《ASSO回憶錄》: 第一節
(1)
係中環一間酒吧門口...
我同呀俊企左係度煲煙，今年既我已經二十六歲，畢左業幾年，而今日，係副學士同學既聚會...
好多人都話吸煙，呼出黎既唔係煙，係寂寞，我信，因為我地兩支公百無聊賴咁企係門口，唔知為乜咁係度食煙...
我地兩個戇戇居居咁望住前面啲路人車水馬龍，就好似一個快鏡與慢鏡既分別...
呀俊: [不如今晚落去]
我望一望支煙，再望呀俊: [我地琴日先落完]
呀俊: [無關係架，琴日食完飯，今日食唔食]
我又望返支煙: [唔啦，好攰，個頭又柒]
呀俊係我副學士一個好好既朋友，佢咩都好，就係唔會做功課...
Sandy: [喂，你兩個係度做咩?]
Sandy一手搭住我地兩個膊頭，打斷左我地既話題...
我: [無，係度食煙咋嘛]
Sandy: [返入去傾下計啦]
舊同學既聚會，就係交流下大家既近況，發左達未，結婚未，呢啲話題...
而每次聚會都係Sandy做搞手，集合左三個班別唔同既人，好多人，但成個聚會裡面我最熟既就只有Sandy同呀俊...
其實大部份都識，但大部份都唔熟...
而因為太多人既開係，三班人分三張枱，根本就係三班人各自各玩...
Sandy本來係隔黎班既同學，但最後一年佢ADD/DROP之後變左有兩科同我地同班，而果兩科都係同我一組，所以，熟左...
亦都因為佢ADD/DROP太強既關係，成為三個班別既中間人...
Sandy拉左我地返去，我地一坐低，同班同學A就搭住呀俊膊頭...
同學A: [呀俊, 咁有意思既場你係點搵到返黎?]
呀俊: [做咩?]
同學A: [你知唔知頭先播咩歌? 上帝早已預備!]
呀俊: [香港酒吧播廣東歌，正常喎]
同學A: [廣東歌係蘭桂坊酒吧播?]
呀俊: [可能係外國好柒Hit]
呀豪: [喂係咪齊哂人啦? 點解唔見Tiffany 同 Vicky?]
叫得同學A，我唔多講啦，而呀豪係我地組員之一，但佢返學唔夠2個月就退學，仲要分好組先黎走，所以好記得佢...
至於點解返唔夠2個月學但係都會叫埋佢黎? 因為佢條女係對面學校讀書，所以佢成日都返黎搵同學食飯，基本上佢似退左學，但成日都見到佢個柒頭...
至於佢提及既Tiffany同Vicky?
Tiffany係我地三個班別都公認既女神，而Vicky...
慢慢再解釋，因為佢兩個同我有一個好複雜既關係...
同學A: [係囉, 全男班]
Sandy: [請問咩叫全男班]
同學A左望右望: [乜你見到有女?]
Sandy: [廢是同條廢柴講野]
同學A: [廢柴? 咩廢柴呀? 你試過呀?]
Sandy: [睇你個樣都知啦, 生左係個頭度]
千其唔好誤會，其實呢個係佢地既相處方式，Sandy其實係好玩得...
呀豪: [係啦，我以為佢地兩個會黎所以我先黎，仲諗住呀瀚係度]
同學A: [鬼咩，一係下次唔好叫呀瀚，或者佢兩個會黎]
我: [......，你講咩呀?]
呀俊: [算啦，佢地次次都抽你水架啦]
Sandy: [不如下次唔好叫佢兩個，咪無人會抽你水]
同學A: [做咩幫住哂呀? 鐘意人呀?]
Sandy: [你試下講多次]
同學A: [嘩, 搣人既]
Sandy: [你咪走]
呀豪: [其實我上次見過Vicky]
我: [你見過佢?]
呀豪: [係呀, 係銅鑼灣, 拖住條仔]
我: [哦，係咩?]
呀豪: [不過應該換左人]
呀俊: [你又知?] 呀俊快我一步問
呀豪: [因為無咁靚仔，仲差過呀瀚]
我: [......，喂關我咩事呀]
呀俊: [咁你有冇叫佢?]
呀豪: [無呀, 我都趕住送貨, 我之後有wtapps佢話我見到佢, 仲話佢知今晚我地出黎飲野]
呀俊: [咁佢會唔會黎?]
呀豪: [無答呀，不過佢有提起呀瀚]
提起我?
呀豪: [佢有問你呢排點，我話都仲係咁ON9]
我: [你實係咁講啦]
呀豪: [乜你地無聯絡咩?]
再見亦是朋友其實好難，反而再見亦是炮友我見唔少
讀書時期同做野時期既分別，就係讀書時期有太多時間，太多時間去消耗，太多時間去紀錄...
每個人都會懷念以前既事，懷念曾經擁有過，失去過既事，我都唔例外...
以前19歲既我根本唔會諗大個之後既事，但而家二十六歲，我明白到，每一秒過左，永遠都唔會返轉頭...
享受當下，係我呢排領悟出既道理，因為無論你開心唔開心，時間永遠都唔等人...
我都好希望能夠享受當下，所以我寫左呢個故事，呢個係我副學士生涯既故事，有真有假...
如果大家唔怕浪費時間，咁就等我帶你分享一下我既副學士生涯
七年前…
[Noun Noun Noun…] 鬧鐘響起
我叫余文瀚，一個天真無邪，年輕有為既19歲強壯青年...
唔好問我點解十九歲先讀副學士，始終留班唔係一件光彩既事
我無好似平時咁懶床, 反而好自動自覺咁起身…
經過二個月既廢青假期，每日指定，起身，打機，食下午茶，刷牙，打機，食晚飯，打機，食宵夜，訓覺，今日第一日開學，我終於可以對人生有返些少寄託，對社會有返些少貢獻
我仲特登較早半個鐘頭鬧鐘, 咁就可以慢慢食埋個早餐先返學, yeah, 無得輸!
媽: [呀仔乜咁早呀]
我: [得啦, 你理我]
已經有2個月朝頭早無拎起過牙刷，每次刷牙都黃昏
我刷到棚牙「立立令」之後，浩浩蕩蕩咁行去換左套出街戰衣…
唉…其實只係短Tee老牛黑Con屎…
神彩奕奕咁Jel左個靚頭…
Um……都靚既...
精神抖抖咁坐低食左個靚早餐…
其實都唔算靚…腸仔包加杯奶，個包仲要隔夜…
哎! 精神! 唔好打擊自己!!
就懷住好期待既心情出發…
所以話，如果你未興奮過咁你一定好唔鐘意返學…
不過我興奮既唔係因為我可以好好讀書，而係我終於唔洗再渾渾噩噩過每一日，更重要既係，成日暑假都對住日本人，終於，終於可以對返本地人，活生生既本地人...
我搭緊地鐵時候已經諗緊陣間返到學校會係點，9月咁熱，會唔會個個都著短褲得我著長褲呢? 唔知老師教書好唔好呢? 啲人讀書叻唔叻呢 ? 係咪我成績最差呢? 咁佢地咪可以教我囉…唔知佢地打唔打波….
錯哂…諗撚錯哂…
唔知Miss正唔正呢? 仲要著正裝, 成日罰留堂，成個課室得我同佢，佢為左鼓勵我，成日係我耳仔邊講野，明明開住冷氣又成日覺得好熱，件衫永遠扣唔實，成日彎低身執野，隻手成日搭住我大脾...
妖我諗緊乜...哎到站
一路行返學既時候, 沿途既影象同中學真係好唔同
以前著校服揹書包，以家著便服揹背囊
好多野都唔同左，多左一份輕便，輕鬆同舒暢...
可惜，最遺憾既係我無參加上個月既學校迎新營，我一直後悔到而家...
點解? 因為上網睇原來好多都係淫亂Camp，女學生都玩得好放，又大家住埋係一個宿舍入面，三曰兩夜，朝夕相對...
而更重要既係，O Camp係最先認識新朋友既地方，組爸媽會用輕鬆簡單小遊戲引導我地互相認識，了解對方，比兜口兜面Say Hello仲要諗之後講咩方便好多
另外，班仆街應該分哂組...
唉...有早知無乞衣，唯有用樣貌搭救
終於行到學校門口...
嘩做乜勁，有班學生圍住一個大叔係度談笑風生，痴線，邊叉個咁大個人仲要老豆送返學，我呸...
行近小小，原來係一個老師比一大班學生園住，係度討論學習與人生，真係，竟然係大專學校門口就可以感受到如此強烈既學習氣氛，真係未入廟已見煙...
老師與一班同學係翠綠既草地上討論人生哲理，談天說地，同學對人生既疑問，老師培養未來棟樑，呢D電視先出現既虛假情節，竟然活生生咁呈現係我微小既眼球之內...
我諗返以前讀中學, 都未試過同老師講多過十句野...
[梁文瀚! 又無功課交?]
[唔識做]
[留堂!]
[收到]
得4句...
而家眼前呢個情景，真係改變左我既對校園既睇法，推翻我既價值觀，令我對人生既未來充滿憧憬，我要改變社會，為香港作出貢獻...
後尾我先知道，原來圍呀SIR係一種學習策略，用黎提升分數，我屌。
不過撇除呢樣野，做大專生有好多福利，例如可以隨便放自己假, 話唔返就唔返，病假唔洗打比學校，鐘意可以聽聽下課出去食野，上堂訓覺完全無人理...
[401, 402, 403，係呢度] 終於行到班房門口...
我望一望自己隻黑色絕版Casio電子數碼顯示智能手錶，早左半個鐘頭有多…
其實我本身都係諗住早D既… 因為我覺得應該要留個好印象比老師同埋D同學...
點解要留好印象?
因為我做過research，讀副學士有好多Group project, 姐係好多科目都需要分組完成...
所以如果我遲到，其他同學就會覺得我唔係黎讀書，咁事實上我真係唔讀書, 但其他同學未知, 留返個好印象都要既…
既然早左半個鐘，咪入去坐住先囉
我輕輕抖左下大氣, 慢慢咁推開眼前呢度淺藍色既大門，準備開始我新既旅程，為人生既寫上新一頁...
課室既光線慢慢進入我眼簾，我感覺到好多青春無敵既囡囡所散發出既氣色，我之前睇過通勝，蘇民峰話我今年佛光初現，腳踏七星，行運行到腳趾尾...