鏡像密語: 第九章、只屬於一人的SSR

七點十五分

「啊！仆街啦！我唔知醒丫！實遲啦」洛妍係床到彈左起身大叫。

「唉唔睇電話啦，直接換衫刷牙出門啦！」

叮———

「唔覆既？」





洛妍直接係搭車既時候係車到化妝同埋紥頭髮，所以一直唔得閒覆電話，直到差唔多返到公司樓下先睇電話。

「鏡鏡，早晨！我頭先遲左起身」

「我都估到嫁啦，平時冇理由咁耐都唔覆」

「我唔想冇勤工獎攞丫，嗚嗚⋯⋯」

「笑死」





「唔講住，我跑返公司啦，希望35分前到公司啦」

（唉，又會咁啱染左個新頭先黎遲到既，我想做眾人既焦點但冇expect 咁做法，因為遲到會比其他同事唔好既印象嘛）

（唉你仲有時間諗咁多野？跑啦衰女）

「等埋等埋！」洛妍一個轉身射個三分波咁既流暢度趕到班lift，終於係八點三十五分個刻跑到入公司門。

「呼⋯⋯真係好彩！」洛妍氣都未喘完就聽到茶水間傳來幾聲讚嘆聲。





「嘩～」

洛妍一抬起頭就見到煇爺佢地幾個圍住個門口，全部人都比洛妍個髮色吸引住。

「個頭幾好睇喎」煇爺施施然咁行過黎咁講。

叮———

「嘩，小鏡你個頭小靚喎」亦言即刻用message 讚洛妍。

（嘻嘻，睇黎大家都覺得好睇，最起碼佢中意（？）最起碼佢覺得好睇）

（係salon坐到腰骨痛都值了）

（但我想聽佢親口讚⋯⋯）





（收聲啦，人地肯讚咪算係咁囉，仲想人地點？）

「嘻嘻，我琴日早走既原因，想比你地一個驚喜！」洛妍秒回。

「係紫粉色丫！！！好夢幻既髮色！想問你係邊套動漫行出黎既女主角？」隔住個mon都feel到亦言既激動。

睇到呢到呢位女主角個嘴角就黎拉到上太陽穴咁濟。
（試吓唔好咁開心、咁易面紅啦梁洛妍）

（咩丫？有人讚係咁開心嫁啦加上我都未試過咁樣比人讚法）

（佢啱睇就好）

如是者，洛妍維持一整日既好心情返工。





「心情好靚咁喎洛妍姐姐？」sing哥見到洛妍笑足左一日，好奇之下一問。

「係咩？因為我比人讚囉！好唔好睇先我個髮色？」

「普通吧，我覺得你之前啡色好睇啲，因為我中意啡色」

「唉，你都唔識野既！夢幻髮色黎嫁」

（好彩有人識貨，哼！）

（佢啱睇咪得囉⋯⋯）


就係呢個時候，





叮———

「喂喂，小鏡，想講好耐，你今日著得好好睇！」

「係咩，嘻嘻，我都唔知丫，我今日就係想咁着，好韓系呢？」洛妍偷笑回覆。

「唔係，係日系先啱！」

「從來冇人讚過我日系，哈哈！」

「你知唔知——我中意菱格冷衫？」

「真係咩，我都中意嫁！」





「你今日既配置簡直係SSR！太好睇啦！」

「讚到我天上有地下冇咁」
（我靜係想知我個嘴角捨得放落黎未？）

「如果唔洗做野既話，我真係想擔張凳仔坐你隔離，望足你一日⋯⋯」

（好彩佢見唔到我面紅個樣姐）

「嘻嘻，係咪真嫁？」

「真嫁！我都唔講大話既！」

（比面你我唔笑你啦！）

「不過我留意左你個袋好耐，因為我都中意vans既黑白格仔！」洛妍笑笑下又提起。

「點解連中意啲咩pattern 都一樣既⋯⋯好神奇丫」

「我地有樣係唔一樣嫁咩？」

「咁又係！麻煩大聲講左次我係邊個？」

「鏡鏡！」
（呢下係咪要有歡呼聲？）

（呢個名真係意義非凡到一個點，本小姐好滿意）

「人靚、夢幻髮色、SSR套裝，我真係諗唔到點輸」

「再讚我會囂嫁！」

「係你咪咁謙啦⋯⋯」

（如果能夠成為佢眼中好特別個個，我真係死而無憾⋯⋯）

（真係冇諗過我同佢係會有咁既發展，咁cool既外表之下，竟然咁有反差萌，望住我套衫同個髮色個時好讚嘆個樣，仲可愛過我（？）

「好想睇多次SSR⋯⋯」

「你啱先咪睇左囉？」

「唔夠丫，我同你既工作崗位都唔同，冇得無時無刻見到丫嘛，幾可惜先得嫁。」


五分鐘後⋯⋯

叮———
今次輪到亦言電話收到whatsapp message ：

① 相片


「嘩！」亦言激動mode。

「見你咁想睇，做比你！」

「自拍好睇到⋯⋯」

「得一次嫁咋」

「呢啲係每日任務黎，要堅持完成既」

「你好貪心丫！」洛妍一路甜笑一路覆。

「我係嫁！」

（佢係咪對個個女仔都係咁？）

（可能佢貪得意先會咁講⋯⋯唔洗咁上心啦）

（咁都係既，但佢⋯⋯算啦算啦唔好理咁多，愈諗愈唔開心）



翌日

洛妍一如既往，準時返到公司既時候，電話又響起。

叮———

「今日小鏡都係SSR！」亦言果然係一言不合就開讚。

「點解既？好睇咩？我之前返工都試過係咁著」

「超好睇！靚到傻！」

「真係？」

「我最中意女仔著小皮鞋、白色恤衫、黑色短西褲，你真係著咩都好好睇！簡直係人型衣架⋯⋯」

「嘻嘻！我係今日唔知點解係想咁着，估唔到誤打誤撞着左你心目中既SSR！」洛妍又比人氹到心花怒放。

（原來佢中意日系斯文風穿搭）

（我平時咁啱都係著開斯文風）

（以後識做啦？以後就決定用你啦小皮鞋！）

（難得同事中意睇，養下人地眼都係作為新同事自己責任黎既！）

（想吸引下人地目光咪認囉！唉，算啦，你點話點好啦，藉口達人梁洛妍）

「以後可唔可以都許願睇SSR?」

「睇心情啦⋯⋯咁我送張許願卷比你，你想睇就用啦！」

「一張咁少咋？」

「你個貪心佬丫，比你一開二，摵半張使用啦！」洛妍偷笑。

「太珍貴啦，我唔捨得用，留黎有其他用途」

「哈哈，你有咩特別用途？咁誇張，可能我隨時心情好會送到幾張俾你」

「咁我希望小鏡日日都心情好！」

（嗯⋯⋯我最近，由識到你開始，日日都好）

（係咪因為我同你日傾夜傾呢，短短一個月我已經好依賴你，好想每日由朝到晚都同你WhatsApp，好想每日返工見到你）

（記得見你有一次隔左兩個鐘先至覆我，我唔知點解個心好不安⋯⋯但點知你又突然上線話你去咗睇戲，我個心當下即刻鬆左口氣！）

（但下一秒又好想問你係咪同女朋友出街，雖然到最後唔敢問）

（關咩事？你怕人地唔知做咩唔覆你，怕少左個人陪你咋掛？）

（會唔會係咁⋯⋯？）

（喂梁洛妍，你以為自己係邊個？醒下，好？）