐，歡迎回家。代天等一直係度等你。」
然後，他就把我們帶到桃姨的房門外，叫阿葵自己進去。
 
聽見這話，阿葵跟我對望一眼，眼中是濃濃的恐懼。
我下定決心說︰
「我都跟埋一齊入去。」
玎公公卻攔在我的身前︰
「唔得。代天等只係想見葵小姐一個。」
阿葵望向我，搖了搖頭，便獨自敲門走進房裡。直到木門完全關上，我都看見她的背影一直哆嗦個不停。
 




我心中雖然擔心，無奈自己連站都站不穩，加上玎公公凌厲的眼神警告，更不敢輕舉妄動。
玎公公臉上閃過一抹冷笑，之後便帶著繼續前行。
我心裡怦怦亂跳，擔心他要對我行什麼私刑，意想不到的是，他竟然把我送回原來的客房裡。
「迅少爺，業報隨時降臨，而家外邊好危險，請係房入面好好休息。代天等交待過，一日三餐我會準時送過嚟。果邊有個痰罐，請擅加利用。」
 
玎公公冷冰冰地說完之後，便把我的房門關上，隨即，聽到門外傳來一串輕微的金屬響聲。
等聲音都停了，我試著推門，FUCK，果然被鎖上了。
從勉強推去的門縫裡，我依稀認出那把鎖像是昨晚見過的密碼鎖。
我轉身就去試著開窗，不出我所料，連窗戶都已經用木條封死了。
表面上說什麼外面很危險，事實上卻是把我軟禁起來了！




 
然而，我連生氣的氣力都沒有。
我整個人倒在床上，只覺得身體沉重得像生鏽的鐵塊。
肌肉的腫痛、筋骨的扭痛、表皮的傷痛……還有靈魂裡，對自己無能為力改變現狀的悲痛。
我蜷曲著身體，抵受著痛楚的交響曲，只覺得意識漸漸遠離。
 
半睡半醒之間，我感覺到有人進過房裡，大概是玎公公來送飯。
我沒理會，繼續沉睡。到真正醒來的時候，天已經開始昏暗下來。
我是被肋骨深處傳來的刺痛感覺驚醒的。在混亂之中，到底我的肋骨中了多少記，我已經分不清了。
我下意識地摸了摸自己的胸口，竟然感覺無比粗糙。就在這一瞬間，我的意識急速清醒過來。
 
「媽媽！笨笨表哥醒咗喔！」
剛睜開眼睛時，身體還不聽使喚，只聽到嬌滴滴的小孩子喊出這句話。隨即，一個人影來到我的床邊，俯身望向我。
那人披著一頭卷曲長髮，戴著秀氣的眼鏡，身穿西式吊帶裙，卻不是細姨是誰？
我猜不到她會在我床邊出現，一時呆住了。細姨微微一笑，關懷地問︰




「阿迅，你而家覺得點？細姨雖然唔算太叻，但都學過下護理學，頭先幫你檢查過，應該無骨折，所以幫你簡單包紮咗。你有無邊度覺得唔舒服？」
 
我慢慢坐起身來，只見自己身上多處包上了繃帶；又依照細姨的指示動了一下手腳，幸好都沒什麼大礙。
細姨點頭說︰
「都只係輕傷啫，太好啦。」
「細姨……我明明記得玎公公鎖住咗我，你地點入嚟架？」
細姨揚起下巴指了指小莜︰
「果種咁簡單嘅鎖，點會難得到我個女？」
「嘻嘻！一分鐘都唔使就可以搞掂喔！」
小莜神奇地拋了拋手上的密碼鎖。
FUCK！靚妹！識開鎖唔早D講？早知尋晚就搵你幫手開咗玎公公間房啦！
 
細姨卻誤會了我的表情，跟我解釋說︰
「唔使咁擔心，阿迅。玎公公同桃姐仲處理解小葵嘅事，唔會發現我地入咗嚟搵你。」
「阿葵……佢而家點？」




「俾桃姨打咗一餐，然後困咗係自己房入面。」
「咁……佢今晚……個儀式……」
細姨搖搖頭︰
「我說服咗桃姐，儀式會暫停。小葵根本都未足十六歲，只係桃姐自把自為提前儀式，都唔知係咪因為咁先致引起咗業報。所以，暫停絕對合理。」
「細姨，連你都信阿英佢地三個嘅死係報應？」
 
「笨笨表哥喔！當然無可能啦！」
小莜搶著說之後，細姨莞爾一笑︰
「對住相信業報嘅人，同佢講道理不如恐嚇佢咁做會引起業報。你話係唔係？」
我搖搖頭︰
「我真係無法理解。佢地係咪傻架？點解一個二個都咁相信業報？」
「笨笨表哥！佢地相信，因為佢地怕歿喔！」
細姨看我一臉不解，便向我簡述佛滅鄉的信仰傳說——也就是當初夜探復活洞時，妹妹告訴我的那個傳說。
 
故事從殺死喇嘛搶奪金器，到喇嘛復活，到村民把喇嘛的屍體焚毀，都跟妹妹說的一模一樣。




接下來的故事，由村民們的離奇死亡開始。
死在涅槃潭、腹部被剖開的阿朔是第一個死者。
其後，神秘死亡事件頻生；更可怕的是，每一個死者死狀都千奇百怪可怖非常，幾乎沒有一個人死後還留著全屍。
然而，村民們卻找不到任何兇手，甚至連嫌犯都定不下來。
總之，人們就是一個接一個地，殘忍地被來源不明的外力殘忍殺害。
 
生還的人受盡精神折磨，每天都提心吊膽，擔心下一個就輪到自己。
他們認為一切都是紅色舍利子裡的喇嘛惡靈所為，還想了很多辦法去封印那舍利子，但全部不湊效。
後來，不知道是誰突發奇想，村民決定把那晶石敲碎，每人分一點吃進肚子裡。
 
聽到這裡，我忍不住叫了起來︰
「食咗？！咁嘅嘢，點食得落肚架？」
「為咗怕歿，咩辦法都要試下，岩唔岩？」
「咁食咗之後呢？D人真係無繼續死？」
「嗯。村民的確無再出事。」




「咩意思？」
「意思即係，分吃咗舍利子之後，歿嘅唔再係普通村民……」
我只能開大嘴，繼續聽細姨說故事。
 
當時的村長，是一個男人。
他有兩個兒子一個女兒，大家都跟全部村民一起吃過舍利子。
結果吃完之後，那個女兒突然發了一場高燒。燒退了之後，她身上就多了一大塊如胎記般的紅印。
那紅印呈水晶狀，無論顏色還是大小，竟跟那舍利子異常相似。
 
村長一看，已覺不祥。他認定那喇嘛陰魂不散，已經侵占了女兒的肉身。
於是，他把女兒綁在當時的神壇木柱上，任憑她怎麼呼叫掙扎都不予理會，並開始拜山神稟上天，準備七天之後就把女兒處決，以換取村子的平安。
然而七天還沒到，事情卻陸續發生。
 
村長本是村中身手最敏捷的人，曾經獨力戰勝一隻闖進村中的野豬。
然而，他卻摔死了。
摘果子時不知怎的從樹上摔下來，正好掉在樹下一把鐵耙上。
他的臉朝下，頭頸就這樣直挺挺地壓在鐵耙的齒上。
從左眼，到左臉頰，到下巴，到脖子，到右邊前胸……
一尺長的鐵齒從前頸入，後頸出，貫穿了他的氣管，當場死亡。
村民救起他時，他半張臉都毀了，後來硬把鐵耙拉走時，甚至把他的眼球都扯了出來……
 
之後，便由他的兒子繼位村長。
然而，那兒子卻很奇怪，老是在夜裡嚇醒，說看到老爸復活了，還拿著鐵耙站在自己床邊。
村民都只當他瘋了，正猶豫是否應該換個村長。結果，他的房間突然失火，他被燒成了焦炭。
奇怪的是，那具焦屍上，竟然還插著鐵耙。那鐵耙的位置，正正跟他老爸死亡時一模一樣。
人類，往往會因為習慣而麻木。
離奇死亡事件看多了，區區一把鐵耙，大家自然不當回事。
小兒子也不以為意，第二天就繼位當上村長。
結果，他才剛當上村長，就變得跟他哥哥一樣，老是看到老爸復活。然後當天晚上，竟以跟他哥哥一模一樣的方式被燒死。那鐵耙，自然也插在同樣的位置裡。
 
於是，村長家裡，就只剩下那個被綁在木柱上等待處決的女兒。
結果那女兒便被人解下來，請到村長的寶座上。
她下達的第一道命令，就是把父親和兩個弟弟的屍體砍首。她說，如果不砍首，他們就會「復活」。
 
(我︰復活？燒到成舊炭咁仲識復活嘅，擺明就係屍變啦！)
 
村民們半信半疑，但無可奈何之下也只有照辦。沒想到，把前村長和兩個兒子砍首下葬之後，離奇死亡事件真的不再發生。
這個女兒叫阿巽，她就是佛滅鄉裡的第一任天等。
她說，之前發生的連串事件，全是梵天的降罰，是佛滅鄉人的業報。
而阿巽已得到梵天的啟示，為保佛滅鄉的長治久安，訂立了一系列的制度和鄉規，又造起了一個梵天金像讓村民膜拜。
村民們奉行她的規矩，從此竟真的天下太平。
本來眾人很擔心阿巽死後的情況，但她依照梵天的指示舉行儀式，順利誕下一個女兒；而在阿巽死後，這位女兒胸前，也出現了跟她母親一模一樣的胎記。
 
我腦中靈光一閃，忍不住自言自語︰
「……聖物……？」
細姨給我一個讚揚的眼神︰
「無錯。呢個就我地佛滅鄉世代相傳嘅聖物——舍利印。經過呢D事之後，村民總結咗離奇死亡事件同埋聖物嘅關係。對佛滅鄉嘅人嚟講，所有嘅不幸事件，全部都係當初殺咗喇嘛引嚟嘅業報。而聖物同埋天等系統，係保障全個佛滅鄉安全唯一嘅制度……」
「即係好似……封印咁？」
「差唔多。總之傳統相信，無咗聖物同天等，成個佛滅鄉都會死於業報。」
「為咗成村人，所以有可能出現聖物嘅女仔，都要進行儀式……」
細姨嘆了一口氣︰
「其實，以前每一代都係單傳。一個天等，只會進行一次儀式，生一個女。咁樣，先至最有成本效益，你話係唔係？」
 
我不禁搖頭︰
「萬一個女養唔大咁點算？」
小莜突然插口說︰
「呢樣嘢真係好奇怪喔！係佛滅鄉嘅歷史入面，天等繼承人都好似有神明護體咁，連生病都好少！」
「咁如果生個仔呢？」
細姨別開視線，幽幽地說︰
「如果生出嚟係男仔，咁即係有人壞咗鄉規。村民會將個孽種殺咗，重新舉行一次儀式……」
 
聽見這話，我突然聯想起一件很可怕的事，寒冷的感覺從尾龍骨直爬上我的脊項。
「即係話……當、當初我……我出生……」
細姨點點頭︰
「如果根據鄉規，應該即時殺咗你。」
「就算我對眼係紅色……？」
「都無用。因為村民相信，男仔係唔應該出現嘅。」
我不禁想起了桃姨的情況︰
「咁阿英呢？點解佢出生果時無俾人殺死？」
 
細姨愣了愣，彷彿跟不上我的思考速度，猶豫了一會才說︰
「阿英……因為佢同阿葵係雙胞胎，所以，桃姐唔會被當成犯禁處理。」
「……雙胞胎？」
細姨點點頭︰
「以前天等一直都係單傳，但到咗我婆婆果代，唔知點解，佢竟然一胎生咗兩個女……」
小莜豎起手指，意氣風發地說︰
「呢個我知道喔！叫基因突變！」
 
我苦笑著說︰
「咁又唔算，生雙胞胎其實都好正常啫。不過我有樣嘢好唔明……」
「咩事呢？」
「就算你外婆我太婆生咗雙胞胎，都依然算係單傳。咁點解母親會有三姐妹呢？」
細姨嘆了一口氣︰
「呢件事……我都唔知點解釋好。亦有可能係因為媽媽生咗我地三個，聖物先至會失傳……」
「然後，就係因為聖物失傳，所以報應重臨，村民又開始離奇死亡？」
 
細姨托托眼鏡，以銳利的眼神盯著我︰
「阿迅，你會相信呢個解釋？」
我冷笑一聲︰
「我連個舍利印都無見過，當然唔會信。傳說呢D嘢，只係為咗你地鞏固權力啫，根本無真憑實據……」
我話未說完，細姨突然把身上吊帶裙的領口扯低露出深長的乳溝，無比認真地指著胸前說︰
「阿迅，你可以去復活洞見下大阿姐。佢呢個位就有聖物係度呢。」
哇屌！
AUNTIE，唔好突然攞條事業線出嚟晒馬好喎！
 
我尷尬地別開臉，定了定神才說︰
「……其實……我有去見過母親。第一晚嚟到嘅時候，阿妹帶我去嘅……當時……我見到D好可怕嘅嘢……我見到……母親嘅屍首……俾人砍咗首……一定係棺材入面砍嘅，周圍都係血……」
細姨倒抽一口涼氣︰
「估唔到佢地動作咁快……」
「吓？」
「阿迅，頭先個傳說都有講。係我地佛滅鄉度，只有砍咗個頭先算係正式死亡。」
「咁即係話……有人想早D令母親正式死亡？」
 
細姨別開臉︰
「我真係估唔到佢地會咁樣做……為咗爭天等個位，居然連大阿姐嘅三七都唔肯等……」
「……唔肯等？」
我腦中靈光一閃，想起細姨剛才跟我說的傳說，背後冷汗直流︰
「細姨，你嘅意思即係……其實就算佢地唔郁手，我母親都要俾人砍首？」
「無錯。先砍首，再落葬，咁樣先可以確保死者正式上路，了卻此生，再入六道輪迴……」
「你地唔覺得……咁樣對死者好不敬咩？」
「點都好過陰魂不散，好似梵天咁樣復活殺人，你話係唔係？」
 
「我始終唔明。既然母親個頭點都要俾人砍，點解唔等多幾日等到三七？」
小莜擺擺手說︰
「表哥真係笨笨！聖物無出現，對於佛滅鄉嚟講係恐荒性災難喔！佢地為咗令舍利印重新出現，任何方法都會試！」
「任何方法？」
小莜臉上浮現起跟九歲女孩完全不搭調的陰森冷笑︰
「無錯喔。為咗權位，有D人就算係自己個仔都可以落手！」
我的心臟一瞬間停跳兩秒。
「小莜……你係話阿英佢地……佢地係桃姨殺嘅？？？！有咩可能呀？」
 
小莜還想說什麼，細姨卻連忙制止她說︰
「小莜！無根無據，唔好亂咁講！」
「雖然我無證據，但係出現咗同傳說一模一樣嘅連歿事件，自然就可以喚醒所有人嘅恐懼！包括支持我地革新派嘅人！而且，選擇阿英落手，又可以減低自己嫌疑，簡直係百利而無一害喔！」
我看著小莜那頭頭是道的模樣，竟覺得她說得很有道理，忍不住問︰
「之但係……話晒都係自己個仔呀……點解可以落到手……」
 
小莜以蔑視的眼神望著我︰
「錯喇錯喇！根本錯晒！第一，係我地佛滅鄉，仔根本無關重要哦！話就話係仔，但十幾年都係外邊住，邊有感情？第二，如果殺自己一個仔就可以令所有人相信果D恐怖傳說，繼而絕對服從自己嘅話，計落，根本無蝕喔！」
阿靚妹！而家講緊殺人碎屍呀！唔係買股票呀！唔係踩死隻曱甴呀！唔好講到咁撚平常好喎！
 
細姨淡然搖搖頭，安慰我說︰
「阿迅，呢D只係小莜嘅推測，你唔好聽佢講。其實，桃姐要得到天等之位，根本唔需要做咁多迂迴曲折嘅事……以而家嘅科技，偽造一個胎記又唔難。你話岩唔岩？」
「咁都係嘅……」
「真正令我擔心嘅，反而係阿茹嘅事。阿茹無論點發脾氣都好，都無試過咁耐唔返屋企。我懷疑，佢可能已經俾人……」
我心裡一痛，問︰
「細姨，你懷疑係桃姨做嘅？」
 
細姨只是搖頭︰
「我唔肯定，講到尾可能只係我地諗多咗。但係，阿迅，過咗去嘅事，已經補救唔到，最重要嘅係諗清楚現狀。而家最危險嘅人其實係你，你知唔知？」
「我？因為我生母嘅事？定係因為我想帶阿葵走？」
細姨沒有正面回答，只是認真地凝望著我說︰
「阿迅，你要走，唔可以再拖。」
「我……走？但係……我根本都走唔到……班村民看住晒峽谷，呢度又無第二條路……」
 
細姨思忖了一下，突然湊近我耳邊，低聲說︰
「阿迅，其實係你唔識得揀時候。今次，細姨會幫你安排好。今晚凌晨，等全村人訓晒之後，細姨就嚟帶你走。我知你好擔心阿茹，我亦都會試下搵佢，但無論搵唔搵到，今晚半夜，你都一定要走，你明唔明？」
我點了點頭，又跟她說了昨晚在玎公公房間聽見的聲音，才問︰
「咁……阿葵呢？」
細姨苦笑一下︰
「阿艾歿咗之後，阿葵就係桃姨最後嘅希望……佢唔會有事嘅，你放心啦。擔心佢，不如擔心下你自己，你話係唔係？」
 
細姨又跟我談好了今晚行動的時間和注意事項，才帶著小莜悄悄離開。
為謹慎起見，她們還從外邊把房門重新上鎖。
她們走後，我獨自躲回床上，輾轉不安。一片混沌的黑暗之中，我彷彿看到了一絲希望的光芒。
 
如果，細姨可以搵番阿妹，到時我地一齊走，咁就好啦……
當然，如果連阿葵、阿榣都跟埋我走，咁當然更好……
我想像著這個如夢般的畫面，再次倦極入眠。
 
#16完