鏡像密語: 第十八章、二選一
「咳咳咳⋯⋯」洛妍自從去完camp冇幾耐就病左，因為佢日曬雨淋，休息時間好少所以佢一返黎就感冒。
洛妍一訓醒就向主管東尼whatsapp請假，因為佢覺得自己今日特別唔舒服。
「唔好意思丫東尼，我想請病請一日，醫生紙後補！」
「OK！」
叮———
洛妍對話框多左幾條訊息：
煇爺：「洛妍姐姐今日報左假咩？」
Sing哥：「今日唔返？」
亦言：「對唔住丫，今晚明知你唔舒服都捉住你傾電話，唔比你早啲瞓」
洛妍睇到最後個條message 又好唔爭氣咁笑左出黎。
（點會怪你）
（鬼咩⋯⋯因為我都唔想訓）
（我揀左繼續同你傾既話我自己都要負責任既）
叮———
「你今日會去睇醫生？」亦言再問多次。
「嗯。晏啲！」
洛妍覆完就熄電話訓多一陣，直至4點起身出發睇醫生。
直到夜晚某人又再打左個night call，叫醒左休息緊既洛妍。
「喂⋯⋯」洛妍頂住睡意起身聽電話。
「你點丫？啱啱訓緊？」
「嗯。」
「今日醫生點講？」
（你突如其來嘅關心，有啲嚇到我，因為我好耐冇比人關心過啦）
「感冒丫，叫我休息多啲咁囉，我叫左唔好開有睡意既藥，但佢有一隻都係有。」
「咁我唔阻你訓啦⋯⋯」
「唔好啦⋯⋯我都醒左啦」洛妍輕揉眼睛：「你唔好扮關心啦師兄！」
（你知唔知你唔可以關心我）
「我邊有扮⋯⋯」
「咁你呢份關心，你係以同事既身份定係以朋友身份問？」洛妍屏住呼吸。
「我諗呢兩種身份都唔係。」
（你終於肯承認啦咩）
「咁你知唔知自己做緊啲咩？你可以咁樣嫁咩？」
「我知自己做緊咩！」
「唔好意思你唔知，如果你係知你唔會咁⋯⋯你有女朋友嫁，你醒未？」
「但我有啲嘢想同你講。」亦言好正經好認真咁講。
「⋯⋯」
「早兩日，你同煇爺食飯，你咪擔遮遮佢既⋯⋯我其實⋯⋯」
「？」
「我其實好介意好唔開心，但眼見你好似都唔發覺我有唔開心，我就係到諗，如果連你都唔知我唔開心，你都唔會主動氹返我既話咁嬲黎都好似冇意義⋯⋯」
（我點會感覺唔到你唔開心？）
（但與其話你係唔開心，我更多既係覺得你陰陽怪氣⋯⋯）
（點解你呷醋都唔可以直接認？）
（呷醋好失禮咩？）
（你地男仔唔想估我地女仔話冇野係點解，其實調返轉頭我地女仔都係嫁）
「等等先，嬲？你話你嬲我？你同我講個嬲字？」洛妍愈黎愈扯火。
「嗯⋯⋯不過你唔氹我我都冇野，過一陣都冇野嫁啦！」亦言平淡咁答。
（睇黎你真係買棺材唔知錠！）
（其實你有咩資格呷醋？你一腳踏緊兩船喎，仲想我氹返你？真係好諷刺好荒謬！）
「呵！我真係好傻！傻到貼地！你知唔知最近有兩間學校打比我叫我去見工in我夢想職業，叫我做老師，我兩次都推左就係因為想留係到對多你一陣⋯⋯我真係好傻好傻好傻。」
（有老師都唔做，但我得到一個點樣既對待？）
（就係一拖二，比唔到身份我之餘仲要嬲我呷我醋，仲妄想我會氹返你？）
（依家講到好似係我做錯野要氹返你咁）
（我到底算係咩？）
（你憑咩咁樣對我⋯⋯）
「對唔住丫⋯⋯對唔住丫⋯⋯」
「你講到係我唔知你既唔開心，所以你依家要委屈自己主動打比我同我講自己嬲咁。OK，你想我知你既唔開心，咁我呢？」
「對唔住丫⋯⋯對唔住丫⋯⋯」
「依家講對唔住又有咩用！你根本係挽我！」
「唔係！」
「唔係既話你點會咁對我？你知唔知我有幾委屈？點要我一個人承受晒所有閒言閒語？」洛妍聲線已經沙啞。
「我其實打算一世都唔會同你講我中意左你呢個秘密⋯⋯」
「⋯⋯」洛妍既淚痕開始加深。
「我依家講都係想捍衛下自己，因為我想講，我就算處理得唔好，但唔等於我對你唔認真或者唔係真心！」
「如果你係認真既點會咁？」
「你可唔可以比啲時間我？」
「我唔想等你啦，我好攰，本身我都同你一樣，打算一世都唔同你講我既心意，亦都唔打算同你講為你犧牲左啲咩，但我頭先實在太嬲啦⋯⋯」
（因為我知過左咁耐，你有心做早做左，洗咩等依家？）
（我比你既你時間仲唔夠多啦咩？）
（講緊唔係兩日喎⋯⋯係已經兩三個月啦⋯⋯）
（知唔知累積既心淡係點？）
（咁你仲想我無了期等你幾耐？）
「你唔好咁啦⋯⋯」
「我太清楚你啦⋯⋯以你既性格，你又點會主動同佢講分手？係我傻姐，明知結果係咁都仲甘心付出⋯⋯」
（呢樣都係我最痛恨自己既野⋯⋯）
（我中意你既善良，但同時痛恨你既自私）
（我中意你既為人念舊，但同時痛恨你既遲疑不決）
（我中意你既反差萌，但同時痛恨你既極端）
（我中意你係個會係重要關頭為朋友同中意既人挺身而出，但同時痛恨你平日你既敢怒不敢言）
「你如果真係想話比我聽你係認真既，你用行動去證明比我睇啦。」洛妍講完就收左線，好好沉殿下自己。
（你點夠一個一齊左5年既另一半比較？）
（人地經歷左咁多野）
（好，打定輸數啦梁洛妍！）
（冇期望就唔會失望）
（續）