鏡像密語: 第十章、專屬天蠍座的愛情公式

公司既冷氣機最近壞左，所以公司訂左5部大型吹風機放係公司不同角落，但每部都要自行組裝螺絲，可惜組裝吹風機唔屬於任何一位同事既職責，所以高層希望有自願出黎頂既男同事⋯⋯

「我啦我啦⋯⋯」迪仔舉左手。

「得啦識左你十三年，點會比你自己一個整晒咁辛苦？」亦言輕輕拍左一下迪仔既膊頭。

「果然夠老友！」

「我一陣過黎幫拖！」亦言一路講一路行返去位。





迪仔係亦言既中學同學，主打係公司show off一段十三年既兄弟情。

因為迪仔係一個不拘小節既人，好少計較自己做多定做少，所以成日比老同事欺壓。當迪仔受委屈既時候，亦言都會出自唔忍心，為佢挺身而出。

洛妍咁啱行過聽到迪仔自願幫手組裝風機，個腦閃過一絲念頭，隨即同主管講話自己都想幫手。然而，亦言係唔知洛妍自己過左黎幫手。

過左一陣，亦言做完手頭既野打算慢慢行去搵迪仔，但當佢愈行愈近迪仔既時候，佢開始聽到一啲此起彼落既聲線：

「放手丫！洛妍姐姐！」迪仔大叫。





「我唔要！」洛妍搶左迪仔手上既螺絲批，跪左係地下開始扭螺絲。

「咪咁硬頸啦！」

「喂喂喂！你做咩丫？」亦言一見到洛妍係到上螺絲個時就跑過去問佢。

「幫緊你，幫緊你囉！」洛妍專心整，唔敢同亦言對望。

（死啦，佢一行埋黎我都好緊張⋯⋯試吓唔好手震先？）





「唔好挽啦師兄，你乖乖地坐返電腦檯得唔得？」亦言心急左。

「唔得！」

「喂，你做咩比佢整丫？」亦言轉身質問迪仔。

迪仔好無奈咁話：「我冇比佢整丫，但佢自己搶左去，但我地呢到得一個螺絲批咋⋯⋯」

「你放返低先啦，唔好整污糟自己同套SSR⋯⋯」亦言勸洛妍。

（其實我唔怕整污糟自己，只係怕你地太辛苦咋）

「唔緊要啦！我唔怕！」

「點解好地地有電腦檯唔坐，過黎整污糟自己？」迪仔想搶洛妍既螺絲批，但比洛妍推開左。





「因為我知呢啲唔係你地既職責，無理由要你地整晒嫁嘛，所以我咪黎幫手⋯⋯」

（我知你地係公司都受左好多委屈，我知我幫唔到你地幾多，但我想用行動話比你地聽，我唔會好似舊同事咁捨棄你地，雖然我做既係好微細但我希望咁做都可以比到一點點既安慰比你地，話比你地知仲有人心痛你地既付出，為你地受到既不公而無聲抗議）

（亦言咁善良，之前試過一次為迪仔發聲而得罪左舊同事，今次我係咪都可以好似佢咁，咁勇敢守護一個人？只不過，今次守護既對象就調返轉⋯⋯就好似佢想守護迪仔咁去守護佢）

其他人見勸唔掂洛妍，終於比佢繼續整，但上冇兩粒洛妍手腕都開始痛。

以前洛妍都試過上螺絲整電器，但今次個風機無論係體積定螺絲既重量都遠超以往洛妍整過既，所以洛妍顯得分外吃力，好快唔夠力，但佢依然堅持，就係因為佢依家擁有一顆想要守護一個人既心。

呢個時候office 既leader朱朱行左出黎見到跪左係地上既裝修女工人洛妍之後走過黎問：「你係到做咩？點解得你一個女仔係到做，班男仔靜係望住你做？」

「唔係丫，係我自願話幫手，佢地想幫我既但係我唔比咋」





「下次交比佢地啦⋯⋯」講完朱朱就返埋位懶理。

（都話呢間公司涼薄嫁啦⋯⋯過嚟問都係出自好奇點解個要個女仔整，唔會諗下班男仔既辛苦）

（儘管我面前咁多同事既提問我一律都答班男仔冇義務整，但似乎都喚不醒佢地既反省）

（唔緊要啦，做自己本分就好）

好艱辛咁上完八粒螺絲之後，仲要抬起部風機入電池先叫完成，洛妍不以為然放底左個螺絲批再幫手稱起風機，到佢想接着整下一部風機個時，發覺螺絲批唔見左，下一秒佢見到迪仔已經拎住左個批準備整。

「你地唔好咁啦，我都係想幫你地姐⋯⋯」洛妍苦苦哀求。

「夠嫁啦！有心夠嫁啦⋯⋯」迪仔冇正面望洛妍。

「我唔想你地做晒啲野冇人幫」





「出黎做野邊有得計較咁多喎！」

（就係因為你唔計較，亦言先會心痛你，為你發聲、幫你頂）

（都唔知係好事定壞事）

「咁我仲有冇咩可以幫手？」

「有丫有丫，你幫我去返你自己個位⋯⋯」亦言指住左邊，洛妍好專心咁聽。

亦言繼續講：「打開你檯面部電腦，繼續打單！」

「噗！」洛妍忍唔住大笑。





（佢平時都係咁氹女仔？）

（佢真係好搞笑）

「亦言真係好識氹女仔笑⋯⋯所有女都比你溝晒啦！」迪仔打斷左兩人既對話。

（嗯嗯，誰酸了，我不說）

洛妍點頭認真：「比條生路其他男同事啦徐亦言！」

（迪仔係咪都見過亦言點氹佢女朋友笑？）

（佢仲有氹邊個女仔笑呢？）

講完洛妍打算收埋晒啲螺絲，打算重奪螺絲批掌控權之際，亦言即時心領神會，快先過洛妍一步想搶螺絲以免洛妍再上螺絲會整親。

「喂！唔準唔準！放開手手！講真既！」洛妍捉住亦言個隻已經拎起左螺絲既手，慢慢攤開佢既手指：「你冇帶手套丫，萬一拮親手點算？」

（我成世女都未試過咁惡既語氣講最溫柔既說話，呢個係咪我黎嫁？）

（我唔想佢整親丫！）

亦言停頓左半秒，佢終於冇搶而係放開左個拳頭。

（佢個樣好似好乖咁⋯⋯唔知點解想摸下佢個頭）

如是者，三人結束左搶螺絲批搶螺絲大武鬥滙演，變左輪流整，最後終於整好左。

（呼⋯⋯終於整完⋯⋯但我想留係到多一陣⋯⋯）

「咳咳⋯⋯」亦言咳嗽聲引起左洛妍既注意。

「你冇事丫嘛？」洛妍忍唔住關心亦言。

「冇丫，就係喉嚨有啲痛⋯⋯」

「啊！我locker有沖劑既清熱酷，拎比你丫」

「下，有用嫁咩？」

「我唔知丫，但佢個包裝寫住可以增強抵抗力喎⋯⋯」

「好啦好啦，試下啦咁」

洛妍同亦言入左去茶水間，洛妍開左locker拎完再問佢拎佢既水杯，之後走向水機禁凍水。

「下，唔係用熱水沖嫁咩？」亦言好奇一問。

「所以我先叫你將個水杯交比我，等我沖就係因為怕你一野杯左熱水，係用凍水嫁！」

「係喎，個包裝真係咁寫」

「因為十個有九個都已經問過我點解唔係用熱水⋯⋯我已經懶得解釋，哈哈！」

（關咩事，咁你依家都解釋左啦！）

（懶得解釋係假既，但想付出下就係真既）

（你咁奇怪既梁洛妍，咁多人唔幫靜係甘心幫徐亦言？）

（冇冇冇！我個個都幫既！冇幫個啲係人地冇問姐）

（咁又係丫咁主動關心人，仲洗咩人地自己開口）

（我左習慣照顧人，唯楓教既）

（哦⋯⋯）

洛妍望住亦言放左係檯面既電話，陷入半秒沉思。

（佢個mon貼崩左一角喎）

洛妍順勢拎起亦言部電話，指住個機殼問：「呢個係咩？」
（唔可以問得咁明顯⋯⋯）

「煤炭屎鬼公仔囉。」

（我知⋯⋯唔係問個機殼公仔丫）

「唔係！我想問呢個係咪iphone 14pro max丫」

「哦，唔係max丫」

「真係？我以為係max添。」
（double confirm 下）

（醉翁之意不在酒，情報已收集）

如是者，當洛妍行返埋位做野個時，佢偷偷地拎個電話出黎，輕輕禁左一個制———

「提交訂單」


今日一切安好，大家工作都幹勁足咁，可能因為整好左風機，大家冇咁熱。但就係臨收工前半個鐘：

叮———

① 相片

「嘩！你點丫？」洛妍秒回。

「冇丫，我頭先都唔知係邊到刮到，就咁就流血。」

「痛唔痛？咁唔小心既！」
（喂？好擔心人咁喎？）

「啊，你好彩！我今日著新鞋怕刮腳真係袋左幾塊膠布係袋。」洛妍醒起。

（其實呢個世界真係有冇咁多巧合呢）

（巧到我都唔信係真事）

「唔洗啦，咁麻煩」

「唔得！一定要包好⋯⋯有細菌丫！」洛妍堅持，跟住message 亦言入茶水間等佢。

（都係拎埋酒精同佢消毒左先好啲）

（會好嗱嫁喎，唔知佢怕唔怕痛？）

（問下先⋯⋯）

「呢枝咩黎嫁？」亦言一早乖乖地坐左係茶水間等洛妍，見到洛妍拎左一枝野放左係檯面。

「酒精囉，消左毒先啦，污糟丫⋯⋯比我睇下」洛妍問亦言伸手睇下傷口。

「其實個傷口好細姐⋯⋯唔貼都得既。」亦言想縮返隻手。

「哦，咁算囉⋯⋯」

（唉，做多左啦梁洛妍）

「咁又唔好⋯⋯都拎左出黎啦」

（點解我好似好緊張佢整親咁既？正常咩？）

洛妍倒左少少酒精係紙巾幫亦言抹下傷口，然後慢慢撕開膠布包裝。

「痛唔痛丫？」洛妍皺眉一下。

亦言搖頭。

（梁洛妍，試下唔好手震？）

（咪當貼街招咁囉，放鬆啲！）

（唔係丫，同佢坐得好近⋯⋯緊張正常掛？）

「唔該你！」

「下次小心啲啦！」
（就係對我最好既答謝）

（佢唔整親你邊有機會坐佢隔離幫人貼膠布？）

（咁我寧願一世我坐唔到佢隔離，都唔想佢整親⋯⋯）

（事關我都幾心痛下⋯⋯）

放左工之後，洛妍沖完涼吹完頭覺得無聊就拎起左本書睇，突然間電話響左，上面寫住個熟悉既人名。

（啊⋯⋯佢第一次打比我）

（聽唔聽好？）

（你係咪傻？老虎都聽左先啦！難得人地做左次主動，係咁意回應下都要既）

（「係咁意」？）

（咁我遲兩秒聽夠有矜持啦掛？）

（咪繼續呃人呃自己囉）

洛妍禁左個綠色制，第一句聽到既係⋯⋯

「喂，你真係聽電話嫁？哈哈」亦言驚喜左一秒。

「咁我收線囉！」你的佻皮洛妍在線中。

「喂喂喂，咁又唔好⋯⋯」

「嘻嘻⋯⋯」
（只有我知點對付你⋯⋯女仔係中意人地挽留下自己，因為咁先知自己係對方心目中有幾重要）

「你真係幾佻皮嫁喎」

「係喎，你隻手點丫？」

「冇事丫，唔痛啦」

「咁就好啦」

「唔好再咁唔小心啦！」
（我究竟講左幾多次？人地會唔會嫌我煩？）

佢地閒聊左一陣⋯⋯（一陣係兩個幾鐘囉）

「夜啦，聽日返工就早啲訓啦⋯⋯」洛妍開始打喊露。

「哦，我聽日放假丫！」

「下⋯⋯」
（咁我個mon貼咪⋯⋯）

「做咩啦？」亦言問

「冇冇冇，我見你成日返工以為你聽日都返添，你透下都好既，成日OT」洛妍掩飾緊自己既失落。

「哦，我不嬲都揀星期三放假既。不過都真係夜啦⋯⋯早透！做個好夢！」

「嗯！早透！」

洛妍收左線之後就上返床，但又未咁快訓得着，所以又拎起電話碌下IG，比佢咁啱睇到一個星座帖文寫住⋯⋯

「 12星座喜歡一個人的表現：

天蠍座：對TA貼心浪漫 」

洛妍默默點左帖子兩下，然後熄左個電話mon訓覺。


（續）