鏡像密語: 第六章、燃燒吧，動漫之魂！

「洛妍，你幫我過去問一問剛哥張單到底出現咩問題？」sing哥一黎就指派左洛妍今朝既首要任務。

「無問題，我依家過去問。你的勤快洛妍在線中。」

而行過去剛哥既座位之際咁啱就遇上煇爺佢地幾個（當然仲有吖言啦）

「喂，你今日著到咁既，個公仔係咪⋯⋯？」煇爺諗左好耐。

「唔準諗，即刻答。」
（快啲答啦⋯⋯）





「炭治郎！」煇爺又拍心口啦。

「有冇搞錯，呢個擺明係義勇，我最愛。」洛妍想翻白眼。

「喂，佢都中意義勇嫁！」煇爺指住身後既吖言。

（竟然⋯⋯押對了？）洛妍開心左一秒。

「唔係丫唔係丫⋯⋯」個個男仔對耳仔紅左少少，急住揮手否認。





「啊⋯⋯」洛妍個心沉左落谷底咁。

（到底係佢唔係中意鬼滅定佢唔係中意義勇？咁佢唔係啲咩先得嫁大佬？）

洛妍未黎得切反應，煇爺又問：「嘩你有冇咁中意鬼滅，著晒全套咁？」

「有，係年度最愛動漫！」洛妍眼裏面可以閃出光，答完大家都慢慢行返去自己工作崗位。

（正式收皮，話題完結左嫁啦，死左條心佢啦梁洛妍）





但過左一陣，大家又係剛哥個座位附近相遇。

「真係咁中意鬼滅？有冇咁好睇？」煇爺忍唔住又問多次。

「好好睇！」洛妍一提起鬼滅就會興奮到扎扎跳嫁啦。

「吖言都有睇嫁喎，係咪丫？」煇爺開始撩埋叫言加入討論。

「嗯。你中意邊個？」佢好似唔係望住洛妍答。
（你終於都開金口，今鋪真係值回票價）

「咪水柱囉，你呢？」

「兩個上六。」





「下，點解既？」
（個個都中意炭仔，你咁特別既？）

「上六既兄妹情打動到我。」

「都係既，仲好慘添⋯⋯」

「考下你，上六丫哥叫咩名？」

「嘩⋯⋯死啦我一時諗唔起丫，可唔可以比我溫下書先。」洛妍緊張躊躇。

（緊張死我啦，無啦啦突擊測驗都有既？明明我頭先預左收皮嫁嘛⋯⋯）

「三⋯二⋯⋯」





就係千鈞一髮之際：
「妓夫太郎！」
洛妍終於諗起，成功挽回鬼滅忠粉形象！

「啱喎！」吖言認真mode。

（終於⋯⋯係咪想開心死我？我想給煇爺加雞腿～）

「你地都快啲去睇下啦！」洛妍向住煇爺佢哋講。

「我地都唔太中意動漫既，留返比你同吖言啦。」

「可惜了⋯⋯」洛妍嘆左下氣
（唔可惜唔可惜，嘻嘻。）





閒聊完大家就散水，又返去繼續努力工作。但短短呢幾分鐘足夠令洛妍開心一整日，因為自己目標達到左，佢心足了。

（情報已收集，原來佢中意鬼滅，呢鋪真係押對了⋯⋯我太聰明啦，既然話匣子已經打開左，咁認識冇難度了吧？）

（呼⋯⋯終於識晒全村人）

過左一陣，梁洛妍導演的內心戲場開播左：
（有冇聽過打蛇隨棍上？呢啲野唔洗野野要人教吓話？）

「喂你又想點丫？」

（趁個火旺就好煽多兩下啦）

「又咩丫，咪認識左囉，夠皮啦！」





（嘩你邊有做同事做到人地都未知你叫咩名）

「佢會知嫁啦！煇爺會同佢介紹我嫁啦」

（實係啦，你又知人地叫咩名既？）

「咪吖言囉⋯⋯」

（你睇你心虛到，想知多啲、想人親口答又死口唔認）

「得得得，你嬴！咁你覺得我應該⋯⋯？」

洛妍終於係公司whatsapp群組搵到吖言既電話：

「洛妍姐姐送鬼滅sticker比你！」
（咁樣介紹自己咪掂晒囉，禮貌得黎又可以加插返少少個人資訊）

「啲貼圖好得意⋯⋯咁都比你搵到我電話。」

「啊⋯⋯你全名叫咩丫？姐姐我想知你姓咩」

「有冇機會係我大過你呢，姐姐？比個機會你估我幾多歲」

「我唔知丫，但睇落你仲後生過我。」

「所以你答左你個名啦咩？」洛妍再追問多次，

「我姓徐，名亦言。」

睇到個名之後，洛妍會心一笑，隨口講左句「隨心亦言。」


就係咁，洛妍同亦言兩個人由呢一度展開左對話，由生日星座傾到去動漫劇情，仲傾左一日，傾到凌晨兩點幾都唔願訓。

（續）