鏡像密語: 第二十八章、斷聯週記

洛妍同亦言冇要交集一段長時間，但就算洛妍同亦言斷聯都好，佢都係會時不時睇下亦言既whatsapp icon，睇下亦言有冇上線，仲會返工既時候偷望下亦言，而每一次洛妍都偷望失敗。知唔知點解？因為亦言有心避開洛妍⋯⋯

洛妍每一日返工都覺得好痛苦，只要諗到以前係點傾計依家係點斷聯，個種落差感係令到洛妍每日每夜都崩潰。

（點解我地最後會搞成咁？）

（點解你要避開我？）

（你仲想點折磨我？係咪嫌我唔夠痛苦？）





（但無論係點都阻止唔到我個心、我個腦諗住佢⋯⋯）

（知唔知係一種點掛住既程度？）

（就係我每聽到手機有一下鈴聲，我都希望sd message 比我個個係你，每聽到一下電話響，我都希望打比我個個係你）

直到有一日洛妍終於鬆左一口氣，因為亦言請左假⋯⋯

（呼⋯⋯我終於唔洗再對住佢！）





（梁洛妍，你好唔想見到佢咩？）

（痴線啦！我喎！點會想見到佢？依家見唔到仲好，心唔洗煩！）

（係咩？咁你每日心痛到咁仲返到工？仲唔辭既？咁支撐住你返工既又係咩？）

（我⋯⋯）

（其實你口硬有咩用？認啦⋯⋯就算心痛都想見多佢最後一面姐）





（認囉咁，可以點喎⋯⋯）

就係洛妍失神之際，洋洋打斷左佢既發呆時間：「唉，個個都唔返工，煇爺又病左，吖言又去左迪迪尼做吸血鬼⋯⋯」

（？）

（你話咩話？）

（佢去左迪迪尼？）

（佢自己去咩？）

（點會丫）

（佢同朋友去姐！）





（你覺得呢？）

（你問我，我直覺係同佢女朋友⋯⋯）

有時女人既第六感好準，準到你唔信，而天蠍座既直覺準繩度更加係加乘再二次。

就係咁，洛妍個心又崩左一個大角，返工返到冇晒靈魂咁，全日等放工咁款。

（好彩今日早放工返學校開會，唔洗困係呢個地方諗住某人）

如是者，洛妍集中精神咁去開會、集中精神咁同學仔傾計講笑，盡量唔比自己諗起某啲人。

「不如我地開完會去打牌、去party room玩啦？」





「好喔⋯⋯」

（反正我冇野做⋯⋯）

（算啦你，你想有人陪你姐）

（係丫，咁我就唔會諗起佢）

好快洛妍同啲同學仔去左旺角既party room玩，佢地打牌、唱k、飲酒，洛妍成個流程跟足晒嫁，直到⋯⋯

「洛妍，你幫我點一點歌啦！」

「好丫，你想唱咩？」

「小幸運」





「⋯⋯」

「禁啦！係咪唔識打字？」

「唔係⋯⋯可唔可以⋯⋯唔好唱呢隻？」

「點解？」

（係囉，做咩要咁霸道喎梁洛妍）

「冇野冇野，我聽到好厭姐！」洛妍強顏歡笑左唔知幾多秒。

「但我真係想唱喎」





「唔緊要啦，你唱啦⋯⋯」

洛妍一聽到個前奏，眼眶就自動自覺發紅，因為佢醒起曾經某人唱過呢首歌比自己聽，仲要係改詞版，知唔知有幾難忘？

「你洗唔洗去個廁所洗下面？」其中一個男同學謝卓庭察覺到洛妍既異樣，輕輕拍一拍洛妍既膊頭。

洛妍心領神會，強忍眼淚，企左起身：「係囉係囉，攰到呢。」

就係洛妍行出房閂埋房門既一刻，洛妍既眼淚奪眶而出，開始嚎啕大哭起黎，但佢怕房入面既同學聽到所以故意走遠，瑟縮左係一角，抱住膝頭喊，因為佢聽到佢個心入面好多謎之聲打擊緊佢：

（人地今日去玩丫！當你冇到！）

（佢去迪迪尼喎，但唔係帶你去喎！）

（你等左咁耐，人地最後都唔係揀你喎！）

（醒下啦，人地唔中意你，咪咁cheap啦）

（但佢話佢中意我嫁喎⋯⋯）

（咪就係呃你囉，鬼叫你咁蠢咁易呃？係我都呃你啦）

（我唔信，佢話唔會呃我）

（你傻啦，中意你就唔會咁啦）

就係呢個時候洛妍既電話響起左，洛妍都未黎等接聽就見到一個男仔舉住個電話行左出房門，左望右望，直至佢同洛妍對上眼。

「你⋯⋯你追出黎係⋯⋯？」

「算啦洛妍，一生人總係會遇到幾個fxxkboy嫁啦⋯⋯」

（你點知我⋯⋯？）

「佢唔係fxxkboy黎⋯⋯」洛妍好細聲咁講（唔知有冇人聽到）

「咩話？」

「唔係丫，我係覺得自己同呢到好格格不入⋯⋯你地好開心咁，但我呢，我好沉重，我好似透唔到氣咁！」

佢輕輕拍一拍洛妍個頭，好溫柔咁話：「冇事既，放鬆啲！」然後洛妍一抬頭就見到佢拎住自己中學張八達通舉比自己睇⋯⋯

「比你睇下謝卓庭幾年前既seven樣」

洛妍輕笑左一下。

「笑返咪好囉！嗱，張卡比你，你想落街行個圈透下氣又好，或者拎我張卡買酒又好，透順氣先返黎啦好冇？」

「我冇事⋯⋯」

「真係？」

「嗯！」

（原來呢個世界仲有人關心我，只可惜關心我既每一個、關心我既個個都唔係你⋯⋯）

（咪繼續入房賣醉囉⋯⋯）

（就比自己飲多一杯啦）

（一杯咁多啦⋯⋯）

（好唔好？）

（我唔想清醒）

⋯⋯⋯⋯⋯
第二日第三日洛妍都係一放左工就約人去飲酒，今日都唔例外：

洛妍好唔容易捱到5點，佢就舉起左電話，約左兩個女同事——尼尼同埋sharan姐姐：

「今晚得唔得閒？」

「可以丫」

「我想飲酒」

「你係咪唔開心？」

「今晚講」

「不如食飯先」

「好丫」

如是者三人食完飯就去左酒吧飲酒，尼尼趁sharan姐姐去左廁所既時候偷偷地問洛妍：

「洛妍做咩唔開心？」

「⋯⋯」洛妍又忍唔住爆喊。

「sorry丫，我唔問啦我唔問啦！」

呢個時候sharan姐姐返埋位既時候見到洛妍喊都嚇呆左，準備教訓整喊洛妍既尼尼，洛妍頓時開口解畫⋯⋯

「唔關⋯⋯唔關尼尼事⋯⋯係我唔開心到佢一開口問我就⋯⋯就忍唔住」

佢地兩個好留心咁聽。

「我忍左好耐，忍左好多日返工都冇喊嫁啦」

「咩事丫？」

「我中意左個人，但佢有女朋友⋯⋯我等左佢好耐啦⋯⋯但佢都係咁⋯⋯依家仲唔理我啦⋯⋯我點算好？」

「你中意左佢幾耐？」

「我估計計埋埋都⋯⋯你當半年咁啦」

「哦⋯⋯冇事啦女，幾個月貨仔⋯⋯好快抽離到」

「真係咩？但我已經好痛啦」

「忘記佢啦女，你話幾年就話姐⋯⋯」

「咁你試過中意一個人堅持中意左幾耐？」

「七年。」

「下！冇一齊？」

「冇丫！」

「咁你到依家都仲中意？」

「係！」

「我心服口服」

「所以你未夠一年既你，冇野需要傷心」

「⋯⋯」

「覺得痛就放手啦」

「但我好唔甘心，我放棄左好多野⋯⋯但最後都唔揀我。」

「付出左就冇得計較嫁啦女！」

「⋯⋯」

「放棄啦乖啦⋯⋯」

「你地知我硬頸」

結果佢哋由勸我變成說服自己縱容我既任性。

「痛到一個點，洛妍你就會捨得放手嫁啦⋯⋯」

「嗯，我遲早有一日都諗通」

（遲早囉）