鏡像密語: 第二十九章、 ：小鏡，生日快樂？

話咁快斷聯既日子眨吓眼就過，話咁快就到洛妍既生日⋯⋯

（今年既生日真係唔想過）

（又唔係同我想過既人過，有意思咩？）

（唔過都得既⋯⋯）

洛妍電話一響：





「喂，你生日有冇人約？」

原來係學校學會主席高諾問洛妍，兩個算係學會入面比較熟，平時都會出去玩或者練下舞。

「冇丫」

「我約你囉」

「又好姐」





（有人約咪去囉⋯⋯）

（佢唔約你姐⋯⋯我仲有其他人約，哼！）

（咪痴啦！佢⋯⋯點會約你，估計連小鏡生日都唔記得）

「一陣返學校開完會傾！」

「好」





⋯⋯⋯⋯⋯
「點解等左咁耐都未見諾個人影既？」

「不如打比佢啦？」其他同學表示。

洛妍舉起電話：

「喂，全村人等緊你喎⋯⋯」

「我知！我幫緊個垃圾買緊野！好快到！」

「好啦好啦！」

洛妍收左線之後繼續主持會議，主持左半分鐘，洛妍身後傳黎歌聲⋯⋯





「Happy birthday to you….」

洛妍一拎轉頭就見到高諾捧住左個蛋糕入黎，洛妍瞬間感動到不行⋯⋯

「許個願先啦⋯⋯」

「嗯」洛妍雙手合十再扣指，慢慢合埋雙眼。

「你個願望咁長嫁，好貪心！」卓庭係到笑洛妍。

「我唔記得點許願丫嘛！」
（自從我離開左唯楓之後，我好耐冇再許願，因為冇人再同我過生日，冇人主動問我想要咩禮物，冇人會主動想幫我實現願望）

（所以我頭先短短半分鐘既許願時間入面，有16秒係唔知自己要許咩願望）





（最後我係危急關頭成功諗到3個願望湊數，笑死）

（一個完美既願望入面應該有啲咩？一係有身體健康同埋⋯⋯）

（講左好似會唔靈喎）

（重要野唔講咪得囉）

（咁又係⋯⋯）

「我好感動，多謝你丫諾⋯⋯但原來你話個條垃圾係我哈哈！」

「係丫，仲打黎催我⋯⋯」

「我都唔知⋯⋯哈哈！」





（如果唔係你地既話，我應該會忙到唔記得左自己生日⋯⋯）

「壽星女，切蛋糕！」安妮（其中一個成員）遞左把膠刀比洛妍。

洛妍小心翼翼咁切蛋糕，堅持切到一半就停手。

「你做咩？」丫諾問。

「切到底，會嫁唔出⋯⋯」

「有咩好怕，你本身都⋯⋯」

洛妍苦笑左一下，但佢唔會計較，因為佢知丫諾係講笑。





順利食完蛋糕、開完會之後，有幾個話唔想咁早返屋企（包括洛妍）

「我地去網吧打機，你去唔去？」

「我未去過喎，唔識打機⋯⋯」

（但我唔想自己返去唔知做咩好）

「我地想湊齊人嘛」

「好啦，咁你地教下我」

⋯⋯⋯⋯
如是者，洛妍跟住佢地去網吧打機。

「安妮，你幫洛妍開個帳號先啦，再幫佢揀一隻英」丫諾指揮安妮。

「收到你」

（英？係咪英雄？）

（應該係，除非唔係，我真係一頭霧水）

「洛妍，諗個ac名黎先啦」

「哦哦」

（咦，聽講有人用中意既女仔名做自己game角色個名）

（唔知真定假？）

（不如試探下？）

（你點肯定人地玩既同你依家開既係同一隻game)

(試下唔好再質疑天蠍既直覺？）

（收到你）

洛妍直接係keyboard打左自己個英文名。

「此名稱已被使用」

（佢冇呃我⋯⋯）

（呢啲係咪叫低成本浪漫哈哈？）

（結果係另一個陌生人用呢個名就好笑啦！）

（唯有改一改個名啦，咁改咩好，我都只係想用呢個名）

（點解？）

（因為我個腦得呢個名，得佢提過既呢個名，其他名我都唔想用）

（情侶款係咪？哈哈）

由於唔可以同其他玩家撞名，洛妍唯有重複自己個名多次，然後懵下懵下咁跟佢地學禁下4個基本鍵。

安妮一野搶左洛妍個滑鼠：「洛妍你睇住我示範一次先！」

「哦哦⋯⋯」

（專心學習中⋯⋯）

「嘩你咁快手既⋯⋯邊學得切喎」洛妍對眼開始跟唔上。

「洛妍你試下自己黎一次」安妮放左手。

「唉⋯⋯死就死啦！」

「哈哈！唔係亂禁丫洛妍！」

說時遲那時快，5秒後，屏幕變左黑白色，屏幕既上中位置大大隻字寫住「你已被擊殺」

「對唔住丫，我又死左啦⋯⋯」洛妍同隊友道歉。

「唔緊要啦，你盡左力，你又係新手，正常既⋯⋯」安妮安慰洛妍。

「完場take個break先啦」丫諾同大家講完轉身行去洗手間。

安妮一轉個頭就見到洛妍竟然開youtube 不斷睇教學：「大家知唔知洛妍做緊咩？佢係到睇教學！」

「哈哈！唔係掛？」卓庭大笑左。

「你洗唔洗咁努力丫洛妍？打機姐⋯⋯」

「你知梁洛妍做咩都係咁努力嫁啦！我唔想拖累你地⋯⋯」

「完全見到一個努力型既選手坐左係到」卓庭以講笑既tone咁讚洛妍。

「洛妍好努力嫁啦⋯⋯」洛妍回應。

「見到丫⋯⋯你好努力咁送頭囉！」卓庭補刀中。

咁啱丫諾返埋位聽到一齊大笑埋一份。

（我要再努力啲先得！）

（點解呢？你唔係黎玩下嫁咋咩）

（我想⋯⋯）

（想同人玩呢？）

（唔知你講咩喎）

（咁你又post IG話自己玩緊？）

（繼續試探囉）

（建議講返中文⋯⋯）

搭正12點，洛妍電話傳來左一條訊息⋯⋯

「祝小鏡生日快樂⋯⋯⋯」
（下刪一千字）

（叫得呢個名⋯⋯大家都知邊個sd黎嫁啦）

（但唔比你地睇洛妍收到啲咩，哼）


洛妍想扮睇唔到，但佢對手又開始唔聽話啦。

（佢仲記得我生日⋯⋯）

（車，好叻咩，夠膽出黎見我）

（你又開始發癲啦，人地都揀左⋯⋯）

（但我嬲嬲地喎）

（嬲咩？）

（搞到我咁唔開心，仲好意思叫我快樂）

（繼續口不對心啦⋯⋯）

（明明想人地搵你）

（要keep住呢種嬲既情緒⋯⋯我先有理由主動打去「鬧爆佢」）

洛妍直接禁左個通話鍵：

「你咁係咩意思？」

「？」

「你搞到我咁唔開心，好意思叫我快樂？」

「咁我係咪唔應該同你講？」

（過左火添⋯⋯）

（你咪試下唔好講囉，我會再嬲啲）

洛妍採取直接無視，再繼續鬧：「你唔係好開心嫁咩？你都揀左啦⋯⋯」

「對唔住⋯⋯但你唔係⋯⋯唔係對我冇感覺啦咩？」

「下？邊個話？我幾時咁講過？」

「個日公司食飯，你親口同其他同事講」

「下下下，我邊有？」

「下，佢地咁同我講既，係親口喎⋯⋯所以我先⋯⋯先揀返同女友復合」

「但我冇印象喎」

（世紀大誤會⋯⋯）

（依家知又點？）

「我可能嬲你係到揀左揀右之下隨口講掛，但我真係冇印象⋯⋯」

「⋯⋯」

「你開心啦」

「我冇⋯⋯如果計開心既話，呢幾個星期得呢個電話令我真正開心返⋯⋯」

（我都係⋯⋯）

（因為終於聽到你把聲）

（梁洛妍口是心非程度如果一百分比係滿分既話，我會比A+)

「哼⋯⋯」

（有咩用，就算我地互相中意都好，結局都係咁，你永遠會心軟佢，唔會心軟我⋯⋯）

（但佢點解會話呢個電話令佢真正開心返？）

「啊，我要上返去啦⋯⋯晏啲再講。」

（我消失左咁耐實比人問）

（唔咁講點延續話題）

「咁又係，你今日係主角丫壽星女」

洛妍輕笑一下，點頭收線。

（收返個嘴角啦梁洛妍⋯⋯）

（笑返咪幾好）

（個電話係咪安慰到你？）

（係⋯⋯）

「喂你消失左既？」佢地問起。

「哦⋯⋯係丫，我屋企人打電話搵我⋯⋯」洛妍面不改容咁老作。
（學下某啲人成日借丫媽過橋）

然後又笑住咁打機⋯⋯

（快啲學好學叻！）

（咁先可以「家暴」某人）